Ko e Hā ʻOkú Ke Fakakaukau Ki Aí? Ko e Kaumeʻá, ʻOkatopa 2023, 39.
Ko e Hā ʻOkú Ke Fakakaukau Ki Aí?
ʻOku ou feinga ke taʻofi ha tōʻonga kovi, ka ʻoku ou kei fai pē ha ngaahi fehālaaki. ʻE lava fēfē ke u fakatonutonu ia?
—Loto-foʻi ʻi Teapa
Siʻi Loto-foʻi,
ʻOku faingataʻake taʻofi ha ʻulungāanga kovi. Ka ʻoku mahuʻinga ʻaupito ke hokohoko atu hoʻo feingá, ʻo tatau ai pē pe ko e hā hono tuʻo lahi hoʻo fehālaakí. Ko ha konga ʻo e moʻuí ʻa e toutou feingá. Ko ia ai, ʻai ke lahi hoʻo kātakí. Naʻe akonaki ʻe ʻEletā Tieta F. ʻUkitofa, “ʻOku ʻikai fakapapauʻi hotau ikuʻangá ʻe he tuʻo lahi ʻo ʻetau toó ka ko ʻetau toe tuʻu hake ʻo tafitafiʻi ʻa e efú pea laka atu ki muʻá.”1
Ko ia ai, hokohoko atu ai pē!
Ko e Kaumeʻá
Ngaahi Tokoni ʻe 5 ke Fakatupulaki Hoʻo Tōʻonga Moʻuí
-
Fetongi ha ʻulungāanga kovi ʻaki ha ʻulungāanga lelei. Palani ha meʻa ke fai ʻi he taimi ʻoku ʻahiʻahiʻi ai koe ke ke fai hoʻo tōʻonga koví. ʻE malava pē ke siʻisiʻi!
-
Lau ʻa e Tohi ʻa Molomoná. “ʻOkú ke loto ke siʻaki ha tōʻonga kovi? … Lau ʻa e Tohi ʻa Molomoná!” ko Palesiteni Lāsolo M. Nalesoni ia. “Te ne ʻomi koe ke ke ofi ange ki he ʻEikí mo Hono mālohi ʻofá.”2
-
Kole ha tokoni. Talanoa ki ho ngaahi kaungāmeʻá mo e kau mēmipa ho fāmilí fekauʻaki mo hoʻo ngaahi taumuʻá pea kole ange ke nau poupouʻi koe.
-
ʻĀkilotoa koe ʻaki ʻa e ngaahi lea ʻoku fakatuʻamelié. Fili ha kupuʻi lea pe potufolofola ʻokú ne fakaʻaiʻai koe. Tuku ia ʻi he feituʻu te ke lava ʻo sio ki ai ʻi he ʻaho kotoa pē.
-
Fakafalala ki he Tamai Hēvaní mo Sīsū Kalaisi. Ko e tokoni mahuʻinga tahá ʻeni. Te ke lava ʻo ikunaʻi mo Kinaua ha faʻahinga tōʻonga kovi pē. Lotua ʻEna tokoní ʻi he ʻaho kotoa pē!