“Laka Atu ki Muʻa pea Hoko Atu ʻa e Ututaʻú!” Ko e Kaumeʻá, ʻOkatopa 2023, 32.
Kaumeʻa ki he Kaumeʻa
Laka Atu ki Muʻa pea Hoko Atu ʻa e Ututaʻú!
Ngaahi tā fakatātā ʻa Garth Bruner
Naʻá ku nofo mo tupu hake ʻi Kalefōnia, USA, mo hoku fāmilí. Naʻa mau utu ʻi he faʻahitaʻu māfaná ha kālepi ʻi ha ngoue vaine. Naʻe tokolahi homau fāmilí, pea naʻa mau ngāue fakataha. Naʻá ku kei siʻi, ka naʻe akoʻi au ʻe heʻeku tamaí ke u ngāue mālohi.
Naʻa mau tuʻusi ha ngaahi kālepi mei he vainé. Ne mau faʻo leva ʻa e kālepí ʻi ha laulau ukamea. ʻI he fonu ʻa e laulaú, naʻa mau ʻave ia ki heʻeku tamaí. Naʻá ne folahi ʻa e kālepí ke mōmoa ʻi he laʻā vela kakahá ʻo hoko ko e fuamelie . Naʻe totongi ʻe he taha ʻoku ʻoʻona ʻa e ngoue vainé ʻa ʻeku tamaí koeʻuhi ko e fuamelie ne mau ngaohí.
Ko e taimi kotoa pē naʻa mau ʻave ai ha kālepi ki heʻeku tamaí, naʻá ne talamai, “Laka atu ki muʻa pea hoko atu ʻa e ututaʻú.”
Ko ia ne mau ʻalu leva ki he vaine hokó ke toli ʻa e kālepi hono hokó. Naʻa mau toutou fai ʻeni. Ne mau tokanga taha ki he vaine hokó mo e ngāue ʻoku hanganaki mai mei muʻá. Naʻe ʻikai ke mau tuku ke tohoakiʻi ʻemau tokangá ʻe he meʻa naʻe ʻi mui ʻiate kimautolú.
Naʻe totongi au mo hoku ngaahi tokouá mo e tuofāfiné ʻe heʻeku tamaí ʻi he uike kotoa pē ki heʻemau ngāué. Naʻá ne akoʻi kimautolu ke toʻo ʻa e peseti ʻe 10 ki he vahehongofulú. Naʻa mau fakahaofi ʻa e toengá. Ko e taimi naʻa mau maʻu ai ha meʻa feʻungá, naʻa mau takitaha fakatau mai ha vakapuna papa pe ko e foʻi lole naʻa mau saiʻia taha aí. Naʻa mau fakaʻaongaʻi ha ngaahi hoʻatā Tokonaki ʻo vaʻinga ʻi he paʻaké mo ʻemau vakapuná mo kai ʻemau lolé.
Kuo hoko ʻa e lea ʻa ʻeku tangataʻeikí ke “laka atu ki muʻa pea hoko atu ʻa e ututaʻú” ko ha tukufakaholo ʻi hoku fāmilí. ʻOkú ne akoʻi mai ʻa e mahuʻinga ʻo e ngāue mālohí. ʻOku mahuʻinga ke tau “laka atu ki muʻa pea hoko atu ʻa e ututaʻú” ʻi he meʻa kotoa pē ʻoku tau faí. ʻI he taimi ʻoku tau ngāue mālohi ai mo muimui ki he meʻa ʻoku kole mai ʻe he ʻOtuá ke tau faí, te tau lava ʻo maʻu ʻa e fiefia ʻi he moʻuí.