Adto sa Akong Bunyag!

Mga artwork pinaagi ni Anna Oldroyd

Paghimo og dekolor nga mga kard aron sa pagdapit sa mga tawo sa imong bunyag! Kinsay gusto nimo nga dapiton? Mahimo ka nga mag-ampo ug maminaw sa Espiritu Santo alang sa pipila ka ideya.

Magkinahanglan ka og:

Papel, mga marker, ug pintal

1. Piloa ang matag papel og katunga. Sa atubangan o sulod sa kard, pagsulat og mubo nga sulat nga magdapit sa mga tawo sa imong bunyag.

2. Idugang ang petsa, oras, ug dapit alang sa imong bunyag.

3. Ituslob ang imong tudlo sa pintal aron madugangan og mga dekorasyon! Susiha ang mga ideya niini nga pahina.

4. Ihatag ang mga kard sa imong mga higala ug pamilya!

Ganahan ko nga mopakigbahin sa akong bunyag ngadto sa mga tawo nga akong gimahal. Mao nga uban sa tabang sa akong mama, ang akong igsoon nga babaye ug ako midapit sa among mga higala ug mga klasmet sa akong bunyag. Sa adlaw sa akong bunyag, maayo gayod ang tanan. Adunay daghang tawo didto. Malipayon kaayo ako nga nabunyagan ko!

Eve O., edad 8, Fort-de-France, Martinique