“Fakafanongo ki he Palōfitá,” Ko e Kaumeʻá, ʻOkatopa 2023, 4–5.
Fakafanongo ki he Palōfitá
Naʻe fiefia ʻa Falanisi ke fanongo kia Palesiteni Nalesoni.
Naʻe hoko ʻa e talanoa ko ʻení ʻi ʻAsenitina.
Naʻe tangutu ʻa Falanisi ʻi he sofa he tafaʻaki ʻo e matapā sioʻatá. Naʻá ne fokotuʻutuʻu ʻene fanga kiʻi kā vaʻingá ʻi he matapā sioʻatá.
Naʻe pehē ange ʻe Mama, “Taimi ke lau e folofolá.” Naʻe fakataha mai ʻa Falanisi mo hono ngaahi tokouá mo e tuofāfiné ki he loki talanoá. Naʻe fakaava hake ʻe Mama ʻene Tohi ʻa Molomoná.
Naʻe fanongo ʻa Falanisi ki hono lau ʻe Mama ʻa e talanoa ʻo ʻApinetaí. Ko ha palōfita ia naʻe feinga ke akoʻi ʻa e kakaí. Ka na‘e ‘ikai ke nau fanongo.
“ʻIkai naʻá ne loto-toʻa?” Ko e fehuʻi ange ia ʻa Mamaá. “Naʻá ne maʻu ha pōpoaki mahuʻinga meia Sīsū Kalaisi ke akoʻi ʻa e kakaí. Pea naʻe ʻikai tuku ʻene feingá!”
Naʻe kamokamo pē ʻa Falanisi. Naʻá ne fakakaukauloto ki hono akoʻi ʻe ʻApinetai ʻa e kakaí.
“ʻOkú ke manatuʻi e meʻa ʻe hoko he uike kahaʻú?” Ko e ʻeke ange ia ʻa Papá.
“ʻIo!” Naʻe tangutu hangatonu hake ʻa Falanisi. “Konifelenisi lahí!”
Naʻe talaange ʻe Mama, “Ko ia. Te tau lava ʻo fanongo ki hotau palōfitá ʻi he konifelenisi lahí.”
Fakafokifā pē kuo nau fanongo ki ha ongo mei he halá. Naʻe ongo mai ha leʻo lahi, “ʻI he ʻahó ni ʻoku ʻi ai ʻeku hina, polo, mo e temata!”
Naʻe ʻiloʻi ʻe Falanisi ʻa e leʻo ko iá! Ko Leimoni, ko e tokotaha fakatau fuaʻiʻakau mo e vesitapoló. Naʻá ne fakaʻuli he halá he ʻaho kotoa pē, ʻo uingakiʻi ki he tokotaha kotoa pē ʻa e fuaʻiʻakau mo e vesitapolo ʻokú ne fakatau atú. Naʻá ne fakaʻaongaʻi ha meʻa-fakaleʻolahi ke lava ʻa e kakaí ʻo fanongo ki ai mei honau ngaahi falé. Pea te nau lava leva ʻo ʻalu ki tuʻa ke fakatau mai ha meʻakai.
“ʻOku ʻi ai foki mo haʻaku ʻāpele mo e siaine ifo!” Ko e ui ia ʻa Leimoní.
Naʻe maʻu ai ʻe Falanisi ha fakakaukau. “Mama! ʻOku hangē ʻa e kau palōfitá ko e ngaahi meʻa-fakaleʻolahí!”
Naʻe fehuʻi ange hono tuofefiné, “Ko e hā hoʻo ʻuhingá?”
“ʻOku fakaʻaongaʻi ʻe Sīsū ʻa e palōfitá ke vahevahe ʻEne folofolá, ʻo hangē ko hono fakaʻaongaʻi ʻe Leimoni ʻa e meʻa-fakaleʻolahí. ʻI he founga ko iá ʻe lava ai ʻa e tokotaha kotoa pē ʻi he māmaní ʻo fanongo kiate Ia!” Naʻe malilmali fiefia ʻa Falanisi.
Naʻe ʻosi atu ha ngaahi ʻaho mei ai, pea vave pē ke hoko mai ʻa e konifelenisi lahí. Naʻe fokotuʻu ʻe Papa ha mīsini fakaʻatalahi ke nau lava ʻo sio konifelenisi ʻi he holisí. Naʻe hangē ia ha fale faivá!
Naʻe ngaohi ʻe Mama ha kūkisi sokoleti ke nau kai lolotonga ʻenau mamatá. Naʻa nau fiefia kotoa ʻi he taimi naʻe lea ai ʻa e palōfitá.
Naʻe pehē ʻe Palesiteni Nalesoni, “Hū ki he hala ʻo e fuakavá pea nofo maʻu ai.”*
Naʻe pehē ʻe Falanisi, “ʻOku ou fie fai ʻa e meʻa ko iá!” “Ka ʻe founga fēfē?”
“ʻOkú ke lolotonga fakahoko pē ia.” Naʻe malimali pē ʻa Papa. “Naʻá ke muimui ʻia Sīsū Kalaisi ʻi hoʻo papitaisó. Pea te ke lava he taimí ni ʻo nofo maʻu ʻi he hala ʻo e fuakavá ʻaki haʻo feinga ke muimui ʻiate Ia ʻi he ʻaho kotoa pē.”
Naʻe malimali ʻa Falanisi. Naʻá ne fie muimui kia Sīsū Kalaisi. Pea te ne lava ʻo fai ia ʻaki ʻene muimui ʻi he palōfitá!
Tā fakatātā ʻa Carolina Farías