“Fausiaina o le Faaaloalo,” Uo, Setema 2023, 4–5.
Fausiaina o le Faaaloalo
“Aua e te faia lena tala, faamolemole,” o le tala lea a Noa.
O lenei tala sa tupu i Ausetalia.
Sa fesoasoani Noa i lona tuafafine o Claire e tautau se palanikeke mamoe i luga o nofoa.
“Pe tatau ona ta tuu lea ii?” na ia fesili ai. Sa ia uuina i luga le palanikeke lanumoana o loo i ai ni ata o tafola.
“Ioe! Ma e mafai ona ta faaaogaina lea e fai ma faitotoa.” Sa faasino atu Claire i le isi itu o le ‘olo.
“Taimi mo le aoga!” Na valaau mai ai Tina.
Sa tilotilo atu Noa i lona tuafafine. “Atonu e mafai ona faauma le ta ‘olo pe a tuua le aoga?”
“Ma e mafai ona ta fesili ia Tina ma Tama pe mafai ona ta taaalo ai i ni taaloga i totonu,” o le tala lea a Claire.
Sa ataata Noa ma lue lona ulu. Sa fiafia o ia i le mafai ona ia fausia ni olo ma taaalo faatasi ma lona tuafafine matua!
I lena aso i le malologa, sa taaalo ai Noa ma ana uo o Ty ma Mark.
“Tatou osooso vae tasi,” na fai mai ai Ty.
“Ua lelei,” o le tala lea a Noa. “Tatou vaai po o ai e mafai ona umi ona osooso!”
Sa amata ona osooso tama. Sa ata Noa ina ua ia lāvea atu ia Mareko.
O le taimi lava lena, na savavali ane ai Claire ma nisi o teineiti mai lana vasega.
“Mālo,” o le tala lea a Claire, ma talotalo atu.
“Oi leai. Ua o mai teine! Tatou te le mananao e taaalo faatasi ma i latou,” na faimai ai Ty. Ona ia valaau atu lea o Claire ma ana uo i se igoa faalealofa.
Sa lei fiafia Noa i lagona na ia lagonaina i ia upu. Sa le manaia le valaau atu i tagata i ni igoa faalealofa.
Sa ia iloa atu Claire ma ana uo ua le amanaiaina Ty ma savavali ese.
Sa manatu Noa e tatau ona ia tu atu mo Claire, e tusa lava pe na te le’o manaomia o ia. O ia o lona tuafafine ma e alofa ia te ia.
Sa manava loloa Noa. “Ei, aua e te faia lena tala, faamolemole,” na ia fai atu ai ia Ty. “E le fiafia o ia pe a e faia na upu. Ma ou te le fiafia foi i ai.”
“UA LELEI. Lelei,” o le tala lea a Ty ma se faamimigi.
Na mapuea Noa. Ua sili atu ona lelei ona lagona i le taimi nei.
I lena po, sa taaalo ai Noa ma Claire i ni taaloga i le la olo faatasi ai ma Tina ma Tama.
“Na a mai le aoga ananei?” Sa fesili atu ai Tama a o ia tuuina se kata i luga o le faaputuga.
“O ananei i le taimi o le malologa, na valaau ai e Ty ia Claire o se igoa faalealofa,” o le tala lea a Noa. “Sa ou taofia o ia.”
Sa ea a’e Claire mai ana kata. “E mo’i?” sa fesili atu ai Claire.
Na lue atu le ulu o Noa. “Ioe. Na ou iloa o mea na ia fai atu ai sa le agalelei pe moni.”
Sa ataata Tina, Tama, ma Claire.
“Faafetai,” na faapea mai ai Claire.
“Ou te fiafia na e faaalia le faaaloalo mo lou tuafafine,” o le tala lea a Tina.
“Ioe, o se matuai lototele lava lena,” o le tala lea a Tama. “E taua le faaalia o le faaaloalo mo le tasi ma le isi. E tusa lava pe afai ua tatau ai ona tatou tutu atu e faasaga i a tatou uo.”
Sa toe ataata atu i ai Noa. Sa ia lagonaina le fiafia i le iloaina sa ia faia le mea sa’o.
Ata na tusia e Violet Lemay