“Espesyal nga Adlaw ni Giorgia,” Higala, Agosto 2023, 8–9.
Espesyal nga Adlaw ni Giorgia
“Mabunyagan na ko sa dili madugay,” miingon si Giorgia. “Sama ni Jesus!”
Kini nga istorya nahitabo sa Australia.
Si Giorgia midagan padulong sa iyang kwarto uban ni Matilda nga nagsunod. Kanunay nga makalingaw ang adlaw kon moanha ang iyang higala aron magdula.
“Pwede ba kitang magdula sa imong robot?” Nangutana si Matilda.
“Oo!” Miingon si Giorgia. Usa kini sa iyang paborito nga buhaton.
Samtang gipagawas ni Giorgia ang robot, si Matilda mitan-aw sa mga hulagway sa bungbong ni Giorgia. Iyang gitudlo ang hulagway sa tunga.
“Unsa na siya?” nangutana siya.
“Kana si Jesukristo nga gibunyagan,” miingon si Giorgia. “Ug mabunyagan na ko sa dili madugay. Sama Niya!”
“Nganong bunyagan man ka?” Nangutana si Matilda.
“Tungod kay ganahan ko nga mosunod ni Jesus,” miingon si Giorgia. “Kon ako mabunyagan, kana ang akong isaad nga buhaton!”
Dayon si Georgia adunay ideya. “Ganahan ka ba nga motambong sa akong bunyag?”
“Akong pangutan-on si Mama kon pwede ba,” miingon si Matilda.
Ang adlaw sa bunyag ni Giorgia nagkaduol na. Nagbasa siya sa iyang basahon sa istorya sa kasulatan ug mitambong sa Primary kada semana. Human niya malitok ang iyang mga pag-ampo sa dili pa matulog, iyang gitan-aw ang hulagway ni Jesus. Ganahan siya nga maghunahuna kon unsa kaha ang bation kon mabunyagan.
Sa Dominggo sa wala pa ang iyang bunyag, si Giorgia adunay interbiyo alang sa bunyag. Siya ug ang iyang mga ginikanan nakig-istorya sa bishop sa iyang opisina. Siya nangutana niya og pipila ka pangutana aron sa pagtabang nga masiguro nga andam na siya nga mabunyagan.
“Nagtuo ka ba nga si Jesukristo mao ang anak sa Dios?” nangutana siya.
Nagtuo siya! “Oo,” miingon siya.
Mipahiyom ang bishop kaniya. “Ang bunyag mahinungdanon kaayo nga pagpili. Gusto ka bang mabunyagan?”
Si Giorgia naghunahuna kon unsa kadako ang iyang paghigugma ni Jesus ug gusto nga mosunod Niya. “Oo!” miingon siya.
Sa kataposan miabot na ang espesyal nga adlaw ni Giorgia. Samtang siya mitunob ngadto sa tubig, iyang nakita ang iyang mga higala ug pamilya nga nagtan-aw. Naa usab si Matilda!
Sa dihang ang iyang Papa misulti sa pag-ampo sa bunyag, ang mga pulong mihimo ni Giorgia nga mobati nga malinawon ug malipayon. Dayon siya mainampingon nga mituslob kaniya sa ilalom sa tubig ug mihaw-as pag-usab. Sa dihang siya mihaw-as, mibati siya og kalipay ug kalimpyo.
Si Papa migakos og maayo niya. Si Mama naghulat niya sa ibabaw sa mga ang-ang nga adunay tuwalya ug pahiyom.
Si Giorgia mibati og kainit sa sulod. Espesyal kadtong adlawa. Siya mipili nga mosunod ni Jesus. Ug ganahan siya nga magpadayon sa pagsunod Niya kada adlaw!
Mga paghulagway pinaagi ni Shana Keegan