“O Auala E Tele e Fai Atu Ai ‘Ou Te Alofa ia te Oe,’” Uo, Setema 2023, 36–37.
O Auala E Tele e Fai Atu Ai “Ou te Alofa ia te Oe”
E mafai faapefea ona fesoasoani Trina i lona tuagane?
O lenei tala sa tupu i le ISA.
“Sei tatou amataina la tatou fonotaga faaleaiga i se tatalo,” o le tala lea a le tamā o Trina.
Sa tootuli Trina i autafa o ona tuagane ma ona uso a o faia e lona tuagane o Teila le tatalo. Ona latou saofafai uma lea i lalo.
“Ma te fia talanoa ma Tina e uiga ia Atamu,” o le tala lea a Tama. O le tuagane o Trina o Atamu sa avea ma se faifeautalai. Sa ia malaga ese atu i le tolu masina talu ai, ma sa misia tele o ia e Trina.
“E sau o ia i le fale mai lana misiona i le vaiaso nei,” o le tala lea a Tina.
Sa mapusela Trina. O manuia o ia? sa ia mafaufau i ai.
“E a? Aisea?” o le fesili lea a Teila.
“Sa tauivi o ia ma le popole ma le atuatuvale,” o le tala lea a Tina. “O lona uiga e tele lona popole ma le faanoanoa e le alu ese. O le a ia maua se fesoasoani mai fomai iinei, e pei lava ona ia faia pe afai na gau lona vae pe ma’i.”
Sa le iloa e Trina le tala e fai. Sa i ai ni ana uo na vave foi mai nai o latou tei i le fale mai a latou misiona ina ia maua mai se fesoasoani mai se fomai. Mata o le a manuia Atamu?
“Ma te mananao e faia mea uma tatou te mafaia e fesoasoani ai ia Atamu. E mafai ona outou tatalo faamolemole ia iloa pe faapefea ona outou auauna atu i le tou tei?” o le fesili lea a Tama.
Sa luelue atu ulu o Trina ma ona tei.
“E mafai ona outou fesili mai ia i ma’ua i soo se fesili ma tau mai ia i ma’ua tou lagona i soo se taimi. Ma te alolofa moni ia te outou,” o le tala lea a Tina. Sa tamoe atu Trina e fusi o ia, ma sa o mai le isi vaega o le aiga mo se opo toatele.
I nai aso na sosoo ai, sa mafaufau ai Trina e uiga ia Atamu. Sa ia tatalo e uiga i mea e mafai ona ia faia mo ia. Sa ia mafaufau i taimi na ia lagona ai le popole po o le faanoanoa ma le tele o le fesoasoani a lona aiga ia te ia. Ae o le popole ma le atuatuvale na foliga mai o ni mea tetele.
“O le a se mea e mafai ona ou faia e fesoasoani ai ia Atamu?” Sa fesili atu ai Trina i lona Tina.
“E le mafai ona tatou suia lagona o loo lagonaina e Atamu,” o le tala lea a Tina. “Ae e mafai ona tatou lagolagoina o ia ma faaali atu ia te ia tatou te popole mo ia.”
“E mafai ona tatou alolofa ia te ia!” o le tala lea a Trina.
Sa ataata Tina ma fusi atu ia te ia. “O le mea sili lena e mafai ona tatou faia.”
Sa iloa e Trina e tele auala e fai atu ai “Ou te alofa ia te oe,” e tusa lava pe le o fai atu leotele. Pe a faia e lona aiga ni mea lelei mo ia pe fusi atu ia te ia, sa ia iloa e latou te alolofa ia te ia. E mafai e Trina ona faia lena mea mo Atamu!
Sa tonu ia Trina e mafai ona ia amata faaali atu le alofa mo Atamu i le taimi nei. Sa ia faaaogaina le sioka e tusi ai se savali mo ia i luga o le auala savali. Sa ia nanaina ni faamatalaga lelei faataamilo i le fale. Sa fesoasoani o ia i ona tei e fai se faailoilo. Na faapea mai, “Susu mai i le aiga, Elder Dawson! Matou te alolofa ia te oe!”
O le aso na sosoo ai, na o ai le aiga o Trina i le malaevaalele. Sa fesoasoani Trina i ona tei e uu le faailoilo na latou faia. Ina ua savali atu Atamu i le faitotoa, sa taufetuli atu Trina ma lona aiga e fusi o ia.
“Ou te alofa ia te oe, Atamu!” Na fai atu ai Trina.
Ina ua latou taunuu i le fale, sa uu e Trina le lima o Atamu ma taitai atu o ia i le auala savali e vaai i le mea na ia tusia.
“‘Matou te matua mitamita lava ia te oe, Elder Dawson,’” na faitau atu ai Atamu. Sa tilotilo atu o ia i o latou matua ma nai ona tei. “Faafetai tele, ia te outou uma.” Sa ia oomiina le lima o Trina.
Na alu ese atu Atamu e tuu lana atopau i lona potu. Ina ua ia toe foi mai, sa ataata o ia. “E i ai se tasi na te iloa o ai o loʻo faia mea lelei uma i lo tatou fale? Na ou maua se tusi faalilolilo i lo’u aluga.” Sa faaivi atu lona mata ia Trina.
Sa ataata Trina. Sa le mafai ona ia faatali e mafaufau i nisi auala e fai atu ai “Ou te alofa ia te oe”!
Ata na tusia e Sammie Francis