“Usa ka Espesyal nga Gasa,” Higala, Agosto 2023, 18–19.
Usa ka Espesyal nga Gasa
“Mao tingali kini ang Espiritu Santo,” naghunahuna si Mehrimah.
Kini nga istorya nahitabo sa France.
“Mehrimah! Fatima! Ania na ang mga misyonaryo,” mitawag si Mama.
Gisirad-an ni Mehrimah ang iyang basahon sa mga istorya sa kasulatan ug midagan paingon sa sala. Ang mga misyonaryo nagtudlo sa ilang pamilya mahitungod ni Jesukristo. Si Mehrimah ug ang iyang pamilya bunyagan na sa dili madugay. Dili na siya makahulat!
Si Mehrimah milingkod kauban sa iyang pamilya.
“Karon atong hisgotan ang mahitungod sa Espiritu Santo,” miingon si Elder Moea’i. “Siya motabang nato nga mobati og kalinaw ug kahupayan gikan sa Langitnong Amahan.”
“Siya usab nagdasig nato sa paghimo og maayo nga mga butang,” midugang si Elder Campbell. “Ug motabang Siya nato nga mahibalo sa unsay eksakto. Tingali gibati na ninyo ang Espiritu Santo kaniadto.”
Si Mehrimah naghunahuna sa dihang siya nakakat-on mahitungod sa Basahon ni Mormon. Mibati siya nga malinawon ug malipayon. Tungod niana nasayod siya nga tinuod kini. Mao ba kadto ang Espiritu Santo?
“Human ka mabunyagan, hatagan ka sa gasa sa Espiritu Santo,” miingon si Elder Moea’i. “Nagpasabot kana nga Siya mahimong kanunay nga makig-uban nimo aron sa pagtabang nimo ug paggiya nimo.”
“Karong semanaha, hatagi og igong pagtagad ang imong mga hunahuna ug mga pagbati,” miingon si Elder Campbell. “Bantayi ang mga higayon nga ang Espiritu Santo nakigsulti kanimo.”
Nianang gabhiona atol sa pag-ampo sa pamilya, si Mehrimah nakabantay kon unsa ang iyang gibati sa sulod. Gibati niya ang kakalma ug kamalinawon. Mora kini og daw may usa ka tawo nga migakos niya pag-ayo. Tingali mao kini ang Espiritu Santo, naghunahuna siya.
Sa simbahan pagka Dominggo, si Mehrimah naminaw sa usa ka kanta mahitungod ni Jesukristo. Mibati siya og kalipay. Nakapahimo kini niya nga ganahang motabang sa ubang tawo. Tingali kini mao usab ang Espiritu Santo, naghunahuna siya.
Sa dili pa matulog, si Mehrimah nagbasa sa iyang basahon sa mga istorya sa kasulatan. Ang iyang manghod nga babaye, si Fatima, mihangyo nga mopuli. Miingon si Mehrimah og dili.
Nagpadayon si Mehrimah sa pagbasa. Apan mibati siya og dili maayo tungod sa wala pagpakigbahin.
“Pasayloa ko,” giingnan niya si Fatima. “Makigdungan ka og basa?”
Mitupad si Fatima niya. Nagpuli-puli sila sa pagbasa. Si Mehrimah mibati og kainit ug kalipay. Tingali mao kini ang Espiritu Santo, naghunahuna siya.
Sa kataposan ang adlaw sa ilang bunyag miabot. Si Mehrimah ug ang iyang pamilya miadto sa gambalay sa Simbahan ug nag-ilis og puti nga mga sinina.
Si Mehrimah ang unang gibunyagan. Ang tubig bugnaw, apan nalipay siya nga mohimo og pakigsaad uban sa Langitnong Amahan. Giputos siya ni Mama og tuwalya. Dayon mitan-aw siya ni Mama, Papa, ug Fatima nga gibunyagan.
Si Mehrimah nagsul-ob og balik sa iyang uga nga sinina. Karon oras na aron siya makompirmahan.
Ang mga misyonaryo mipatong sa ilang mga kamot sa ulo ni Mehrimah. “Ikaw among gikompirmahan nga miyembro sa Ang Simbahan ni Jesukristo sa mga Santos sa Ulahing mga Adlaw,” miingon si Elder Campbell, “ug mosulti kanimo, dawata ang Espiritu Santo.” Si Mehrimah mibati og kainit sa tibuok lawas samtang siya naminaw sa uban pa nga panalangin.
Human si Mehrimah nakompirmahan, gigakos siya ni Mama. “Unsay imong gibati?”
“Nindot gayod kaayo,” miingon si Mehrimah. “Human nila gipatong ang ilang mga kamot sa akong ulo, aduna koy gibati, ug mabati kini nga mora og kalinaw.” Mipahiyom siya. “Mabati kini nga mora og adunay usa ka tawo nga nagsulti nako nga magpuyo og maayo nga kinabuhi, nga motabang sa mga tawo, ug motuman sa mga sugo.”
“Nahibalo ka ba unsa ang imong gibati?” Nangutana si Mama.
“Oo, nakahibalo ko,” miingon si Mehrimah, ang iyang mga mata misidlak. “Kana mao ang Espiritu Santo!”
Mga paghulagway pinaagi ni Alyssa Petersen