“Wala Gayod Mag-inusara,” Higala, Agosto 2023, 22–23.
Wala Gayod Mag-inusara
Unsa kaha kon si Ethan masakitan na usab nga walay bisan usa nga anaa aron motabang?
Kini nga istorya nahitabo sa USA.
Gitabyog ni Ethan ang duyan pinaagi sa iyang mga bitiis. Nagkahabog siya og maayo. Ang hangin mipabati kaniya nga mora siya og naglupad!
Dayon mibagting ang kampana. Nanghupaw si Ethan. Dili pa siya ganahang mahuman ang recess.
Naglinya ang mga bata aron mamalik sa sulod. Gipahinayan ni Ethan ang tabyog sa iyang duyan. Dayon mikanaog siya sa duyan aron mobalik sa klase.
Apan sa pagdapat sa mga tiil ni Ethan sa yuta, mibati siya og labihang kasakit sa iyang bitiis. Natumba siya sa yuta. Misulay siya og barog, apan ang iyang bitiis ingon og nahilos sa kalayo. Grabe ang kasakit!
“Tabang” Misinggit si Ethan. Mga luha miagas sa iyang mga aping. Ang mga bata ug mga titser nagdinaganay aron motabang niya.
“Unsay problema?” nangutana ang usa ka titser.
“Nabali ang akong bitiis!”
Dili kini ang unang higayon nga nabalian si Ethan og bukog. Gani dili kini ang ikaduha o ikatulong higayon! Si Ethan dunay sakit sa bukog nga dali rang mabali, hinungdan nga dali ra siyang mabalian sa bukog. Bisan sa gagmayng butang, sama sa pagtikang diha sa dalan o mabangga sa usa ka tawo, makabali na sa iyang mga bukog.
“Tawagon namo ang imong mga ginikanan aron madala ka sa doktor,” miingon ang titser. “Ang tanan ma-Ok ra.”
Nalipay si Ethan nga didto ang mga tawo aron motabang niya. Sakit gihapon kaayo ang iyang bitiis, apan nasayod siya nga luwas ra siya.
Nangadto si Papa ug Mama sa eskwelahan ug midala kang Ethan sa doktor. Gisemento ang iyang bitiis ug mipauli aron mopahulay.
Tungod sa iyang nabali nga bitiis, si Ethan naa permi sa higdaanan. Duna siyay daghang libro nga mabasa. Usahay ang iyang mga higala moadto aron makigdula kaniya. Apan gilaayan gihapon siya.
Usa ka gabii, nakamata si Ethan ug dili na makabalik og katulog. Gisulayan niya nga morelaks, apan padayon ang iyang kabalaka. Unsa kaha kon mabalian na pud ko og bukog ug walay usa nga naa didto, sama kon sa tungang gabii? Naghunahuna si Ethan. Gikulbaan siya. Mibati siya og kahadlok.
“Pa!” Misinggit si Ethan.
Midagan si Papa sa kwarto ni Ethan. “Unsay problema?”
“Nahadlok ko,” miingon si Ethan. “Unsa kaha kon mabalian ko og laing bukog ug walay usa nga motabang nako?”
Milingkod si Papa tupad niya diha sa higdaanan. “Makahadlok kana nga hunahuna,” miingon siya. “Bisan kon maningkamot kita sa pagmatngon ug malayo sa peligro, ang daotang mga butang posible gihapong mahitabo. Apan bisan unsay mahitabo, ang Langitnong Amahan nagbantay kanimo.”
“Nagpasabot ba na nga kanunay Siya nakong kauban?” Miingon si Ethan.
“Eksakto.” Malumong gigakos ni Papa si Ethan.
Naghunahuna si Ethan kon unsa ka paspas mianhi si Papa aron motabang niya. Nasayod siya nga gipangga siya ni Papa ug kanunay nga gustong motabang niya. Tingali ang Langitnong Amahan sama usab niana.
Pagkasunod adlaw, nagbasa si Ethan og usa ka kasulatan sa Higala nga magasin. Nag-ingon kini nga, “Paglipay, ug ayaw kahadlok, kay Ako ang Ginoo anaa uban kaninyo.”*
Gibati ni Ethan ang kakalma ug luwas dihang gibasa niya ang kasulatan, sama sa iyang gibati dihang nakigsulti siya ni Papa. Nasayod siya nga ang Espiritu Santo kadto nga naghupay kaniya. Sama og naggakos na usab siya ni Papa.
Tingali mabalian pa gyod ko og mas daghang mga bukog, naghunahuna si Ethan, apan dili ko kinahanglan nga mahadlok. Nasayod siya nga dili gayod siya mag-inusara.
Mga paghulagway pinaagi ni Simini Blocker