“Neweabaakin te Tembora,” Te Rao, Meei 2023, 16–17.
Neweabaakin te Tembora
Svetan e ingainga ni kan nako n rin n te tembora!
E riki te karaki aei i Amerika.
E namakina te kukurei Svetan. Ana utu a mwaing mai Argentina nakon te United States. Ao n te tai aei e a roko aia tai n toka n te wanikiba ae bubura!
E taraa tinaniku man te winto Svetan ngke e kibarake te wanikiba. E iangoia bwa aekakira taraakin mweengana ae boou. Bwaai ni kabane a na bon bae ni kaokoro. Te auti ae boou. Te ruu ni matu ae boou. Kain rarikira ae boou. Ao rao aika a boou ake e na kaitibo ma ngaiia! E ingainga Svetan.
E ataia naba Svetan bwa mweengana ae boou e kaan nakon te tembora are e a tibwa kateaki. I Argentina, te tembora e rang raroanako. E tii nonooria n tamneina.
Svetan e rairaki nakon Mami. “N am iango tina kona n noora te tembora mai karawa?”
E wiingare Mami. “I aki ataia raoi. Ma tina nooria n te tai ae waekoa.”
E wiingare n oki Svetan. Mami ao Papi a taku bwa e tuai moa n uki te tembora. Ma n te tai ae waekoa e na iai kaukan autina. Nanon anne bwa aomata a kona n rin inanona n nooria imwain ae e katabuaki. Ao ana utu Svetan a na bon nakon kaukan te auti! E aki kona n tataninga ni kan noora te tembora ni matana.
Tabeua te aoa imwiina, Svetan ao ana utu a roko n aia auti ae boou. E mwaiti te bwai ae a na karaoia. Svetan e buoka kaukan aia bwaoki ao a katamaroa aia auti.
Tebongina imwain kaukan te auti, a tekateka n te katangaina ni marooro.
“Te tembora bon ana auti te Uea,” e taku Mami. “Ngkana ti roko inanona, ti riai ni karinerine. “Ko ataia bwa tera nanon anne?”
“Tina taetae ni karaurau n te aro bwa ti aonga n ongo raoi iroun te Tamnei ae Raoiroi?” E titiraki Svetan.
“Eti anne,” e taku Mami. “Ti kona n reiakina ae mwaiti ngkana ti roko n te tembora.”
E katoutoua atuuna Svetan. E tangiria ni bwaina te karinerine bwa e aonga ni kona n namakina te Tamnei ae Raoiroi inanon te tembora.
Te ingabong are imwiina, e uti mwaaka Svetan. E karina oneana n te Tabati. Imwiina e a roko aia tai ni mwananga.
Ana roko ana utu Svetan n te tembora. Aomata a buokiia ni karini buraetitiki aika a uarereke n rabuni aia kau.
“Bukin tera ngkai a karini baeki aika a uarereke aikai iaon waeu, Mami?” E titiraki Svetan.
“Ibukina bwa inanon te tembora bwaai ni kabane a boou ao a itiaki. Ti tangiria n tararuaia.”
A butimwaeaki iroun te aine. E wareki taeka ake iaon mataroan te tembora: “Mimitong nakon te Uea—ana auti te Uea.”
Svetan e taua bain Mami. A nakonako inanona. A bane n tikiraoi bwaai ni kabane! Tao aio aron namakinan karawa.
“Taraia!” E wirikiriki Svetan. E kotea te korobanna. “Arei Iesu!”
Ngke a tia, Svetan e namakina te kukurei. E kakaitau bwa e kona n rin inanon te tembora. E tangiria n rinnako riki inanona ngkana e ikawai riki.
Kamataata n te tamnei iroun Mark Robison