“A Tekivu ena dua na Lomanibai ni Tavipolo,” iTokani, Julai 2023, 32.
iTokani ki na iTokani
A Tekivu ena dua na Lomanibai ni Tavipolo
Mai na veivakatarogi kei Lucy Stevenson Ewell.
Droini mai vei Brian Michael Weaver
Niu sa yabaki 13, au a qito ena dua na timi ni veitavipolo kei na so na itokani. Au a sega tu ni lewe ni Lotu i Jisu Karisito ni Yalododonu Edaidai, ia e rua na noqu lewe ni timi sa lewenilotu. Erau drua. Na yacadrau o Rob kei Lane.
Ena dua na siga ni tereni rau a sureti au meu tiko ena nodratou lotu vakamatavuvale. Au sega ni kila se cava na lotu vakamatavuvale, kau mani vakataroga. Rau tukuna vei au ni keitou na vulica na ka eso baleta na lotu ka laga sere. Au a sega sara ni maleleta tu. Ia rau sa yalataka ni na tiko na vakalomavinaka, au mani navuca tu meu lako.
Keitou a lako vakamatavuvale ki na nodratou itikotiko ena lotu vakamatavuvale. Au a vakila saraga e duatani na ka. Au sega ni kila na ka oya, ia e viavia matata. Sa lomavinaka dina. A vakila talega o tinaqu.
Au sega ni kila ena gauna oya ni sa lewe ni Lotu tu o tinaqu. A papitaiso o koya ni se goneyalewa. Ia a sega vakadua ni bau lako i lotu.
Ni oti na bogi oya, sa tekivu lako tale ki lotu o tinaqu. Au a lako vata kei koya meu vulica eso tale na ka. Ni oti e vica na vula, au a papitaisotaki mai vei tamai Rob kei Lane.
Au vakavinavinaka vakalevu ni a kauwaitaki au o Rob kei Lane ni wasea na kosipeli. Nikua au sa kalougata ni dua tu na noqu matavuvale tawamudu. Ka a tekivutaki ena dua na lomanibai ni tavipolo!
Me vakataki Rob kei Lane, e dua na vurevure kaukauwa e tiko vei iko me baleti ira tale eso. O rawa ni vakayaco veisau ena nomu matavuvale. O rawa ni wasea na kosipeli vei ira na nomu itokani.