“Kalihokan nga Istorya sa Pamilya,” Higala, Agosto 2023, 30–31.
Kalihokan nga Istorya sa Pamilya
“Maistoryahan ba ko nimo og laing sugilanon sa pamilya?” Nangutana si Lorrain.
Kini nga sugilanon nahitabo sa Vanuatu.
Mipahiyom si Lorrain samtang gikanta niya ang kataposang mga pulong sa kanta. Bag-o lang sila nahuman sa oras sa pagpanganta sa Primary. Karon oras na sa pag-adto sa klase.
Apan una, mibarog si Sister Taleo. “Gusto kong mosulti kaninyo mahitungod sa umaabot nga kalihokan sa Primary,” miingon siya. “Gusto mi nga ang matag usa ninyo makat-on mahitungod sa inyong pamilya. Pangayo sa inyong mga ginikanan og mga sugilanon sa pamilya. Dayon unya sa kalihokan, ang matag usa ninyo makapaambit kon unsay inyong nakat-onan.”
Sa pag-abot ni Lorrain sa balay gikan sa simbahan, mahinamon siya. Nakakita siya og dakong piraso nga papel ug gidala kini sa lamesa. Dili siya makahulat nga makakat-on mahitungod sa iyang pamilya!
Gidrowingan ni Lorrain og family tree ang papel. Si Mama ug Papa mitabang niya sa pagsulat sa tanan nga ngalan. Dayon gipapitlan niya og mga litrato sa mga sakop sa iyang pamilya ang poster.
“Ang ngalan sa imong lola sa tuhod Lorrain usab,” miingon si Mama. “Ginganlan ka namo parehas sa iyang ngalan.”
“Wow,” miingon si Lorrain.
“Si Lola Lorrain mapinanggaon kaayo nga tawo.” Mipahiyom si Mama. “Kon ang ubang mga tawo sa balangay mahutdan og kahoy nga ilang ikasugnod, hatagan sila ni Lola Lorrain.”
Ang pagkat-on mahitungod sa iyang pamilya makalingaw! “Maistoryahan ba ko nimo og laing sugilanon sa pamilya?” Nangutana si Lorrain.
“Si Papa makaistorya nimo mahitungod sa unang higayon nga miadto siya sa templo,” miingon si Mama. “Sayis anyos pa lang siya. Siya og ang iyang mga ginikanan mibiyahe og layo ngadto sa templo sa New Zealand.”
Si Lorrain ganahang maminaw mahitungod sa templo. “Suginli ko sa istorya, Pa!” miingon siya.
“Una misakay mi og eroplano pag-adto sa New Zealand. Dayon misakay mi og bus. Layo kadto nga biyahe.” Si Papa mipakita og litrato sa templo kang Lorrain. “Sa kataposan ang akong mga ginikanan ug ako misulod sa templo. Naselyo kami isip pamilya. Nagpasabot nga magkauban kami sa hangtod!”
Naghimo kadto kang Lorrain nga mobati og kainit sa sulod. Nalipay siya nga makadungog og mga sugilanon mahitungod sa iyang pamilya.
Sa kataposan miabot na ang buntag alang sa kalihokan sa Primary. Si Lorrain mitabang ni Mama ug ni Sister Taleo sa pag-andam sa tanan didto sa gambalay sa simbahan.
Dayon nadungog nila ang makahinam nga balita. Usa ka templo ang tukoron sa ilang isla!
Nalipay kaayo si Lorrain. Kon igo na unya ang iyang pangidaron aron makasulod sa templo, dili na siya magbiyahe pa og layo!
Nianang gabhiona, ang tanan nga higala ni Lorrain didto sa kalihokan sa Primary. Ang mga bata nagpulipuli sa pagpaambit sa unsay ilang nakat-onan mahitungod sa ilang pamilya. Dihang turno na ni Lorrain, giisa niya pataas ang poster sa iyang family tree.
“Ganahan gyod kong makat-on mahitungod sa akong pamilya,” miingon siya. “Akong nahibaloan nga ginganlan ko og parehas sa akong lola sa tuhod. Nahibaloan pud nako ang mahitungod sa unang higayon nga miadto sa templo ang akong pamilya. Ang templo makatabang sa atong mga pamilya nga magkauban sa hangtod.” Ang mainit nga pagbati anaa na usab. “Mahinamon kaayo ko nga duna unya tay templo dinhi sa Vanuatu.”
Milingkod si Lorrain nga may dakong pahiyom sa iyang nawong. Mapasalamaton siya nga magtubo nga mas mahisama kang Jesus. Ug mapasalamaton siya sa templo! Dili siya makahulat nga makasulod niini sa moabot nga adlaw.
Mga paghulagway pinaagi ni Emily Davis