“Naʻe ʻAfioʻi ʻe he Tamai Hēvaní,” Ko e Kaumeʻá, ʻOkatopa 2023, 28–29.
Naʻe ʻAfioʻi ʻe he Tamai Hevaní
Ko e hā ka nau ka fiemaʻu ai ha ngaahi meʻa maluʻi fofonga lahi peheé?
Naʻe hoko ʻa e talanoa ko ʻení ʻi Filipaini.
Naʻe fanongo ʻa Sipenisā ki he ava ʻa e matapaá. Kuo foki mai ʻene tangataʻeikí! Naʻe fonu e ongo nima ʻo e Tangataʻeikí ʻi he meʻakai mei he falekoloá.
Naʻe tuku hifo ʻe he Tangataʻeikí ʻa e kató pea fāʻofua kia Sipenisā. “ʻOku ou fiefia ke sio kiate koe!”
Naʻe tuhu ʻa e Fineʻeikí ki ha puha lahi naʻe ʻomi ʻe he Tangataʻeikí. “Ko e hā ia?”
Naʻe pehē ange ʻe he Tangataʻeikí, “Naʻá ku sio ki ha puha ʻoku ʻi ai ha ngaahi meʻa maluʻi fofonga ne fakamaʻamaʻa. Naʻá ku maʻu ha ongo te tau lava ʻo fakaʻaongaʻi ia.”
Naʻe puputuʻu ʻa Sipenisā. Ko e hā ka nau ka fiemaʻu ai ha ngaahi meʻa maluʻi fofonga lahi pehē he taimi ní?
Hili ha uike ʻe taha mei ai, naʻe foki mai ʻa Sipenisā mei he akó mo hono ngaahi tokouá mo e tuofāfiné. ʻI heʻenau hū ki lotó, naʻe fokotuʻutuʻu ʻe he Fineʻeikí ha ngaahi fokotuʻunga meʻa ʻi he funga kānitá.
“Fineʻeiki, ko e hā hoʻo meʻa ʻoku faí?” Ko e fehuʻi ange ia ʻa e tokoua ʻo Sipenisaá.
Naʻe pehē ange ʻe he Fineʻeikí, “ʻOku ou fetongi e ngaahi naunaú mei heʻetau fanga kiʻi kato tokoni fakavavevavé.” “Naʻá ku sio kiate kinautolu ʻi he funga laupapá he ʻahó ni peá u fakakaukau ʻoku totonu ke u vakaiʻi kinautolu. ʻOku meimei taʻu nima ʻa e meʻakai ko ʻení! Te ke fie tokoni mai?”
Naʻe tokoni ʻa Sipenisā mo hono ngaahi tokouá mo e tuofāfiné ki he Fineʻeikí ʻi hono faʻo e ngaahi hina vaí mo ha ʻū kofukofu meʻakai ʻi he kató. Naʻe tokoni leva ʻa Sipenisā ki he Fineʻeikí ʻi hono fakafoki kinautolu ki he funga laupapá. Naʻa nau mamafa!
Naʻa nau hili foki mo e puha ʻoku fonu ʻi he ʻū meʻa maluʻi fofongá ʻi he funga laupapá. Hili ha ngaahi ʻaho siʻi, naʻe ngalo kotoa ia ʻia Sipenisā.
Hili ha ngaahi māhina siʻi mei ai, ʻi he mavahe mai ʻa Sipenisā mo hono fāmilí mei he lotú, naʻe fakapoʻuli mo matolu ʻa e ʻea ʻi honau ʻātakaí. Naʻá nau tale ʻi heʻenau heka atu ʻi he meʻalelé ki ʻapi.
ʻI heʻenau aʻu ki ʻapí, naʻe fakamoʻui ʻe he Tangataʻeikí ʻa e TV ke sio pe ko e hā ʻa e meʻa ʻoku hokó. Naʻe haʻohaʻo takai ʻa e fāmilí ke mamata.
Naʻe pehē ʻe he faiongoongó, “Naʻe kamata ke puna ʻa e efuefu mei he Moʻunga Afi Taʻalá he ʻahó ni.” “ʻOku fakatuʻutāmaki ke mānava ʻaki ʻa e efuefú. Kātaki ʻo tui ha meʻa maluʻi fofonga. ʻOku totonu ke nofo ʻa e tokotaha kotoa pē ʻi ʻapi ʻapongipongi.”
Naʻe sio takai ʻa Sipenisā ki hono fāmilí. Naʻe ʻohovale ʻa e tokotaha kotoa.
“ʻOi!” Ko e Fineʻeikí ange ia. “ʻA e puha meʻa maluʻi fofongá!”
Naʻe malimali ʻa e Tangataʻeikí. “Naʻá ku ʻiloʻi naʻe ʻi ai ha ʻuhinga naʻá ku fakatau ai kinautolú!”
“Tangataʻeiki, naʻá ke ʻilo ʻe pā e moʻunga afí?” Ko e fehuʻi ia ʻa Sipenisaá.
Naʻe kalokalo pē e Tangataʻeikí. Naʻá ne pehē mai, “ʻIkai.” “Ka naʻe ʻafioʻi ia ʻe he Tamai Hēvaní. Pea naʻá Ne fekauʻi mai ʻa e Laumālie Māʻoniʻoní ke fakahā mai ke u fakatau ʻa e ʻū meʻa maluʻi fofongá. ʻOku lahi feʻunga foki ke tau vahevahe mo e niʻihi kehé.”
Naʻe pehē ange ʻe he Fineʻeikí, “Pea ʻoku ou tui naʻe ʻomi ʻe he Laumālie Māʻoniʻoní kiate au ʻa e fakakaukau ke vakaiʻi ʻetau ngaahi kato fakatuʻupakeé.” “Te tau maʻu he taimí ni ha vai mo ha meʻakai lahi lolotonga ʻetau ʻi ʻapí ʻo tatali ke maʻa ʻa e efuefú.”
Naʻe ongoʻi loto-māfana ʻa Sipenisā. Naʻe fakapoʻuli, ka naʻe malu honau ʻapí, pea naʻe maau pē ʻenau fiemaʻú. Naʻá ne ʻiloʻi ʻe hokohoko atu hono tokoniʻi kinautolu ʻe he Tamai Hēvaní. Naʻe fiefia ʻa Sipenisā ʻi he fakafanongo hono fāmilí ki he Laumālie Māʻoniʻoní!
Ngaahi tā fakatātā ʻa Laura Catrinella