“O Se Tali sa Le’i Mafaufauina,” Uo, Setema 2023, 40–41.
O Se Tali sa Lei Mafaufauina
Mata e aoga moni lava le manatu o Tamā?
O lenei tala sa tupu i le ISA.
Sa tatagi le logo a o tusia e Mr. Nickels la latou meaaoga faalevaiaso i luga o le laupapa. Sa tele naua faafitauli e foia! O lenei mea o le a alu ai se taimi umi tele.
“Au mai i totonu a outou meaaoga i le Aso Faraile,” na faapea mai ai Mr. Nickels. “E leai ni alofaga.”
Sa oi tagata uma. Sa matuai tulei atu e Derek lana tusi matematika i totonu o lana ato faafafa ua matua tumu lava.
Sa matuai ese lava le aoga fou a Derek mai lana aoga tuai. O lea la ua i ai o ia i le vasega ono, sa alu o ia i se aoga sa sili atu ona telē, ma toatele atu tamaiti aoga. Sa faigata atu vasega, ma sa tele foi ana meaaoga e fai i le fale.
Ae o le mea na sili ai ona popole Derek o isi tamaiti. O nisi o i latou sa foliga mai e matuai agaleaga lava! Na te lei manao i se tasi e ita ia te ia.
Sa ato ane e Derek lana atofaafafa i luga o lona tauau ma savali atu i totonu o le faletele. Sa i ai tamaiti i soo se mea. Sa autilo o ia i lalo ma taumafai e taamilo i le va o i latou e aunoa ma le pai atu i se tasi. O nisi taimi e foliga mai e oo lava i le tilotilo atu i se tasi e ono feita ai i latou.
“Na a mai le aoga i le asō?” Sa fesili atu ai Tama i lena po. “Ua lelei atu ea?”
“E leai,” o le tala lea a Derek.
Sa tuu i lalo e Tamā lana tusi. “E te iloa na e ta’u mai ai ia te au o nisi taimi e te popole ai atonu e ono ita se tasi i le aoga ia te oe e aunoa ma se mafuaaga?”
Sa luelue le ulu o Derek a o ia sioa atu i ana meaaoga e fai i le fale.
“Ia, e i ai so’u manatu,” o le tala lea a Tama. “Taumafai e ataata atu ia i latou.”
E a? E le o le mea lena na faamoemoeina e Derek. “Ou te le iloa,” sa ia tali atu ai. “E foliga mai e ese lava lena mea.”
“E leai se mea e leaga ai le ataata,” o le tala lea a Tina.
Na luelue le ulu o Tamā. “O le a le afaina le taumafai. Faasaga sa’o lou ulu ma taumafai e ataata i soo se tasi e te vaai i ai. E fai si faigata ona ita sesi i se ataata.”
Sa mafaufau Derek i le manatu o Tama. Sa ia tatalo e uiga i ai a o lei moe, ma sa ia lagonaina le toafilemu. Ua lelei. O le a ia faataitaia.
O le taeao na sosoo ai, na oso ese ai Derek mai le pasi. Sa faaofiofi atu se vaega o tamaiti i faitotoa pito i luma o le aoga. Sa savali atu Derek i totonu ma lona ulu punou, e pei ona masani ai.
Ona manatua lea e Derek le manatu o Tama. Na o le ataata lava, sa ia mafaufau ai.
Faatasi ai ma se mānava loloa, na ea ane ai le ulu o Derek. Sa savali agai mai ia te ia se tamaitiiti matua. Sa le itiiti ifo ma le tasi lana vasega i luga atu o Derek. Atonu e lua. Sa ia ofuina se ofu taalo ma savali i ni laa tetele, ma le saoasaoa.
Sa toetoe lava a tilotilo ese Derek. O le ituaiga tamaitiiti tonu lava lea sa ia manatu atonu e tulei esea o ia mai le ala e aunoa ma se lapataiga. Ae sa ia folafola atu e taumafai.
O lea na ia ataata ai.
Sa susulu teisi foliga o le isi tamaitiiti. Ina ua pasi atu o ia, sa tu Derek ma le toe savali mo sina taimi. Sa ia lei lagonaina se popole tele i le taimi nei!
Sa ataata atu Derek i le toatele o tagata a o agai atu i le vasega. Toeitiiti lava o i latou uma na ataata mai! Na sa’o lava Tama. Sa leai se tasi na ita mai ona o se ataata.
A o savali atu o ia i totonu o le potuaoga, sa manatu Derek atonu e le taufaafefe tele le aoga tulagalua. Sa i ai pea le tele o mea e aoao ai, ma sa i ai pea ni ona popolega. Ae sa fesoasoani le ataata. Atonu e mafai foi ona fesoasoani lana ataata i se isi tagata ia maua ai se lagona lelei atu.
Ata na tusia e Daniel Duncan