“Tāpuaki Lakanga Fakataulaʻeiki ʻo Timioné,” Ko e Kaumeʻá, ʻOkatopa 2023, 12–13.
Tāpuaki Lakanga Fakataulaʻeiki ʻo Timioné
Naʻe puna hake ʻa Timione ki he saá.
Naʻe hoko ʻa e talanoa ko ʻení ʻi Kilipati.
Naʻe kaka hake ʻa Timione ki he fuʻu ʻakau ʻi ʻolunga ʻiate iá. Naʻá ne fakatāupe leva hono ongo vaʻé ai pea tāupe hifo ki lalo.
“ʻOku fakalata e feituʻú ni!” Ko Natieta hake ia mei lalo.
Naʻe maʻu ʻe Timione mo hono ngaahi kaungāmeʻá ʻa e fale liʻakí ʻi he konga kimuʻa ʻo e uike ko iá. Naʻe hoko ia ko ha feituʻu lelei ke vaʻinga ai! Naʻe feʻunga lelei pē ʻa e ngaahi sā naʻe lango ʻaki ʻa e ʻató ke nau tāupe mei ai.
Naʻe talaange ʻe Timione, “ʻOku ou tui te u lava ʻo puna ki he tafaʻaki ʻe tahá—ʻo hangē pē ha ngelí.”
“Te ta fetaulaki ki loto!” Ko Toani ange ia.
Naʻe fakaʻaongaʻi ʻe Timione hono ongo nimá ke teke ʻaki hono sinó ki muʻa. Naʻá ne puna atu leva ki he sā ʻi he tafaʻaki hono kaungāmeʻá. Naʻá ne fakamafao atu hono ongo nimá, ko e teuteu ke piki ki ai.
Ka naʻe heke hono louhiʻi nimá! Naʻe tō ʻa Timione ki he kelekelé.
“ʻOiauē!” Ko Timione ange ia. Naʻe lele hono ngaahi kaungāmeʻá ke tokoniʻi ia.
“ʻOkú ke sai pē?” Ko e fehuʻi ange ia ʻa Natietá.
Naʻe feinga ʻa Timione ke tuʻu ki ʻolunga, ka naʻá ne ongoʻi ha mamahi lahi ʻi hono nimá.
Naʻá ne tala ange, “ʻOku ʻikai ke u ʻilo pe te u lava ʻo ngaue.” Naʻá ne feinga ke ʻoua naʻa tangi, ka naʻe tō hifo hono loʻimatá.
Naʻe pehē ange ʻe Natieta, “Fakamolemole atu, Timione. Te mau tokoni ke ʻave koe ki ʻapi.”
Naʻe tokoni ʻa e ngaahi kaungāmeʻa ʻo Timioné ke kolosi ʻi he motú. Naʻe meimei tō ʻa e laʻaá ʻi he taimi naʻa nau aʻu atu ai ki hono ʻapí.
“Ko e hā e meʻa naʻe hokó?” Ko e fehuʻi ange ia ʻa e Fineʻeikí.
Naʻe pehē ange ʻe Toani, “Naʻa mau vaʻinga ʻi he fale liʻakí. Naʻe heheke ʻa Timione mei ha sā naʻá ne tāupe mei aí.”
Naʻe ʻikai lava ʻe Timione ʻo fakahangatonu hono nimá. Naʻe mamahi lahi ʻaupito!
Naʻe fakamālō e Fineʻeikí ki he ngaahi kaungāmeʻa ʻo Timioné ʻi hono ʻomi ia ki ʻapí. Naʻá ne tokoniʻi ia ke tokoto hifo ʻi he falá pea fokotuʻutuʻu takatakai ʻiate ia ha ngaahi pilo molū.
Naʻe kei mamahiʻia pē ʻa Timione. Ka naʻe ʻikai ofi mai ha kau toketā ke nau haʻu ki ai he fakapoʻulí. Fēfē kapau ʻe mamahi pē ʻi he poó kakato?
Naʻe fanongo ʻa Timione ki ha leʻo ʻoku ui mai mei tuʻa ʻi he falé. “ʻE Maile!” Ko e ongo faifekaú.
Naʻe pehē ange ʻe he Fineʻeikí, “Ongo ʻeletā, fiefia ke sio kiate kimoua.” “Kātaki muʻa ʻo foaki ha tāpuaki lakanga fakataulaʻeiki ki hoku fohá? Naʻe fasi hono nimá pea ʻokú ne feʻao mo ha mamahi lahi.
“ʻIo.” Naʻe malimali ʻa ʻEletā ʻAitu kia Timione. “ʻE Timione, te ke fiemaʻu nai ha tāpuaki lakanga fakataulaʻeiki?”
Naʻe ʻiloʻi ʻe Timione naʻe fakaafeʻi ʻe he ngaahi tāpuaki ʻo e lakanga fakataulaʻeikí ʻa e mālohi mei he ʻOtuá ke tokoni mo fakamoʻui ʻa e kakaí. Naʻá ne tui ʻe tokoniʻi ia ʻe he Tamai Hēvaní. Naʻá ne kamo hake. “ʻIo, kātaki”
Naʻe hilifaki ʻe he ongo faifekaú hona nimá ki he ʻulu ʻo Timioné. Naʻá na lea ʻaki hono hingoa kakató pea tāpuakiʻi ia ʻi he mālohi ʻo Sīsū Kalaisí ke ne ongoʻi fiemālie ange.
Naʻe ʻikai fuoloa kuo ʻikai ke fuʻu mamahi lahi ʻa e nima ʻo Timioné. Naʻá ne ongoʻi fiemālie mo nonga. Naʻe lava foki ke ne mohe.
ʻI heʻene ʻā haké, kuo ʻosi pongipongi ia. Naʻe kei mamahi pē hono nimá, ka naʻe ʻikai hangē ia mo e kimuʻá.
“ʻOkú ke ongoʻi fēfē?” Ko e fehuʻi ange ia ʻa e Fineʻeikí.
Naʻá ne pehē ange, “Sai ʻaupito.” “ʻOku ou tui ʻoku moʻoni ʻa e mālohi ʻo e lakanga fakataulaʻeikí.
ʻOku ou fiefia ʻi hono tokoniʻi koe ʻe he tāpuakí!” Naʻe fāʻofua ʻa e Fineʻeikí kia Timione, ʻo tokanga ke ʻoua naʻá ne tau ʻi hono nimá. “Ta ʻalu leva ʻo kumi ha tokoni ki hoʻo nimá ke fakapapauʻi ʻoku sai pē.”
Naʻe tokoni ʻa e Fineʻeikí kia Timione ke heka ki ha pasikala. Naʻá ne heka leva ʻi mui. Naʻá na ʻalu ki honau kaungāʻapí, ʻa ia ʻe lava ʻo tokoni.
Naʻe malimali ʻa Timione lolotonga hono faitoʻo ʻe he kaungāʻapí hono nimá. Ko e mālohi ʻo e lakanga fakataulaʻeikí ko ha mālohi moʻoni ia mei he ʻOtuá. Pea naʻá ne maʻu ha loto houngaʻia!
Ngaahi tā fakatātā ʻa Melissa Kashiwagi