“O Se Fasi Falaoa Itiiti,” Uo, Iuni 2023, 4–5.
O Se Fasi Falaoa Itiiti
Sa leai se mea i le fata o le faamanatuga!
O lenei tala sa tupu i Kuatemala.
“Ua ou fiafia lava e alu i le lotu i le falesa!” Na fai atu ai Anahí i le meaai o le taeao.
Ona o le faama’i pipisi o le KOVITI-19, sa le mafai ai e Anahí ma lona aiga ona o i le lotu mo le toeitiiti lua tausaga. Ae o le asō o le a iu lava ina mafai ona latou faia! Sa fiafia Anahí sa mafai ona ia vaai i ana uo ma toe maua le faamanatuga faatasi ma le latou uarota.
Sa nonofo i lalo Anahí ma lona aiga i le falesa. Sa talotalo atu Anahí i ana uo.
Sa lei leva ae oo i le taimi o le faamanatuga. Ina ua uma le viiga, sa piilima Anahí ma punou lona ulu. Sa faalogologo o ia i le tatalo o le faamanatuga. Ona ia tilotilo atu lea i se tamai ata o Iesu. Sa fesoasoani ia te ia e manatua ai ia migao.
Sa aumai e se alii talavou le fata i lo latou atulaina. Ae ina ua oo atu le fata ia Anahí, ua leai ni mea!
Ona tilotilo latalata atu lea o Anahí. I le tulimanu o le fata, sa i ai se fasi falaoa na totoe ai. Sa ia pikiina i luga ma tuu i lona gutu.
O le taimi atoa na totoe o le aso, sa popole o ia. Sa ia mafaufau pea e uiga i le fasi falaoa itiiti. Sa popole o ia i le taimi atoa lava o le taumafataga o le afiafi. Na te lei aia foi lana aisa kulimi o le vaiaiga. Sa na o lona saofai lava i le laulau a o fufulu e Mama ipu.
Pe na taulia ea pea le faamanatuga pe afai na o se fasi falaoa sa ou aia? sa ia mafaufau.
Sa faamago e Mama ona lima i luga o se solo. “O i ai se mea ua faaletonu, si o’u au?”
Sa lulu le ulu o Anahí e leai.
“Ia, o lau aisa kulimi liusuavaia ua ou manatu ai o loo i ai se mea o faalavelave ia te oe.” Sa ataata Mama ma nofo ifo i autafa o Anahi. “O le a?”
Sa amata ona maligi loimata o Anahi. “Sa ou fiafia lava e ai ma inu i le faamanatuga i le asō. Ae ina ua oo mai le fata ia te a’u, sa na o se fasi falaoa na totoe.” Sa manava loloa o ia. “Pe na sese lo’u ai ma inu i le faamanatuga?”
“Leai,” na fai mai ai Mama. Sa ia fusi latalata mai Anahí. “Sa ou vaai o e tilotilo i le ata laitiiti o Iesu o loo e tauaveina i au tusitusiga paia. O le a se mea sa e mafaufau i ai?”
“Sa ou mafaufau i le alofa o Iesu ia te a’u. Ma e uiga i tulaga fao i Ona aao ma vae. Ma na Ia faia mea uma mo i tatou.”
“E te le iloaina?” O le fesili lea a Mama. “O le mafuaaga lena tatou te aai ai i le falaoa ma inu le vai. Ia manatua le taulaga na faia e Iesu mo i tatou.”
“E le afaina la le telē o le falaoa?”
“Leai. O le mea e taua o ou lagona a o e manatuaina le Faaola,” o le tala lea a Mama. “Ma e ui lava sa na o sina fasi falaoa itiiti lava, ae o le alofa o Iesu mo oe e le itiiti. E alofa tele o Ia, ia te oe.”
Sa ataata Anahí. Sa ia iloa e sa‘o Mama. O le faamanatuga e mafai lava ona avea o se taimi faapitoa e manatua ai Iesu—e tusa lava pe na o sina fasi falaoa itiiti.
O ata na tusia e Jennifer Bricking