“Ang Nabuak nga Botelya sa Tubig,” Higala, Agosto 2023, pahina–pahina.
Ang Nabuak nga Botelya sa Tubig
Giuhaw si Kadie. Unsaon kaha sa pagtabang ni Sophia?
Kini nga istorya nahitabo sa Sierra Leone.
Gipaminaw og maayo ni Sophia ang iyang titser samtang mipasabot sa problema sa matematika diha sa pisara.
“Ah, unsa ang siyam ihapon og kaupat?” nangutana ang titser.
Miisa si Sophia sa iyang kamot. “Traynta y sais!” miingon siya.
Mipahiyom ang iyang magtutudlo. “Sakto kana, Sophia!”
Human sa klase, oras na para mopauli. Milakaw si Sophia kauban sa iyang mga higala. Tanan sila mikuha sa ilang mga botelya sa tubig aron imnon ang kataposang tubig. Init kaayo karong adlawa!
Apan dunay nakita si Sophia nga lahi. Ang iyang higala nga si Kadie wala mag-inom og tubig. Naglakaw lang siya nga nag-inusara.
“Kadie, asa ang imong botelya sa tubig?” Nangutana si Sophia. Ang tanan uhawon kanunay kon hapit na mahuman ang klase.
“Akong nabuak kagahapon, ug wala koy ikapuli,” mingon si Kadie. “Mao nga karon wala koy madala nga tubig sa eskwelahan.”
Gitan-aw ni Sophia anga kaugalingon niyang botelya sa tubig. Nanghinaot siya nga unta makapaambit siya! Apan nahurot na ang iyang tubig.
Sa tibuok adlaw, naghunahuna si Sophia kang Kadie ug sa iyang nabuak nga botelya sa tubig. Dili sayon ang pagkuha og limpyong tubig sa dapit nga ilang gipuy-an. Kadaghanan sa mga bata usa ra ka botelya sa tubig ang gamiton sa tibuok tuig. Ila kining sudlan og limpyong tubig gikan sa dako nga galon diha sa balay. Magkasakit ka kon moinom og lahi nga tubig. Kon si Kadie walay botelya para sa tubig, dili siya makadala og tubig gikan sa balay nga mainom sa eskwelahan.
Pagkasunod buntag, naghunahuna si Sophia unsaon niya sa pagtabang si Kadie. Ang pamilya ni Sophia dunay pipila ka puno sa tubig nga botelyang plastik. Gidugangan ni Sophia og usa diha sa iyang backpack, kauban sa iyang metal nga botelya. Mas mibug-at kini og gamay sa bag, apan wala niya kini hunahunaa.
Pag-abot niya sa eskwelahan, nakit-an niya si Kadie.
“Kadie, nakakuha ka na ba og bag-ong botelya sa tubig?” Nangutana si Sophia.
Milingo-lingo si Kadie nga nagtan-aw sa ubos.
“OK ra na,” miingon si Sophia. “Duna koy usa para nimo!”
Gihatag niya kang Kadie ang botelya sa tubig. Mipahiyom si Kadie.
“Salamat, Sophia!” Gigakos og hugot ni Kadie ang iyang higala.
Atol sa klase, miinom si Kadie gikan sa iyang botelya sa tubig uban sa ubang mga bata. Nalipay si Sophia nga nakakita sa iyang higala nga dili na uhawon.
Matag adlaw niana nga semana, si Sophia magdala og ekstra nga botelya sa tubig alang sa iyang higala. Dayon usa ka buntag, gipunit sa mama ni Sophia ang iyang backpack.
“Hmm,” miingon si Mama. “Mas bug-at kini kay sa kasagaran.” Giablihan niya ang backpack ug gikuha ang ekstra nga botelya sa tubig.
“Gituyo ba nimo pagbutang og ekstra nga botelya sa tubig para sa eskwelahan, Sophia?” Nangutana si Mama.
Mitando si Sophia. “Ang botelya sa tubig ni Kadie nabuak, ug dili na siya makakuha og lain. Mao nga wala siyay tubig sa eskwelahan.”
“Kanus-a ka nagsugod sa pagdala og ekstra nga tubig para niya?” Nangutana si Mama.
“Karong semanaha lang,” miingon si Sophia. “Dili ko ganahan nga mauhaw si Kadie.”
Mipahiyom si Mama. “Kabuotan nimo nga maghunahuna para sa imong higala. Butang kana nga buhaton usab ni Jesus. Nalipay kong nakakita nimo nga parehas ka ni Jesus.” Gigakos niya si Sophia. “Ug tingali duna koy laing paagi nga kita makatabang.”
Si Mama mihatag ni Sophia og usa ka metal nga botelya sa tubig. “Kini ang ihatag sa imong higala aron makasigi siya og gamit niini. Niana nga paagi dili na ka magdugang pa og usa ka plastik matag adlaw.”
“Mao ba?” Nangutana si Sophia.
Mitando si Mama. “Oo. Hangyoa lang siya nga ampingan kini.”
Gidala ni Sophia ang botelya sa tubig ngadto sa eskwelahan. Ang una niyang gibuhat mao ang paghatag ngadto kang Kadie sa botelya.
“Wow,” miingon si Kadie. “Salamat, Sophia!” Si Kadie migakos niya.
Mibati si Sophia og kainit sa sulod. Nasayod siya nga nakatabang siya sa iyang higala, sama sa buhaton ni Jesus.
Mga paghulagway pinaagi ni Melissa Kashiwagi