“Ngaahi ʻEkitivitī ʻo e Haʻu, ʻo Muimui ʻIate Aú,” Ko e Kaumeʻá, ʻOkatopa 2023, 6–7.
Ngaahi ʻEkitivitī ʻo e Haʻu, ʻo Muimui ʻIate Aú
Ki he efiafi ʻi ʻapí pe ako folofolá—pe ke maʻu ai ha fiefia!
Vaʻinga Fakatauhoa ʻo e Teunga Tau ʻa e ʻOtuá
Ki he Kakai ʻEfesoó
Talanoá: Naʻe akoʻi kitautolu ʻe Paula ke tau ʻai “ʻa e teunga tau kakato ʻo e ʻOtuá” (ʻEfesō 6:13–17). ʻI he taimi ʻoku tau muimui ai kia Sīsū Kalaisí, ʻoku maluʻi fakalaumālie kitautolu! Lau ʻa e talanoa mei he folofolá he peesi 46 ke ʻilo lahi ange.
Hivá: “Mālohi ʻo e Folofolá” (“Hiva maʻá e Fānaú,” ChurchofJesusChrist.org)
ʻEkitivitī: Huke ki he peesi 8 ke fakahoko ha ʻekitivitī fakatauhoa. ʻOku tokoni fēfē hono moʻui ʻaki e ongoongoleleí ke ke malu aí?
Nonga mei he Fakamoʻuí
Ki he Kakai Filipaí; Kolosé
Talanoá: ʻI he taimi ʻoku faingataʻa aí, te tau lava ʻo lotua ha tokoni. Te tau lava ʻo ongoʻi ʻa e fiemālié mo e nongá koeʻuhí ko e Fakamoʻuí. (Vakai, Filipai 4:4–7.)
Hivá: “ʻOku Ongo ʻa e ʻOfá” (Tohi Hiva ʻa e Fānaú, 42)
ʻEkitivitī: ʻI he peesi 10 lau ha talanoa kau ki ha taʻahine naʻá ne ongoʻi ʻa e ʻofa ʻa Sīsū Kalaisí. Fakakaukau leva ki ha taimi naʻá ke ongoʻi nonga ai koeʻuhí ko Ia. Hiki ia pe tā ha fakatātā. Pea ʻomi leva ia ki he Ko e Kaumeʻá! ʻAlu ki he takafi ʻi muí ke vakai ki he foungá.
Ngaahi Fakatātā ʻo e Loto Houngaʻiá
Ki he 1 mo e 2 Tesaloniká
Talanoá: Naʻe akonaki ʻa Paula, “Fakafetaʻi ʻi he meʻa kotoa pē” (1 Tesalonika 5:18). Te tau lava ʻo fakahaaʻi ʻetau houngaʻiá ʻaki ʻetau fakamālō ki he niʻihi kehé ʻi heʻenau tokoní. Te tau lava foki ʻo fakamālō ki he Tamai Hēvaní ʻi he taimi ʻoku tau lotu aí.
Hivá: “Fakafetaʻi ʻe Tamai” (Tohi Hiva ʻa e Fānaú, 15)
ʻEkitivitī: Ko e hā ha niʻihi ʻo hoʻo ngaahi tāpuakí? Tā pe kosi ʻo toʻo ha ngaahi fakatātā ʻo e meʻa ʻokú ke houngaʻia aí mei ha makasini. Pea ʻoange leva hoʻo fakatātaá ki ha taha ʻokú ke fie fakamālō ki ai.
Tā ʻa e Fasí
Ki he 1 mo e 2 Tīmote; Taitusi; Filimone
Talanoá: Te ke lava ʻo fai ha ngaahi meʻa maʻongoʻonga, neongo hoʻo kei siʻi! Naʻe hoko ʻa Tīmote ko ha taki kei talavou ʻo e Siasí, pea naʻe akoʻi ia ʻe Paula ke hoko ko ha faʻifaʻitakiʻanga lelei (vakai, 1 Tīmote 4:12–16). Te ke lava fēfē ʻo hoko ko ha taki mo tokoniʻi ʻa kinautolu ʻoku mou feohí?
Hivá: “Fie Maʻu Au ʻe Sīsū Ke u Ulo Hangē ko ha Hueló” (Tohi Hiva ʻa e Fānaú, 38)
ʻEkitivitī: Taʻutu ʻi ha siakale. Fakaʻaongaʻi ho ongo nimá pe vaʻakaú ke tā ha ngaahi fasi ʻi he kelekelé. ʻOku tātaaʻi ʻe ha tokotaha ha kiʻi fasi nounou, pea faʻifaʻitaki ki ai ʻa e toengá. Taufetongi ʻi he hoko ko e takí. Hili ho taimí, fakamatala ki ha taimi naʻá ke hoko ai ko ha faʻifaʻitakiʻanga lelei ki he niʻihi kehé.
Ngaahi tā fakatātā ʻa Katy Dockrill