Tohi ʻe Koe

Founga Ne Fakaʻau ke Lelei Ange Ai Hoku ʻAho ̄Naʻe Koví

Fai ʻe Tucker S., taʻu 8, Tekisisi, USA

Tā fakatātā ʻa Jared Beckstrand

Naʻá ku faingataʻaʻia he ʻaho ko iá. Naʻe pau ke u ʻalu ki heʻeku vaʻinga peisipoló, ka naʻe homohomo mo mamahi hoku foʻi nifó. Naʻá ku tuku ha konga hoku teunga peisipoló ʻi ʻapi. Pea naʻá ku helaʻia. Naʻe ʻikai ke u fuʻu fie vaʻinga peisipolo he ʻaho ko iá. Ka naʻá ku ʻalu pē ki he vaʻingá he naʻe pau ke u fakafoki ha tatā ki ha taha ʻo ʻeku kau vaʻingá.

Naʻá ku tangutu pē ʻi he ʻotu seá kae ʻikai kau atu ki heʻeku timí. Naʻe fakatokangaʻi ʻe heʻeku faiakó ʻeku tangutu loto-mamahi ʻi he seá. Naʻá ne fakalotolahiʻi au ke u haʻu ʻo vaʻinga he naʻe fiemaʻu au ʻe he timí. Naʻá ne fakahaaʻi mai naʻá ne tokanga mai kiate au, ʻo hangē pē ko hono fakatokangaʻi ʻe Sīsū ʻa kinautolu naʻe loto-mamahi mo fiemaʻu tokoní.

Naʻe haʻu leva ha taha ʻo ʻeku timí ʻo tuʻu ʻi hoku tafaʻakí. Naʻá ne malimali mai mo fehuʻi mai pe naʻá ku aʻu mai ʻanefē. Naʻá ne fiefia ke sio mai kiate au pea naʻá ne fiemaʻu ke u haʻu ʻo vaʻinga. Naʻe hangē foki ʻa e kaungā vaʻinga ko ʻení ko Sīsuú koeʻuhí he naʻá ne tokanga mai kiate au. Naʻá ne fakaʻaliʻali mai ʻa e meʻa ʻoku fai ʻe ha kaungāmeʻa leleí ʻi he taimi ʻoku faingataʻaʻia ai ha tahá. Naʻá ku fiefia lahi ʻi he fakaʻaongaʻi ʻe heʻeku faiakó mo e kaungā vaʻingá ha taimi ke u ongoʻi fiemālie ange ai, pea iku ʻo u vaʻinga ʻi he vaʻinga peisipoló!

ʻOku ʻi ai haʻaku meʻa fakaʻilonga tohi ʻoku pehē, “He ʻikai hanga ʻe ha ngāue angaʻofa pē ʻe taha ʻo liliu ʻa e māmaní, ka te ne lava ʻo liliu ha māmani ʻo ha taha.” Naʻe liliu ʻe heʻeku faiakó mo e kaungā vaʻingá hoku māmaní he hoʻatā Tokonaki ko iá ʻaki ʻena fili ke angaʻofa. ʻOku ou ʻilo ʻoku mahuʻinga ke hangē ko Sīsuú pea fakahaaʻi ʻa e ʻofá mo e angaʻofá ki he tokotaha kotoa pē ʻoku tau fetaulaki mo iá. ʻOku tokanga mo ʻofa mai ʻa e Tamai Hēvaní kiate kitautolu kotoa. ʻOku tau mahuʻinga kotoa kiate Ia, ko ia ʻokú Ne ʻomi ha kakai angaʻofa ke fakahaaʻi mai kiate kitautolu ʻEne ʻofá.