Uo i le Uo

Auauna atu i Atatusi

Saunia e Sister Kristin M. Yee

Fesoasoani Lua i le Au Peresitene Aoao o le Aualofa

Kristin M. Yee

Mai se faatalanoaga ma Gretchen Picklesimer Kinney.

Sa ou tusia ni ata i lo’u olaga atoa. A o o’u laitiiti, sa ou tusiata i taimi uma. Sa fai mai lo’u tina ou te faamatala atu ia te ia le tala mo ata taitasi sa ou tusia. Sa ou faamatala atu ia te ia tala, ma sa ia tusia i lalo mo a’u.

Ata na tusia e Kristin M. Yee mai le taimi a o laitiiti o ia

Mai lava i lo’u laitiiti, sa ou manao e avea ma se tusiata. Sa ou fiafia e matamata i ata tifaga komi. Sa ou manao e avea ma se vaega o le faia o se mea faapena. Sa talitonu lo’u tina i taimi uma ia te a’u, ma sa ia fesoasoani mai ia te a’u ia ou talitonu e mafai ona ou faia.

Ina ia lelei atili i le tusiata, sa ou faataitaia soo. Sa ou volenitia mo ni mea. Sa ou tusia ni pepa lautele o i ai se savali mo gaoioiga a le nuu. Sa ou valiina faamalama o faleoloa. Sa ou valiina ni fu’a. I se tasi taimi sa ou fesoasoani ai e vali ni vaega [mo faaaliga] i se fale mo faaaliga o ata ma tala faatino.

O nei aafiaga na aoaoina ai a’u o le tusiata o se auala e mafai ona ou auauna atu ai. Sa ou maua le fiafia e faaaoga ai a’u taleni e fesoasoani ai i isi. Sa ou lagonaina le faaosofia atili aua sa ou faia se mea matagofie mo se isi tagata.

Ina ua ou matua, sa avea a’u ma se tusiata mo le Disney. Sa ou taumafaia ni mea fou ma atiina ae ni taleni ou te lei iloaina sa ia te a’u. Sa taitai ma taialaina a’u e le Tama Faalelagi i le mea e tatau ona ou i ai.

Aua le fefe e faataitai ni mea fou! E le faapea e tatau ona avea oe ma tagata sili ona lelei i se mea ina ia e fiafia i ai. Mafaufau i taleni e mafai ona e faaaogaina i le taimi nei e auauna atu ai. Pe a tatou faaaogaina a tatou taleni i le ala a le Tama Faalelagi, e fesoasoani o Ia ia tatou tuputupu ae ma atiina ae.

Ata Minoi

Faataitaiga o le gaoioiga o ata komi

Fai lau oe lava ata! E te iloa loa le faiga, e mafai foi ona e aoao atu se isi tagata.

O le a e manaomia:

• Se fasipepa

• Seleulu

• O se peni po o se penitala

1. Oti se fasipepa mai le pepa ma gaugau i le afa.

2. Tatala le pepa na gaugau. Tusi se ata i le afa pito i lalo. E mafai ona tusi ai se manu, se tagata, po o soo se mea e te manao ai!

3. Gagau i lalo le pepa. Kopi lolomi lau ata muamua, ae fai ni suiga laiti e fatu ai se lomiga fou.

4. Taai i luga le pepa pito i luga ia mau faataamilo i le peni. Ona faaminoi vave lea o le peni i luga ma lalo e fesuiai i le va o ata e lua. O le a foliga mai o loo minoi lau ata!

Tala PDF

Atatusi mai faaaloaloga a Kristin M. Yee