“E Lē Fea!” Uo, Iuni 2023, 20– 21.
E Lē Fea!
Aisea na fesoasoani ai na o Efaraima?
O lenei tala sa tupu i Nigeria.
Sa tamoe Efaraima i le vave na ia mafaia. Sa tatavale lona fatu. O laa taitasi na auina atu ai ao pefu i le ea. Sa aapa atu lona lima. Sa matuai latalata o ia!
“Ua e pe!” Na fai atu ai Efaraima a o ia pa’i atu i lona uso, o Uchenna, i le ogalima.
“Efaraima! Uchenna!” Sa valaau mai ai Tina mai le fale. “Taimi o le o mai i totonu. O loo i ai pea le tele o a tatou galuega e fai.”
“Ioe, Tina,” o le tala lea a Efaraima. Sa la o atu ma Uchenna i totonu.
O le asō o le aso fanau lea o lo la tuafafine laitiiti o Ioana. O le a i ai ni malo faaaloalogia mo lana taumafataga o le afiafi o le aso fanau. Ma na tele naua mea e fai.
Sa fesoasoani Efaraima ia Tina e fai le keke o le aso fanau o Ioana. Na fiafia o ia e fesoasoani ia Tina e kuka. Aemaise lava pe a latou faia se keke.
Sa tilotilo atu Efaraima i lona uso ma lona tuafafine. Sa galue malosi Uchenna e faamama le fale. Ae sa lei fesoasoani faatasi lava Ioana. Sa na ona ia faitauina o se tusi.
“Aisea e le o fesoasoani ai Ioana?” Sa fesili atu ai Efaraima a o ia saeu le paluga keke.
“O lona aso fanau lenei,” o le tala lea a Mama. “O le a tatou faia uma ana galuega mo ia.”
“Ae e le fea! O le a le fesoasoani mai Ioana ia te a’u pe ana faapea o lo’u aso fanau lea.” Sa lagona e Efaraima sina ita laitiiti. Sa ia saeu faavave le pesini, ma sa pisipisi i ona foliga ia le paluga.
Ona ataata lea o Efaraima. Sa iai sona manatu. O le a ia faia faatautoina Ioana e fesoasoani ia te ia i lona aso fanau. Afai e le tauto mai, o le a le fesoasoani Efaraima i le aso! Ona fea ai lea.
Sa ia ta’u atu ia Tina e uiga i lana fuafuaga. Ae sa lei foliga fiafia tele o ia i ai.
“Manatua e mafaufau i mea e faia e Iesu,” o lana tala lea.
Sa mafaufau Efaraima e uiga ia Iesu. Sa fesoasoani Iesu i isi, ae Na te lei toe ole atu mo se mea e toe fai mai. Sa iloa e Efaraima e finagalo Iesu ia te ia e auauna atu i isi, e pei ona sa Ia faia.
“Ou te manatu e finagalo Iesu ou te fesoasoani ia Ioana e aunoa ma le faia o lana tautoga ia te a’u i soo se mea,” o le tala lea a Efaraima.
“O lo’u manatu foi lena,” sa fai mai ai Tina. Sa fesoasoani o ia ia Efaraima e sasaa le keke i totonu o le apa.
Sa tuu e Tina le keke i totonu o le ogaumu. Ona fesoasoani lea o Efaraima ia Tina e fai ni pai aano o manufasi mo le taumafataga o le afiafi. Sa fiafia o ia o le a ia maua se pai.
Na vaai Efaraima ua le o toe faamamaina e Uchenna [le fale]. Sa la taaalo i se taaloga ma Ioana.
Sa toe lagona e Efaraima le ita. Aisea ua na o ia ai la e fesoasoani? Atonu e tatau ona ia maua ni fasi pai se lua o le pai aano o manufasi. Ma e le tatau ona maua e Ioana ma Uchenna ni pai! Sa na o se mea e fea lena.
Ae sa toe mafaufau Efaraima ia Iesu. E finagalo Iesu ia tofu i tatou uma ma se fasi vaega, sa ia mafaufau ai.
Sa fesoasoani Efaraima ia Tina e faauma le taumafataga o le afiafi. Sa fesoasoani foi o ia e seti le laulau e aunoa ma le tau faatonuina. Sa ia lagonaina le fiafia sili atu. Sa ia iloa sa ta’u atu e le Agaga Paia ia te ia ua ia faia le filifiliga sa’o.
Ina ua latou saofafai uma i lalo e aai, sa latou usuina se pese o le aso fanau ia Ioana. Sa pese leotele Efaraima i le mea sa ia mafaia.
Sa tipi e Tina le pai manufasi, ma sa vave ona aapa atu Efaraima e aumai se pai. Ae sa ia toe faatali.
“E mafai ona e avea le fasi pai muamua,” na ia fai atu ai ia Ioana. “Manuia le Aso Fanau!”
O ata na tusia e Corey Egbert