“Tusiata ma Christian,” Uo, Iuni 2023, 30–31.
Tusiata ma Christian
Atonu e mafai ona fesoasoani Gabriel ia Christian i lenei taimi.
O lenei tala sa tupu i Pasila.
“O le a tuuina nei se lauga e Sister Almeida,” o le tala lea a le epikopo.
Sa aumai i fafo e Gabriel se fasipepa ma ni penitala. Sa fiafia o ia e tusi se ata ao ia faalogologo i lauga. Sa faapena foi lona tuafafine, o Alice.
O le taimi la lea sa tusi e Alice se leona. Sa tusia e Gabriel se tainasoa. Sa ia tuuina atu iai se ua umi ma se si’usi’u.
Ona tepa a’e lea o Gabriel i luga. Sa savali mai se tamaitiiti ia i la’ua.
“Oi leai!” sa ia musumusu atu ai ia Alice. “Lea ua sau Christian!”
O Christian e fa tausaga le matua. Sa le mafai ona tautala o ia, ma sa lei nofo filemu o ia. Sa ia savalivali solo i le falesa i le taimi o sauniga. O nisi taimi sa ia osiosi ai i luga o ata a Gabriel.
Sa nana e Gabriel ana penitala i ona tua. Na te lei manao ia Christian na te mauaina.
Sa aapa atu Christian mo penitala.
“Leai! O mea ia a a’u!” Sa musumusu atu ai Gabriel, ma faasino atu i le aiga o Christian. “Alu e nofo i lalo.”
Ae sa foliga mai e lei malamalama Christian. Sa ia taumafai lava e se’i mai penitala a Gabriel.
Ina ua uma le sauniga, sa savavali Gabriel ma Tina ma Alice i le Peraimeri.
“Aisea e mafai ai e Christian ona savalivali solo i le falesa ae e tatau ona ou filemu?” sa fesili atu ai Gabriel ia Tina.
“E ese le auala e mafaufau ai Christian,” o le tala lea a Tina. “O le savali solo e fesoasoani ia te ia e lagona ai le filemu ma le toafimalie.”
“Ae e faalavelave o ia ia i ma’ua i taimi uma,” o le tala lea a Gabriel.
Sa faauu Alice. “E na o lona fia tusi ata lava.”
“Ae na te le iloa fai!”
“Atonu e mafai ona ta fesoasoani ia te ia,” o le tala lea a Alice.
O le Aso Sa na sosoo ai, sa nofo ai Gabriel i autafa o Alice i le taimi o le sauniga faamanatuga. Ina ua uma ona pasi le falaoa ma le vai, sa ia toso mai i fafo ana penitala ma pepa e tusi ai se ata. Ona ia vaaia lea o Christian o savali agai atu ia i latou.
Sa amata ona nana e Gabriel ana penitala, ae sa toe taofi. Na i ai se ataata lapoa i foliga o Christian. Sa manatua e Grabriel le tala a Alice. Atonu e mafai ona ia fesoasoani ia Christian e tusi i le taimi lea!
Sa toe ata atu Gabriel ia Christian. Sa ia soso atu ina ia mafai e Christian ona saofai i le va o ia ma Alice. Sa tuuina atu e Gabriel ia Christian se penitala ma se pepa. Sa fesoasoani Alice ia Christian e uu le penitala. Sa la tusia faatasi se ata o le tagata laau.
Na ata Christian ma patipati ona lima. Sa foliga fiafia o ia. Sa fiafia foi Gabriel. O le taimi lea na fesoasoani ai Gabriel ia Christian e uu le penitala. Sa latou tusia faatasi se maile. Sa ata Gabriel. O le tusi ata ma Christian o se mea malie.
Ina ua uma le sauniga, sa i ai ia Christian se faaputuga ata atoa. Sa ia fusi mau ata ma tusi atu i le nofoa o lona aiga. Sa toe taitai atu e Gabriel ma Alice ia Christian i lona aiga. Sa faaali atu e Christian ia ata i lona tina ma se ataata tele.
Sa fiafia Gabriel sa mafai ona la tusiata ma Christian. Ma sa fiafia o ia sa i ai se tuafafine sa avea ma se faataitaiga lelei.
O ata na tusia e Josh Talbot