“O Le Mea Sese i le Keke,” Uo, Setema 2023, 10–11.
O Le Mea Sese i le Keke
Sa manao Sailo ia atoatoa le lelei o lana keke.
O lenei tala sa tupu i Sikotilani.
Na uma ona valivali e Sailo lana ata ma tuu lana vali i luga o lana kesi. “Ia gale!”
“O le a lena mea?” na fesili atu ai lana uo o Lacey.
“O le keke o loo ou faia mo le tauvaga a le aoga.” Sa uu i luga e Sailo le ata e vaai i ai Lacey.
“Matuai manaia lava!” Sa fai atu ai Lacey.
“Faafetai!” Sa ataata Sailo. O le a atoatoa le lelei o lana keke. Sa uma ona ia fuafuaina lava. O le keke o le a i ai ni fogafale se fa. E lua fogafale o le a lanumoana, ae e lua o le a lanumumu—e tutusa lanu ma le fu’a mo le Malo Aufaatasi. Na te tuuina le pautaaisa paepae i le va o fogafale taitasi. Mulimuli lava, o le a ia tuuina ana kuki sili ona lelei sa fai i le fale e pito i luga! Sa ia mautinoa o le a ia maua le tulaga muamua.
“O le a le mea o le a e taoina?” O le fesili lea a Sailo.
“Ou te le o mautinoa i le taimi nei,” o le tala lea a Lacey. “Atonu o se keke foi.”
“Ta fia vaai lava i le mea o le a e faia,” o le tala lea a Sailo.
O le taimi lava na taunuu ai o ia i le fale, sa sauni Sailo e amata ona fai [lana] keke. Sa ia tuu lana ata o le keke i luga o le fata ina ia mafai ona tilotilo i ai a o ia galue.
Sa fuaina ma le faaeteete e Sailo mea uma e manaomia. Sa ia paluina ma sasaa atu le paluga i totonu o le apa tao keke. Ona ia tuuina lea o le apa i le ogaumu e tao ai le fogafale muamua o le keke.
Ina ua tatagi le faailo taimi, sa aveese e Sailo le keke mai le ogaumu. Sa taumafai o ia e aveese le keke mai le apa. Ae ina ua ia faafaōina le apa, sa mau le afa o le keke i le pito i lalo!
“Auoi leai!” Sa alaga ai Sailo. Sa ia faaali atu le keke ua malepe ia Tina. “Ua leaga la’u keke!”
Sa po po e Tina le tua o Sailo. “E le afaina. E mafai ona ta toe faaleleia.”
Sa fesoasoani tina ia Sailo e aveese le vaega o totoe o le keke. Sa la toe tuufaatasia ma le faaeteete ia fasi keke na mavaevae.
“A la lea,” na faapea mai ai Tina. “E le mafai foi ona e iloa atu na mavaevae.”
Sa lagona e Sailo se lagona lelei teisi. E mafai lava ona ia faaatoatoaina le vaega o totoe o le keke. Sa amata ona ia faia le isi fogafale. O le taimi la lea, sa tuu ai e Sailo le keke ia maalili a o lei aveesea mai le apa. Sa le’i malepe!
Ina ua uma ona faia fogafale uma o le keke, sa fatuina loa e Sailo. Sa ia tuu le pautaaisa i le va o fogafale taitasi. Ona ia tuuina lea ma le faaeteete ni nai kuki sa gaosi i le fale i le pito i luga o le keke. Ua uma!
Ae sa faauu foliga o Sailo. Sa lei foliga mai le keke e pei o lana ata na tusi. Sa sisina le pautaaisa, ma sa le gatusa ia fogafale, ma sa pi’o le keke i le tasi itu. Oka se faaletonu! Na amata ona tagi Sailo.
“O le a le mea ua tupu?” O le fesili lea a Tina.
“Sa ou manao i le keke ia foliga atoatoa! O lea ua sese atoa!” Sa soloiese e Sailo se loimata mai ona foliga.
Sa fusi e Tina ia Sailo. “Ou te manatu e foliga manaia lau keke. Ma ou te matea o le a sili atu le lelei o lona tofo!”
Na lūlū le ulu o Sailo. “E tatau ona ou tiaia. O le a ou mauaina nei le tulaga mulimuli!”
“Mata e fesoasoani pe a ou faia se tatalo?” O le fesili lea a Tina.
Sa luelue atu le ulu o Sailo.
“Tama Faalelagi pele,” na fai atu ai Tina, “Ou te matua faafetai lava mo Sailo ma mo lona galue malosi ina ia faia lenei keke. Faamolemole fesoasoani ia te ia ia lagona le fiafia i mea sa mafai ona ia faia. I le suafa o Iesu Keriso, amene.”
Sa lagona e Sailo le toafilemu. Sa ia toe tilotilo atu i lana keke. Atonu e lei foliga mai e pei o lana atatusi, ae sa foliga mai lava o loo lelei. Ma sa fiafia o ia i le faiga.
O le aso na sosoo ai i le aoga, sa tilotilo solo ai Sailo i isi mea suamalie uma na faia e tamaiti. Na te lei manatu o le a maua sana togi. Sa foliga ofoofogia isi keke.
Ae ina ua faalau mai le au manumalo, sa maua e Sailo le tulaga lua! Ma sa maua e Lacey le tulaga muamua!
Sa tamoe atu Lacey ma fusi Sailo. “Ua ta manumalo uma!”
Sa ataata Sailo. E tusa lava pe na te lei manumalo, o le a fiafia o ia ona sa taumafai pea.
Ata na tusia e Maryssa Dennis