“Na Kalavo ni Vakavinakataki Ka,” iTokani, Julai 2023, 20–21.
Na Kalavo ni Vakavinakataki Ka
E kila o Josie e dua na sala e rawa ni muria kina na ivakaraitaki i Jisu Karisito.
Na italanoa oqo a yaco e Amerika.
A dabe vata o Josie kei na tavalena o Ashlyn ena ruku ni dua na vunikau ena taudaku ni nona vale.
“Au diva me dua na ka lasa e rawa ni keirau cakava me rawa ilavo,” a kaya o Josie.
“E rawa beka ni daru rawa ilavo ena nodaru cakava na veika me baleti ira na tamata,” e kaya o Ashlyn.
“Vakacava ke keirau cakava me dua na neitou kalavo?” A lade cake ena maqusa o Josie. “Me vaka e dua na kalavo ni mei manumanu se dua na kalavo ni taubaletaki koli.”
“E rawa ni da cakava na veimataqali ka kecega,” a kaya o Ashlyn. “Era gadreva tu ga na tamata na veivuke. Ka ra na saumi keda.”
E dina o Ashlyn. Ena veisiga e dau raici ira na tamata era gadreva tu na veivuke o Josie.
Vakasauri ea dua tale na vakasama nei Josie. A vakila na reki e lomana. A vakananuma vua na nona papitaiso ena yabaki sa oti. E yalataka o koya ni na dau nanumi Jisu tikoga ka muria na Nona ivakaraitaki. E kila o koya e dua na sala e rawa ni cakava kina oya.
“Vakacava kevaka e tiko e dua na noda kalavo me vukei ira na tamata ka sega ni saumi?” A taroga o Josie. Sa tubu cake sara na nona vakila na yalo vinaka oya.
Sa rabailevu mai na matai Ashlyn. “Ena ka ni lasa dina oya,” e kaya o koya. “E rawa ni da vukei ira na tamata e koronivuli kei na lotu—ena veivanua kecega.”
“E rawa ni da vakatoka me Kalavo ni Vakavinakataki Ka!” A kaya o Josie. “Daru tekivu ni mataka e koronivuli.”
Ena siga ka tarava ena gauna ni vakacagicagi, erau cici yani o Ashlyn kei Josie ki na bati ni rara ni qito.
“O raica beka e dua daru rawa ni vukea?” A titeqe tu o Ashlyn ka rai yani ki na papa sukusukura drodrolagi ni vakasisisi.
“Se Bera.” A vakasaqaqara o Josie ena ikakaba kei na ililili. Era vakasisisi ka lilili na gone. Era a lade dali tiko ka qitora tiko na polo. E sega ni dua e vaka me gadreva na veivuke. Na tamata kece e vaka me dua na nodra itokani. Oti qai raica e dua na goneyalewa lailai e tiko vakataki koya kei na dali ni rika.
A taura na ligai Ashlyn o Josie. “Rai yani ki kea!”
Rau a kunea o Josie kei Ashlyn na dali ka lako yani vei goneyalewa.
“Bula. O au o Josie.”
“O au o Ashlyn. O cei na yacamu?”
A kurabui sara o goneyalewa. “O au o Leslie.”
“O via qito vata beka kei keitou?” A taura cake o Josie e dua na dali ni rika.
A matadredredre o Leslie. “Io!
Erau vakatavulica o Ashlyn kei Josie eso na sala vou me rau lade dali kina. Ni sa taqiri na lali, erau vakamoce. E vakila o Josie na vinaka ni lomana. E kila o koya ni oya na Yalo Tabu.
Ni oti oya, ni rau sa raici Leslie o Josie kei Ashlyn ena olo, erau vakabula vua.
Erau vaqara o Josie kei Ashlyn e vuqa tale na tamata me rau veivuke. Ena so na gauna erau dau tukuna na veika vinaka vei ira na tamata ka tovolea me rau vakamarautaki ira. Ena so tale na gauna erau dau sureti ira na gone me ra qito vata kei rau.
Dua na siga, a matadredredre o Josie vua e dua na gonetagane ena taudaku ni koronivuli. “Au taleitaka nomu sote dainaso,” e kaya o koya.
A matadredredre na gonetagane ka raica sobu na nona sote. “Vinaka.”
Ni dabe sobu o Josie, sa qai kila ni a sega mada ga ni vakasamataka me cakava o ya me baleta na kalavo! E se qai cakava oti ga.
A vakasamataki ira na itokani kece a cakava o Josie mai na gauna erau tekivuna kina kei Ashlyn na nodrau kalavo. E taleitaka dina o Josie na nodra vukei na tamata. E vakavuna nona vinakata me cakava eso tale na ka vinaka vei ira na tani. Na Kalavo ni Vakavinakataki Ka sa vakavinakataki koya cake. Daumaka kina na yalona.
iVakaraitaki mai vei Tania Rex