“iTalanoa Eso ni Papitaiso,” iTokani, Julai 2023, 30–31.
iTalanoa Eso ni Papitaiso
“Na ivuvu e dua na tamata ka imatai me cakava e dua na ka” a kaya o Na.
Na italanoa oqo a yaco e Amerika.
A veimoiyaki ka qoroya o Meri na nona isulu vulavula ena iloilo. Na ivinivo vata ga a daramaka o tinana ena nona papitaiso. A vakavinakataka o Bubu Vakarua Marluce me rauti Meri. Ia oqo sa rawa ni daramaka o Meri ena nona papitaiso!
“O sa rairai totoka!” A taura na ligai Meri o Na ka cowiritaki koya tale.
A sosokiki yani o Meri. “E rawa beka niu taura tu ena siga taucoko?“
“Me maroroi tu mo qai daramaka ena nomu papitaiso me rawa ni toka dei ka savasava, se vaevei? A kaya o Na.
“Donu.” Ena papitaiso o Meri ni sa yabaki walu, ka sa vakavakarau tiko mai ena dua na gauna balavu. A gole tiko ki na Lalai, wili ivolanikalou, ka gole sara ki na nodra papitaiso na nona itokani. Ia e vaka me se yawa sara toka nona siganisucu!
A dabe raviti Na toka o Meri ena idabedabe. “I Na, o yabaki vica ena gauna o a papitaiso kina?”
“Au a yabaki 16.”
“Sa dina! Cava na vuna o wawa tu kina vakabalavu?”
A mokoti Meri vakaukauwa o Na. “Baleta niu sega ni kila tu na Lotu vakalesui mai i Jisu Karisito me yacova na gauna oya. Ia au sa tekivu gole ki na itaviqaravi ni Lotu kei ira eso na itokani. Na levu ga ni noqu vulica, na levu ni noqu via papitaiso!”
“Cava na vuna?” A taroga o Meri.
Baleta niu vinakata me dua na noqu matavuvale tawamudu.” A dusia o Tinaqu na iyaloyalo ni valetabu e lili toka e uludrau. “Au a vulica ni dua na siga au na rawa ni vauci tawamudu tu ki na noqu matavuvale ena valetabu. Sa noqu tatadra tu na matavuvale tawamudu . Ka sa imatai ni kalawa na papitaiso! Sa yaco tu me dina na noqu tatadra.”
A matadredredre o Meri. “Sa tiko vei iko o Ta, Mallory, kei na gonelailai o Maeva! O au sara talega.”
“Io, e dina sara. Kei Bubu Angela.”
“A papitaisotaki li vata kei iko o Bubu?”
“A wawa tu o koya me vica na yabaki. Ia ena veigauna keirau lako volekati ira kina na valetabu, keirau dau via cegu ka vakadigovi iira.”
A vakasamataki Na kei Bubu o Meri ni rau digova tu na valetabu. “ Ia vakacava o Ta? A yabaki vica o koya ena gauna a papitaiso kina?”
“E a yabaki 11.”
“Ka a vakaitikotiko tu kina e Brazil?”
“Donu qori” a kaya o Na. “Era tiko na tamata e vuravura taucoko ka vulica tu na veika e baleti Jisu kei na papitaiso. E levu vei ira e ivuvu.”
“iVuvu?”
”Na ivuvu e dua ka imatai me cakava e dua na ka,” a vakamacalataka o Na.
A vakasamataka tu o Meri. “Me vaka na nomu a imatai ni tamata ena nomu matavuvale me papitaiso?”
A deguvacu o Na ka matadredredre.
Ena gauna vata oya, a curu yani o Ta ki na rumu ka daberaki koya ena idabedabe dakoba.
“Ta, o iko beka e dua na ivuvu ena nomu matavuvale?”
“Vaka kina. Niu sa papitaiso oti, au qai kila ni sa lewe oti tu ni nodatou lotu o Bubu Rosimere! Ia a sega ni lako tu ena vica vata na yabaki.”
“E dina? “E vakacava?”
“Au sa tekivu lako ki lotu. Ratou sa qai tekivu lako talega na tuakaqu, kei Bubu Rosimere talega. A lewena sara talega o Bubu Vakarua Marluce!”
A raitayaloyalotaki Tamana o Meri ni lako tu vakaikoya ki lotu, ka kauta tiko mai vata kei koya e levu na nona matavuvale.
“Isa,” a kaya o Meri. “Au sa taleitaka ni rogoca na nomu italanoa. Era sa vakauqeti au vakalevu cake meu papitaiso.”
“Vinaka vakalevu na vakatarogi keirau tiko, Meri,” a kaya o Ta. “E rawa li oqo ni keirau taroga e dua vei iko?”
A deguvacu o Meri. Na cava beka erau na taroga?
“Cava na vuna o via papitaiso kina?”
A vakasamataka o Meri na ka sa vulica mai na ivolanikalou kei na veika a vakila tu e valenilotu. “Baleta niu sa via muri Jisu ka tiko tawamudu vata kei na noqu matavuvale.”
E rau matadredredre o Na kei Ta, ka mokoti rau matua na nona itubutubu o Meri. “Au sa sega ni rawa ni wawa!”
Droini mai vei Tammie Lyon