“O Le Filifiliga Siva,” Uo, Iuni 2023, 10–11.
O Le Filifiliga Siva
Sa sili atu le lelei o lagona o Maddie a o ia matamata atu i le siva a tamaiti o lana vasega.
O lenei tala sa tupu i le ISA.
Sa tuu e Maddie ona seevae siva i totonu o lana ato. Faatoa uma le vasega siva, ma ua oo i le taimi o le taumafataga o le aoauli. Sa ia feiloai i lana uo o Ashlynn i le faitotoa.
“O le a sou manatu i lena pese fou?” Sa fesili atu ai Maddie a o la savavali atu i le potu ‘ai. O le a sisiva le latou vasega i se pese fou mo le latou faaaliga faaiu o le tausaga, i luma o o latou aiga uma.
“E le afaina, ou te matea,” o le tala lea a Ashlynn.
“O nisi o upu sa foliga mai e ese lava,” o le tala lea a Maddie. “Ou te le fiafia tele i ai.”
Sa manatu Maddie o le a maasiasi o ia pe afai e matamata ona matua ma lona uso laitiiti i lana siva i musika faapena.
Sa faamimigi tauau o Ashlynn. “E fiafia tele i ai lo’u tuagane. Na te taina soo.”
“Oi.” Sa tilotilo i lalo Maddie.
O le aso atoa na tata ai le pese i le ulu o Maddie. Sa le fiafia o ia i le lagona na oo i ai o ia. Ae sa manatu Ashlynn e le leaga. Atonu sa lelei.
Sa manatua e Maddie se lesona o le afiafi faaleaiga sa faia e lona aiga e uiga i musika. Fai mai Tina o musika lelei e mafai ona fesoasoani i tagata e lagona ai le Agaga Paia. Ma o musika e i ai upu leaga e mafai ona faafaigata ai mo i latou ona lagonaina le Agaga. Atonu sa ta’u atu e le Agaga Paia ia te ia e le lelei le pese.
Sa faauu o ia. Sa leai ni upu palauvale o le pese. Pe sa leaga pea?
Ina ua taunuu Maddie i le fale, sa ia ta’u atu ia Tina e uiga i le pese.
“E mafai ona e tilotilo i upu ma vaai po o le a sou manatu?” O le fesili lea a Maddie.
Sa la mauaina faatasi upu o le pese i luga o le initoneti. Sa tilotilo atu Maddie i foliga o Tina a o ia faitau.
Na faauu tina. “E mafai ona ou malamalama i le mafuaaga e te le fiafia ai,” o lana tala lea. “E leai ni upu palauvale, ae ou te manatu e le o se pese lelei mo le vasega fa e sisiva ai. O le a ou fesili i lou faiaoga siva e uiga i ai taeao.
O le aso na sosoo ai, na talanoa atu ai Tina i lona faiaoga, o Mrs. Slater, i le aoga. Sa popole Maddie nei le fiafia Mrs. Slater, ae sa lei ita o ia! Sa ia fai mai sa malamalama o ia i le mafuaaga na le fiafia ai Tina i le pese. Ae sa ia fai mai ua tuai tele ona sui le musika.
“E le tau siva fua Maddie i le pese,” o le tala lea a Mrs. Slater. “E mafai ona ia le auai i le siva lena.”
O le nofo ai i fafo na o ia lava sa foliga taufaafefe. Sa tonu ia Maddie e fai atu ia Ashylnn e nonofo faatasi ma ia. Sa fai atu Ashlynn ioe!.
Ina ua oo mai le aso o le siva, sa feiloai Maddie ma Ashlynn i le potu tele.
“Ua ou fiafia o le a e nofo faatasi ma a’u!” Sa fai atu ai Maddie ma se ataata.
Ae sa lei toe ataata atu Ashlynn. “O le a ou le nofo lava i fafo,” o lana tala lea, ma fetuunai lona sakete. “O le a ou siva ma isi tagata uma.”
Sa lagona e Maddie le pei e faafaufau. Sa lei manao o ia e nofo na o ia. Ae sa lei lelei pea ona lagona e uiga i le pese.
Sa laina faatasi Maddie ma isi ma sisiva i le pese muamua. Ona oo lea i le taimi mo le isi pese.
Sa tau tatavale lona fatu. Sa ia faia se tatalo puupuu i lona loto. Ona ia manava loloa lea, savali atu i autafa o le tulaga, ma nofo i lalo.
O le taimi lava na aluese ai o ia mai le tulaga, sa lagona e Maddie se lagona lelei atu. Sa ia matamata i le siva a tamaiti o lana vasega. Ina ua uma, sa patipati o ia. Sa ou lagonaina le fiafia ma le filemu.
Sa ataata Maddie. Sa taufaafefe le nofo na o ia i fafo, ae sa ia lagona le fiafia ona sa ia faalogo i le Agaga Paia.
Ata na tusia e Susana Gurrea