“O le Malo Valaaulia i le Taumafataga o le Afiafi,” Uo, Setema 2023, 12–13.
O le Malo Valaaulia i le Taumafataga o le Afiafi
Sa fiafia Johne e aoao e uiga i se isi Aposetolo.
O lenei tala sa tupu i Guam.
Sa tilotilo atu Johne i lona tina tausi o seti le laulau. Sa ia faapipiiina se ata o Elder Dieter F. Uchtdorf i se nofoa faaopoopo, faatasi ai ma se ata komi o se vaalele.
“Taimi mo le ’aiga o le afiafi!” O le valaau lea a Tina.
Na oso ese mai le nofoa faamalū ia Litia, le tuafafine tausi o Johne. “Ua ou fiaai lava!”
“E faapena foi a’u,” na fai mai ai Johne.
Sa tulei atu e Tina le nofoa faataavalevale o Johne i le laulau ma nofo i ona autafa. Sa saofafai foi Tama ma Litia i le laulau. E fiafia lava Johne pe a latou i ai uma i le fale mo le taumafataga o le afiafi.
Sa fai e Tama le tatalo o meaai, ma sa pasi faataamilo ane e Tina le moa ma le araisa. “O le a tatou aoao e uiga i se tasi o Aposetolo i le po nei,” o lana tala lea. Sa tusi atu lona lima i le ata o loo i luga o le nofoa. “E iloa e se tasi o ai o ia?”
“O Elder Uchtdorf lena,” o le tala lea a Johne.
Na luelue le ulu o tamā. “Sa ou filifilia o ia e avea ma malo valaaulia o le po nei.”
“E mafai ona ou filifilia taeao?” O le fesili lea a Litia.
“Ioe,” sa faapea mai ai Tina.
Sa fiafia Johne e aoao e uiga ia Elder Uchtdorf. O le konafesi aoao o loo loma i le lua vaiaso, ma sa i ai se tu masani maoae a le aiga tausi a Johne e saunia ai. O po taitasi, latou te filifilia ai se Aposetolo e aoao e uiga i ai. Sa faapipii e Tina se ata o le Aposetolo i se nofoa. Ona ia faamatala atu lea i le aiga o mea moni e uiga ia te ia ma tala e uiga i lona laitiiti.
“O le a se mea ua e iloa e uiga ia Elder Uchtdorf?” O le fesili lea a Tamā.
“Oi, ou te iloa!” O le tala lea a Litia. “Sa ia avea vaalele!” Sa tusi atu lona lima i le ata o le vaalele i luga o le nofoa.
“Sa’o lelei,” na fai mai ai Tina. “A o lei valaauina o ia o se Aposetolo, sa avea o ia ma se pailate vaalele i Siamani.”
Sa faia e Johne se taga lele i lona lima ma faaleo se pao o se vaalele. “Fwoosh!”
“Sa auai Elder Uchtdorf i le Ekalesia a o laitiiti o ia,” o le tala lea a Tama. “E pei lava ona sa e faia, Johne.”
Sa tilotilo atu Johne i le ata. Sa faigata ona vaai faalemafaufau ia Elder Uchtdorf o se tamaitiiti e pei lava o ia!
“Ma sa i ai sana galuega faapitoa i le lotu i Aso Sa,” o le tala lea a Tina. “Sa manaomia le ea i totonu o le okeni ina ia mafai ai ona ola. I le taimi o pese, sa ia fesoasoani e pamu le ea mo le okeni e ta ai viiga.”
“Ou te matea o se galuega faigata,” o le tala lea a Tama. “Ae sa fiafia o ia i le musika. O lana pese e sili ona fiafia i ai o le ‘E Manao Iesu Ia Ou Fai ma Sulu.’”
Sa ataata Litia. “O le pese foi lena ou te fiafia i ai!”
“O Elder Uchtdorf e pei lava o i tatou,” o le tala lea a Tina. “Ma i ni nai vaiaso, o le a tatou faalogo atu ia te ia o saunoa mai i le Ekalesia atoa. O le a ia faasoa mai se savali e finagalo Iesu Keriso ia tatou faalogo uma i ai!”
Ina ua uma le taumafataga o le afiafi, sa aveese e Tina le ata mai le nofoa. Sa ia faapipiiina i luga o le puipui i tafatafa o ata o isi Aposetolo. Latou te tuua i luga ata seia oo i le konafesi aoao e fesoasoani ia i latou ia iloa ai le au failauga.
Sa fesoasoani Johne ia Tama i le faamamaina o ipu. Sa fufuluina e Tama ipu, ae sa faamagoina e Johne. A o galue o ia, sa ataata o ia i ata o loo i luga o le puipui.
Sa fiafia Johne e aoao e uiga i Aposetolo! Sa le mafai ona faatali o ia e faalogologo atu ia i latou i le konafesi.
Ata na tusia e Brooke Smart