“Na Sasamaki ena Were,” iTokani, Julai 2023, 4–5.
Na Sasamaki ena Were
“O cei e rawa ni da sureta me veivuke vata kei keda?”
Na italanoa oqo a yaco e Igiladi.
A kania o Jona na iotioti ni kena kakana ka matadredredre. E dau lasa vakalevu cake na vakayakavi ni rau tiko kina na daukaulotu.
“Keirau via wasea vei kemuni e dua na itukutuku me baleta na veiqaravi,” e kaya o Sister Kearl. ”Na cava e bibi kina na qaravi ira na tani?”
“Baleta ni dau marau o Jisu!” e kaya o Eliza, na ganei Jona lailai.
“O dina. E vakamarautaki Koya sara ga. Ni da vukei ira na tani, ena vakamarautaki keda talega,” e kaya o Sister Christensen. “O kila beka e dua e gadreva tu na veivuke?”
A vakasama vakalailai o Jona. “Au sega ni vakasamataka rawa e dua na tamata, ia na neitou iteitei e koronivuli e gadreva na veivuke.”
“Vakasama vinaka,” e kaya o Tinaqu.
E tiko ena koronivuli nei Jona e dua na iteitei mera rawa ni cakacaka kina e tautuba. Ia e sega ni dua e bau samaka ena dua na gauna balavu. Sa tubua vakalevu na co. E levu talega na co ca.
“Keirau taleitaka me keirau vukei iko kina!” a kaya o Sister Kearl. “O cei e rawa ni tou sureta me vukei kedatou kina?”
“Tavalei keirau!” a kaya o Jekope, na taci Jona.
“Kei na noda kalasi ni Lalai,” a kaya o Jona.
Ena siga ka tarava, a veivosaki o Tinaqu vua e dua e koronivuli me vakadonuya. Eratou a digitaka e dua na siga me vakasavasavataki kina na iteitei. Sa qai vukei Jona kei iratou na tacina o Tinaqu me ratou kaciva na tavalena kei na kalasi ni Lalai.
Ni oti e vica na macawa, eratou sotavi rau na daukaulotu e koronivuli o Jona kei na nona matavuvale. Era a tiko talega e kea o ira na tavaledra kei na itokani ena Lalai. Sa gauna ni cakacaka!
A daramaka o Jona e dua na pea qaniliga rapa lelevu ni were. “Raica, Tinaqu. Sa kalevu sara na ligaqu!”
E dredre o tinaqu. “E rawa ni o vakayagataka na liga levu oqori me vukea na koti ni veikau oqo.”
A solia vei Jona eso na kilipa e vaka na ikoti tuwawa. A qai vukei koya me kotiva laivi na veitabana mate.
“E ka marautaki oqo,” a kaya o Jona.
Ni kotikoti o Jona, a veivuke o Eliza me kelikeli wavokita na were. A vukei Ta o Jekope me tara e dua na vale ni manumanu vuka vou. O ira na kena vo era cavu co ca ka kumuna vata na kau. Era biuti ira ena kato palasitika karakarawa levu. Na taci Jona gone duadua mada ga, o Ezra, a veivuke ena nona tomi vatu.
Sega ni dede sa savasava na were. A wilika o Jona na taga eratou a vakasinaita. “E 13 na kato!” e kaya o koya. “Eda sa samaka e levu sara na benu.”
A dredre sara o Sister Christensen. “Ia oqo eda sa gadreva na noda masela lelevu me vukea noda kauta oqo ki na motoka.”
Eratou a taura e yadua na taga o Jona, Jekope, kei Eliza. A marau o Jona ni laveta cake na kena iotioti ki na motoka. Sa dua na ka marautaki na nodra vukei na daukaulotu. E vinakata o koya me na daukaulotu ena dua na siga. Me yacova na gauna oya, e vuqa sara na sala e rawa ni veiqaravi kina. E sega ni rawa ni wawa me vakasamataka na nona cakacaka e tarava!
Droini mai vei Samara Hardy