“O Le Uepisaite Leaga,” Uo, Iuni 2023, 40–41.
Mo Tamaiti Matutua
O Le Uepisaite Leaga
Sa fefe Kevin e talanoa ia Tina.
O lenei tala sa tupu i le ISA.
Sa faliu Kevin i le nofoa komepiuta. Sa ia taina soo se ki i luga o le fataki.
“Tina, e mafai ona ou taalo i le taaloga miliga?” na ia valaau atu ai.
Sa tilotilo atu Tina i totonu mai le umukuka. “Pe a uma lau meaaoga.”
Sa mapuea Kevin. Na faapefea ona ia taulai atu i meaaoga? Sa matua latalata lava o ia i le manualo mai i le isi vaega o lana taaloga komepiuta e sili ona fiafia i ai. Ma o ana meaaoga, o, meaaoga.
Sa ia matea e mafai ona ia amata loa i ai. Sa alu faasolosolo o ia i se uepisaite. Sa mautinoa lava e le foliga manaia e pei o le taaloga miliga.
Ona vaai lea o Kevin i se sootaga. Sa ia kiliki i ai. Sa ave o ia e le sootaga i se uepisaite ma ni ata o tagata e leai ni lavalava na faia.
E leaga lenei mea, sa ia mafaufau ai. E tatau ona ou aluese ai. Sa tilotilo ae Kevin i lona tau’au. E leai se tasi o vaaia mai o ia. Sa ia autilo i nisi o ata. Sa na ona ia fia iloa lava.
Sa amata ona ia lagona e Kevin pei a faafaufau. Sa vave ona ia tapunia le uepisaite. Sa taumafai o ia e toe foi i ana meaaoga. E le afaina, na mafaufau ai Kevin. Sa na o ni nai ata na ou vaai i ai. Ae sa lei aluese le lagona leaga.
Sa lagona e Kevin e tatau ona ia talanoa atu ia Tina e uiga i le uepisaite. Ae sa fefe o ia. Ae faapefea pe afai e ita o ia?
I lena po, ina ua uma le taumafataga o le afiafi, sa fesoasoani Kevin ia Tina e fufulu ipu.
“O lelei ou faalogona?” O le fesili lea a Tina.
“Ioe,” o le tala lea a Kevin.
Ae sa lei lelei o ia. Sa pei a a tagi o ia. Na toe foi mai le lagona e tatau ona ia ta’u atu ia Tina. Ae sa fefe pea Kevin.
Tama Faalelagi, faamolemole fesoasoani mai ia te a’u, sa ia tatalo le leoa ai. Sa ia lagonaina sina lelei teisi atu.
“E mafai ona ou talanoa ia te oe?” Sa fesili atu ai Kevin.
“Ioe,” sa fai atu ai Tina. “O le a le mea e te fia talanoa ai?”
Sa tilotilo atu Kevin i le foloa. Sa ia le mautinoa pe faapefea ona amata. “A o fai a’u meaaoga, sa ou tilotilo i se saite e i ai ata o tagata e leai ni lavalava. Sa na ona ou fia iloa lava. Ae o lenei ua le mafai ona galo ia te a’u le mea sa ou vaaia.”
“Ua ou fiafia ua e ta’u mai ia te a’u.” o le tala lea a tina Sa ia fusi mai Kevin. “O se mea masani le fia iloa. Ua e iloa e leaga na mea, ma e le tatau ona e tilotilo i ai. Ae o le mea lelei o lou faamaoni. O le a e maua se lagona lelei i le taimi nei ona ua e ta’u mai ia te a’u.”
“E te le o ita?” Sa fesili atu ai Kevin.
“E leai,” o le tala lea a Tina. “Ou te alofa ia te oe. Ou te fia fesoasoani ia te oe. Ma e faapena foi le Tama Faalelagi. E mafai lava ona Ia fesoasoani ia te oe e faasa’o mea uma.
Na tuua e le lagona faafaufau le manava o Kevin.
“Sa ou fefe e ta’u atu ia te oe,” o lana tala lea. “Ae sa ou maua se lagona lelei ina ua uma ona ou faia se tatalo.”
“E foliga mai na fesoasoani le Agaga Paia ia te oe ia e lototele!” Na fai atu ai Tina.
Sa lagona e Kevin le toafimalie ma le filemu ina ua ia tatalo. Ae e oo lava foi a o lei tatalo o ia, sa ia lagonaina e pei e tatau ona ia talanoa atu ia Tina.
“Ou te manatu na fesoasoani le Agaga Paia ia te a’u i le taimi atoa,” o le tala lea a Kevin. “Sa Ia ta’u mai ia te a’u e leaga ia ata. Ma sa Ia ta’u mai ia te a’u e tatau ona ou ta’u atu ia te oe le mea na tupu.
“Ou te i ai pea iinei pe a manaomia ona e talanoa e uiga i mea faapenei,” o le tala lea a Tina. “O le a ou le ita. Tatou galulue faatasi e fai se fuafuaga o le saogalemu o le komepiuta.”
Sa ataata Kevin. “E foliga mai o se manatu lelei lena.”
Ata na tusia e Laura Catrinella