“O Le Meaalofa Sili,” Uo, Setema 2023, 28–29.
O Le Meaalofa Sili
O le a le mea o le a sili ona manao i ai Tama mo lona aso fanau?
O lenei tala sa tupu i le ISA.
Sa fiafia lava Iosia. O le asō o le aso fanau o Tama! Sa tuu e Mama pepa felanulanuai i le umukuka. Sa ia faia foi se keke faapitoa o le aso fanau.
“E tatau ona ta tuuina atu ia te ia ni meaalofa,” o le tala lea a Iosia.
“Ioe!” o le tala lea a lona tuafafine laitiiti, o Madeline. “Ae o le a la?”
“E i ai so’u manatu.” Sa alu atu Iosia i le fale e teu ai meafaigaluega. Sa ia aveina ni nai fasi laau ma kelu faatasi e fai ai se tamai laulau.
“Sa ou pikiina mo Tama ni fugalaau mai lana togalaau!” Sa uu i luga e Madeline ia fugalaau. “E te manatu o le a ia fiafia ai?”
Sa lue atu le ulu o Iosia ioe. “Ua le mafai ona ou faatali mo ia e vaai i ana meaalofa!”
I lena aoauli, sa usuina ai e Iosia ma Madeline le “Manuia lou Aso Fanau” ma aai faatasi ma Tama i le keke.
“Taimi mo Meaalofa!” Na fai mai ai Iosia. Sa ia tuuina atu ia Tama lana meaalofa.
Sa tatala e Tama le pepa. “Oka! Sa e faia se galuega lelei tele. Faafetai lava!” Na opo atu e Tama ia Iosia.
Ona avatu lea e Madeline ia Tama ia fugalaau.
Faafetai tele lava.” Sa ataata Tama. “E matagofie tele nei mea!”
E le’i umi ae o’o i le taimi e faamama ai le fale. “Iosia, e mafai ona e fesoasoani e tapena le laulau?” O le fesili lea a Mama.
“Ioe,” na fai atu ai Iosia. Sa ataata o ia ma avatu ipu i le fata fuluipu.
“E mafai foi ona ou fesoasoani,” o le tala lea a Madeline.
Sa ataata tele Tama. “Ou te lagona le fiafia tele pe a lua fesoasoani ma agalelei le tasi i le isi. Ou te iloa e faafiafiaina ai foi Iesu. O le meaalofa sili lena o meaalofa uma!”
Mulimuli ane sa taaalo ai Iosia ma Madeline i a la meataalo. Sa fauina e Iosia se olo umi mai poloka faufale. Sa toetoe lava a umi e pei o ia! Ae na toulu i lalo ia Madeline.
“Ei!” Na fai mai ai Iosia. “Ua e faaleagaina la’u olo!” Sa ia aveina se meataalo mai ia Madeline.
“O a’u e ana!” Sa ee atu ai Madeline.
Sa sau i ai Tama. Sa faauu o Ia. Sa ia faamanatu atu ia i la’ua e feauauai i a la meataalo.
Ina ua aluese tama, sa fesili Iosia, “Na e vaai i foliga o Tama? Sa foliga faanoanoa o ia.”
“Aisea na faanoanoa ai o ia?” o le fesili lea a Madeline.
“Sa ia fai mai o le meaalofa sili lava e mo ta’ua ia agalelei,” o le tala lea a Iosia. “A e na galo ia i ta’ua.”
“Oi.” Sa tilotilo ifo Madeline i le foloa. “Ou te faamalie atu mo le leua ai o lau olo.”
“E le afaina,” sa fai atu ai Iosia. “Faamalie atu mo le ita. Ia ta agalelei mo le taimi o totoe o le aso.”
Ae faafefea pe afai e galo ia i ta’ua?” O le fesili lea a Madeline.
“Ona ta taufai faatoese lea ma toe taumafai ia agalelei,” o le tala lea a Iosia.
Sa faamama ma teu e Iosia ma Madeline ia poloka. Ona la taaalo lea i se taaloga fou. Ina ua savali ane Tama, sa ataata o ia.
“Ou te manatu ua ta mafaia!” Na musumusu atu Madeline ia Iosia. “Sa ta tuuina atu ia Tama se meaalofa maoae!”
Na ataata Iosia. “Ioe, na ta faia. Ma o se meaalofa foi mo Iesu!”
Ata na tusia e Jeff Harvey