“Ang Naggilak-gilak nga Kuwintas,” Higala, Agosto 2023, 42–43.
Ang Naggilak-gilak nga Kuwintas
Si Carolina ganahan lang nga mohipos og kadyot sa kuwintas.
Kini nga istorya nahitabo sa Argentina.
Si Carolina milukso tabok sa nataran. Ang iyang higala nga si Isabella anaa sa gawas.
Si Isabella mikaway. “Dali ug magdula ta!”
Si Carolina mitabok sa nataran padulong sa balay ni Isabella.
Si Isabella mikuot sa iyang bulsa. “Aduna koy gusto nga ipakita nimo,” miingon siya. Dayon iyang gihulbot ang labing nindot nga kuwintas nga nakita ni Carolina! Ang gagmay nga mga brilyante naggilak-gilak ug hayag kaayo.
“Sa ako ning mamá,” miingon si Isabella. “Miingon siya nga mahimo kini nakong dulaan karon. Tan-awa kini sa adlaw.”
Giisa ni Isabella ang kuwintas padulong sa hayag. Gatosan ka bangaw ang makita sa mga brilyante. Nindot kaayo kadto!
“Karon magdula na kita og tago-tago!” Miingon si Isabella.
“OK!” miingon si Carolina. “Makatabang ko sa paghipos sa kuwintas nga luwas.”
“Salamat!” Gihatag ni Isabella ang kuwintas kang Carolina, ug gibutang kini ni Carolina sa iyang bulsa.
Sa wala madugay oras na aron mopauli si Carolina. Sa dihang nanamilit na siya, wala gipangayo ni Isabella ang kuwintas. Tingali nakalimot siya. Ug wala usab siya pahinumdomi ni Carolina.
Adunay gamay nga dili maayong gibati si Carolina tungod sa pagdala sa kuwintas sa ilang panimalay. Apan ganahan siya nga mohipos niini og kadyot. Gibalewala niya ang dili maayo nga gibati ug gibutang ang kuwintas ilalom sa iyang unlan.
Sabado pagkasunod adlaw. Gihimo ni Carolina ang iyang mga buluhaton ug migawas aron magdula. Nakalimot siya kabahin sa kuwintas.
“Carolina!” Mitawag si Papá. “Pwede ba nga moanhi ka?”
Si Carolina midagan ngadto sa sulod. “Unsa man?”
Gikuptan ni Papá ang kuwintas sa iyang kamot. “Nakit-an kini ni Mamá ilalom sa imong unlan. Kang kinsa man kini?”
“Kang Isabella kana.” Nanglugmaw na ang mga luha sa mga mata ni Carolina. “Ako kanang gihipos sa akong bulsa samtang nagdula kami gahapon. Apan nakadesisyon ko nga dad-on kini sa balay.”
Si Mamá milingkod uban ni Carolina sa sopa. “Salamat sa imong pagsulti sa tinuod. Unsa kaha ang imong buhaton karon?”
Nahilom si Carolina. Naghunahuna siya mahitungod ni Jesus. Siya gusto niya nga magmatinud-anon ug ibalik ang kuwintas.
“Kinahanglan nako kining ibalik ni Isabella ug sultihan siya nga mangayo ko og pasaylo,” miingon si Carolina. Sa dihang iya kining gisulti, ang dili maayo nga pagbati nawala. Siya mibati og kainit sa sulod.
Miadto si Carolina sa balay ni Isabella.
“Hi,” miingon si Carolina. Iyang gihatag ni Isabella ang kuwintas. “Pasayloa ko nga ako kining gitago. Pasayloon ba ko nimo?”
“Oo,” miingon si Isabella. “Salamat sa pagbalik nimo niini.” Dayon mipahiyom siya. “Ganahan ka ba nga magdula na usab og tago-tago?”
“Oo! Pag-ihap usa—unya motago ko!”
Nianang gabhiona, militok og pag-ampo si Carolina. “Minahal nga Langitnong Amahan, palihog pasayloa ko sa pagtago sa kuwintas. Ug salamat sa pagtabang nako nga himoon kining sakto.”
Gibati na usab ni Carolina ang init nga pagbati. Nalipay siya nga siya makahimo sa unsay gusto ni Jesus nga iyang himoon.
Mga paghulagway pinaagi ni Sue Teodoro