iTaviqaravi Eso ni Lako Mai, Mo Muri Au

Me baleta na lotu vakamatavuvale, vuli ivolanikalou se ka ni lasa ga!

Muria na iLiuliu

Droini mai vei Katy Dockrill

Baleta na Cakacaka 1–5

iTalanoa: Ni sa mate o Jisu, a kacivi o Pita me iliuliu ni Lotu ni Turaga. O rawa ni wilika na italanoa oqo ena tabana e 46 se ena Cakacaka 2–3.

Sere: “Me da Dina” (iVolanisere ni Gonelalai, 81).

iTaviqaravi: Digitaka e dua me iliuliu. Me cakava na iliuliu e dua na ka (me vaka na kiso ena dua na yava se cowiri). Me ra qai vakatotomuria na kena vo. Ni sa veisautaka na iliuliu na ka e caka, me ra qai vakatotomuria na kena vo na ka vou. Me ra veivukevuke ena iliuliu me yacova ni ra sa vakaitavi kece na tamata.

Savasava Tale

Baleta na Cakacaka 6–9

iTalanoa: A saga e dua na turaga na yacana o Saula me vakarusa na Lotu i Jisu Karisito. Sa qai veivutuni ka veisautaka na nona bula. A yaco o koya me dua na daukaulotu ka vakavulici ira na tamata baleti Jisu Karisito. A qai kilai me o Paula. (Raica na Cakacaka 9:1–20.)

Sere: “Sa Bula na Kalou” (iVolanisere ni Gonelalai, 5)

iTaviqaravi: Taura eso na qele e ligamu. Na cava na nomu nanuma ni sa duka na ligamu? Tarava, savata na ligamu ena sovu kei na wai. Na savata na ligada sa vaka na veivutuni. Ena vuku i Jisu, sa rawa ni da veivutuni ka savasava tale ni oti noda ivalavala ca.

Bolebole ni Daukaulotu

Baleta na Cakacaka 10–15

iTalanoa: Erau a daukaulotu o Panapasa kei Paula (raica na Cakacaka 13:2–4). Rau a vakavulici ira na tamata me baleta na iVakabula. O ira na daukaulotu nikua era vakatavulici ira na tamata me baleti Koya talega.

Sere: “Tukuni Jisu Mai Vei Au” (iVolanisere ni Gonelalai, 36)

iTaviqaravi: Digia e dua na bolebole mai na draunipepa 38–39 me caka vata, me vaka na veiqaravi vua e dua na wekamu. E rawa vakacava me’u daukaulotu ena gauna oqo?

E Dua na Kemu iYaloyalo

Baleta na Cakacaka 16–21

iTalanoa: E vakavulica o Paula na iApositolo ni da sa luvena kece na Kalou (raica na Cakacaka 17:28–29). Na Tamada Vakalomalagi e lomani ira taucoko na Luvena. Sa solia vei keda yadua na isolisoli kei na taledi duidui eso.

Sere: “Au Luve ni Kalou” (iVolanisere ni Gonelalai, 2–3)

iTaviqaravi: Droinitaka e dua na kemu iyaloyalo. E cake, vola kina “Au Luve ni Kalou.” Ena loma ni yaloyalo, vola se droinitaka na veika o vinakata mo cakava. O rawa ni vakayagataka vakacava na nomu taledi mo vukei ira kina na tani?

Lako ki na tabana e 49 me baleta na itaviqaravi ni Lako Mai, Mo Muri Au me baleti ira na gone sobu.