“Kasamok diha sa Parke,” Higala, Agosto 2023, 46–47.
Kasamok diha sa Parke
Miginhawa si Hunter og lawom. “Dili ko moistorya niana nga mga pulong.”
Kini nga istorya nahitabo sa USA.
Si Hunter midagan tabok sa parke uban sa iyang mga higala. Mingisi siya samtang iyang nabati ang hangin nga milampas niya. Mibati siya nga kusog kaayo ug gaan!
Si Kyle ang unang nakahikap sa koral. “Nakadaog ko!” misinggit siya.
Si Hunter miabot sa koral pipila ka gutlo human niana. “Dili patas! Ikaw ang miuna og sugod.”
“Sakto,” miingon si Miguel. “Lumba ta ngadto sa kahoy!”
Si Hunter misugod na usab sa pagdagan. Niining higayona, siya ang unang nakahikap sa kahoy. Apan si Miguel naa ra dayon sa iyang luyo.
“Nakadaog ko!” Miingon si Miguel.
“Dili, si Hunter ang nakadaog,” miingon si Piper.
“Sakto,” miingon si Kyle.
Gikyugpos ni Miguel ang iyang mga bukton. Dayon misulti siya og dili maayo nga pulong.
Ang ubang mga bata nangatawa. Gisulti na usab ni Miguel ang pulong, ug misamot sila pagkatawa.
Mibati og kaguol si Hunter. Nakahibalo siya nga kadto nga pulong dili maayo nga isulti. Apan dili siya gusto nga sungogon. Wala siya motingog.
Si Piper misulti og lain nga dili maayo nga pulong. Dayon si Kyle misulti og lain pa.
“Karon sulti og usa, Hunter,” miingon si Kyle.
“Sakto, sige na,” miingon si Miguel. “Sulti og bag-ong balikas nga pulong.”
Miginhawa si Hunter og lawom. “Dili ko moistorya niana nga mga pulong.”
“Ang pagsulti og usa ka pulong dili makadaot nimo,” miingon si Kyle.
“Dili ko gusto,” miingon si Hunter.
“Nahadlok ka ba og maayo?” Mikatawa si Miguel.
Ang nawong ni Hunter namula. “Magdula ko sa uban nga dapit.”
Ang uban nga mga bata nagpadayon sa pagkatawa ug pagsulti og dili maayo nga mga pulong. Gusto ni Hunter nga mopalayo. Ang parke dili na makalingaw karon. “Magkita na lang ta unya,” hinay siya nga misulti.
Gisulod ni Hunter ang iyang mga kamot sa iyang bulsa ug hinay nga giagian ang ubang bata. Wala na niya batia ang kakusog ug kagaan. Gibati niya ang kabug-at.
Nakit-an niya si Mama ug Papa nga naglingkod sa bangko. Gibutang ni Papa ang iyang basahon. “OK ra ka?”
Mikibo si Hunter. “Misugod sila sa pagsulti og dili maayo nga mga pulong. Dili ko ganahan nga mobuhat adto, mao nga mibiya ko.”
Mipahiyom si Mama. “Maisogon kadto.”
“Mapasigarbohon kami kanimo,” miingon si Papa. “Lisod ang paghimo og maayo nga mga pagpili kon ang mga tawo sa atong palibot wala maghimo.”
Nanghupaw si Hunter. Nalipay siya nga iyang nahimo ang matarong nga pagpili, apan dili pa gihapon maayo ang iyang gibati.
“Gusto ka ba nga mopauli?” Nangutana si Mama.
Naghunahuna si Hunter mahitungod niini. “Dili pa,” miingon siya. Mihangad siya sa laing pundok sa mga bata nga nagdula sa mga zip line. “Moadto ko didto.”
Samtang naglakaw si Hunter, usa sa mga batang lalaki ang mikaway niya. “Kumusta, ako si David.”
“Ako si Hunter. Pwede ba ko nga molukso uban nimo?”
“Sige ba!”
Si Hunter mipuli sa zip line ug gibati ang kusog nga hangin. Samtang nakigdula uban ni David ug sa ubang bata, siya mibati na usab og kakusog ug kagaan. Nahimo niya kon unsa ang matarong, bisan kon kini lisod. Siya nalipay nga siya nakahimo og matarong nga pagpili.
Mga paghulagway pinaagi ni Shawna J. C. Tenney