“Pese i le Aso Sa,” Uo, Setema 2023, 20–21.

Pese i le Aso Sa

Saunia e Joel B. Randall

(E faavae i se tala moni)

E le leaga tele pe afai e misia e Alejandra le lotu i se taimi se tasi, a ea?

O lenei tala sa tupu i Kuatemala.

Sa mapuea Alejandra. Faatoa uma lava ona ia usuina lana solo i le potu musika mo lona faiaoga. O ona vaiaso uma o faataitaiga sa matua aoga lava! Sa lei tauivi foi o ia ma le vaega e foliga faigata.

“O se siufofoga ina a matagofie!” O Ms. Pérez, o le faiaoga musika o le aoga, sa tu ma patipati. “E mafai ona e agai atu i le isi taamilosaga e sosoo ai i le tauvaga taleni.”

Sa matua’i fiafia lava Alejandra! I lenei tauvaga, e pepese, sisiva, pe taina e tamaiti aoga mai le tele o aoga se mea faifaaili e tauva ma manumalo ai i faailoga. O Ms. Pérez o le faamasino na te filifilia po o ai e nofo i le tauvaga. Ma o lenei ua see atu Alejandra i le isi taamilosaga e sosoo ai!

“E tatau ona e pasia ni taamilosaga se lua o faataitaiga,” Sa fai atu ai Ms. Pérez. “Afai e te faia, e mafai ona e ulu atu i le tauvaga faaiu. E faia i se Aso Sa mulimuli ane o le masina lenei.”

Na mou ese atu le fiafia o Alejandra i le taimi lava lea. Sa ia lagonaina e pei sa i ai se mea mamafa i lona manava.

Sa ia iloa o le Aso Sa o se aso e alu ai i le lotu ma aoao e uiga ia Iesu Keriso. O se aso e tagofia ai le faamanatuga. O se aso e malolo ai ma faatasi ma le aiga.

“Aso Sa?” na ia fesili atu ai. “Ou te le iloa pe mafai ona ou faia.”

“Afai e le mafai ona e i ai iina mo le aso mulimuli, ona le mafai lea ona e i ai i le tauvaga. Ou te iloa o le a lelei lau faatinoga pe a e auaie, ae o lau filifiliga. Mafaufau i ai i le faaiuga o le vaiaso ma faailoa mai ia te au i le Aso Gafua.”

O le aso na sosoo ai, sa mafaufau pea Alejandra i le mea e fai. E alu lava o ia i le lotu faatasi ma lona aiga i le Aso Sa. Ae pe na tatau moni lava ona i ai o ia iina i vaiaso uma lava? Atonu sa le leaga tele pe afai e na te misia le lotu i se taimi se tasi, a ea?

I le taimi moe sa ia talanoa ai ia Papa e uiga i le mea e tatau ona ia faia. “Pe tatau ona ou pese i le tauvaga pe alu i le lotu?” sa ia fesili ai.

“O le Sapati o se aso tatou te avatu ai i le Atua.” Sa toso ae e Papa lana palanikeke i luga i lona auvae ma nofo i ona talaane i luga o le moega. “E ono aso mo i tatou lava. E na o le tasi le aso e finagalo ai le Atua. Ae e le mafai ona ou faia lenei filifiliga mo oe.”

Primary children singing at a sacrament meeting. A mix of boys and girls of different ages and ethnicities. An adult woman is playing the piano in the background.

O le aso na sosoo ai i le lotu, na usuina ai e Alejandra ma ana uo uma i le Peraimeri le “O Le Tatalo a se Tamaitiiti” i luma o le uarota atoa. Sa latou galulue i lenei pese mo se taimi umi lava!

Sa pese Alejandra ma lona loto atoa. O le musika na galo ai ia te ia le faaiuga faigata e tatau ona ia faia taeao. Ina ua uma le pese, sa ia toe savali atu ma le mitamita e nonofo ma lona aiga.

Sa fusi atu o ia e Mama. “Sa matagofie lau pese!”

“Ua matou matuā mitamita lava ia te oe,” o le tala lea a Papa. “O le faasoaina atu o lau taleni e faaalia ai lau molimau ma le faatuatua i le Atua.”

Sa fiafia Alejandra e faaaoga ana taleni e usu ai pese a le Peraimeri. Sa ia iloaina na faafiafiaina ai foi lona aiga.

Ona mafaufau ai lea o Alejandra i se mea. Ana faapea o le aso lenei o le tauvaga, semanu na te misia le avanoa e pese ai e uiga i le Tama Faalelagi. O le a se mea o le a ia misia pe afai na te le sau i le lotu i le aso o le tauvaga? O le a le mafai ona ia usuina lana molimau i le Peraimeri faatasi ai ma ana uo. Ma o le a ia misia le faamanatuga.

I le Aso Gafua, sa iloa e Alejandra le mea e tatau ona ia faia. Sa alu o ia i le potu musika e talanoa i lona faiaoga.

“Faafetai lava mo le avanoa,” o lana tala lea. “Ae ou te le fia i ai i le tauvaga taleni pe afai e tatau ona ou faia i le Aso Sa.”

Sa tuu e Ms. Perez i lalo le pepa musika sa ia tilotilo i ai ma faauu. “Ua e mautinoa e te manao e misi le tauvaga?”

“Ioe, ua ou mautinoa.” Sa mitamita Alejandra i lana faaiuga. Sa faigata ona fai, ae sa ia iloaina o le filifiliga sao lea. “O le a ou misia se mea e sili atu ona taua pe afai ou te alu.”