“Yaloqaqa e Vu mai na Yalo Tabu,” iTokani, Julai 2023, 29.
Volai mai vei iKo
Yaloqaqa e Vu mai na Yalo Tabu.
Droini mai vei Toby Newsome
Niu a se gone lailai, era tukuna na vuniwai vei rau na noqu itubutubu ni tauvi au na galugalu digidigi. Oqori e dua na ituvaki nuiqawaqawa ka dau dredre kina na vosa vei ira na tani. Au rawa ga ni vosa vei ira na lewe ni noqu matavuvale voleka.
Au sa maqusa ena veigauna kece, vakabibi ke dua e vosa mai vei au. Na masumasu e dau vakavinakataki au ka vakalomavinakataki au. Au a raica talega e dua na daunivakasala e koronivuli meu vukei. Ia au vakila niu sega ni vinaka cake sara. Sa voleka sara meu sa soro, ia au sa vakabauta tikoga.
Sa yaco mai na ikawalu ni noqu siganisucu. Rau a bolei au na noqu itubutubu meu wilika na iVola i Momani ka masu me vukei au ni navuca se meu papitaiso se sega. Ena veibogi au a masu meu taroga kevaka e dodonu meu papitaiso. E dua ga na kena isau au dau ciqoma—e dua na vakanananu malumu e yaloqu. Au kila ni sa tukuna tiko vei au na Yalo Tabu ni sa digidigi donu na papitaiso.
Ena gauna a soli kina vei au na isolisoli ni Yalo Tabu ni oti noqu papitaiso, au a rogoca na vosa ni inuinui, loloma, kei na veivakayaloqaqataki. Au kila ni na vakacegui au na Yalo Tabu ka vakayaloqaqataki au.
Au sa tovolea ni vosa kivua na noqu itokani vinaka duadua, o Charlie. Au a tovolea ena macawa taucoko, ia sa rui dredre. Ia ena dua na siga keirau a tiko taurua kei Charlie ena were ni koronivuli. Au a cavuta e dua na masu lo e uluqu. Tamaqu Vakalomalagi, yalovinaka ni vukei au meu tukuna e dua mada ga na vosa.
Au sa qai tadolava na gusuqu ka kaya, “I, Charlie!” E a kurabui saraga o koya.” Au a marau dina!
Ni oti na siga oya, sa rawarawa sara me vakacavari e levu na lalawaka. Sega ni dede au sa vosa tiko vei ira na tamata kecega! Au vakavinavinakataka na Yalo Tabu ni vakayaloqaqataki au meu vosa vei Charlie.