“Ko e Kiʻi Laipeli Siʻisiʻí,” Ko e Kaumeʻá, ʻOkatopa 2023, 36–37.
Ko e Kiʻi Laipeli Siʻisiʻí
Naʻe hoko ʻa e talanoa ko ʻení ʻi he ʻIunaiteti Siteití.
Naʻe tāpuniʻi ʻe Seini ʻene tohí peá ne māpuhoi fiefia. Ko e tohi ʻeni naʻá ne saiʻia taha aí! Kuo tuʻo tolu ʻene lau iá. Naʻá ne manako ke lau tohi!
“ʻOkú ke pehē te u lava ʻo langa ha kiʻi laipeli?” Naʻe fehuʻi ange ʻe Seini kia Mami mo Teti kimui ange he ʻaho ko iá. Naʻá ne fie tokoni ki he niʻihi kehé ʻaki ʻene vahevahe ʻa e ngaahi tohí mo kinautolu.
“Ko e hā ha kiʻi laipeli?” Ko e fehuʻi ange ia ʻa Tetí.
Naʻe pehē ange ʻe Seini, “Ko ha puha ʻokú ke tuku ʻi tuʻa ʻoku faʻo ai ha ngaahi tohi.” “ʻE lava ke kole taʻetotongi kinautolu ʻe he kakaí. Pe ko ʻenau tuku ha ngaahi tohi ke lau ʻe he niʻihi kehé.”
Naʻe pehē ange ʻe Mami, “ʻOku ou tui ko ha fakakaukau lelei ia.”
Ne kamokamo ʻa Teti. “Te ma lava ʻo tokoni atu ke fokotuʻu ia.”
“Mālō!” ko Seini ange ia. “Mahalo ʻe lava ke ʻai haʻatau meʻakai taʻo ke fakatau ke maʻu ha paʻanga ki he ngaahi naunaú!” Naʻe faʻu ʻe Seini mo hono tokoua ko Keilí ha ngaahi fakaʻilonga ʻo fanongonongo ʻa e meʻakai taʻo ʻe fakatau atú. Naʻá na tuku takai kinautolu ʻi honau feituʻú. Naʻe tuku atu ʻe Mami mo Teti ʻa e tuʻuaki fakatau ʻo e meʻakai taʻó ʻi he ʻinitanetí ke ʻiloʻi ʻe he kakaí. Naʻe fuʻu fiefia ʻaupito ʻa Seini!
Naʻe fiefia lahi ʻa Seini ʻi hono ngaohi e fanga kiʻi fakaneifuá. Naʻá ne taʻo kūkisi, pā siliō, mo e keke sinou.
Ne ʻikai fuoloa kuo hokosia e ʻaho ke fakatau atu ai ʻa e meʻakai taʻó. Naʻe faʻo ʻe Seini, Keili, mo hona kaungāmeʻa ko Pelé ha tēpile ʻi he loto ʻataʻatā ʻi he toumuʻá. Naʻa nau fakatau atu ha fanga kiʻi fakaneifua ki ha tokolahi ʻo honau kaungāʻapí. Naʻe foaki foki ʻe ha kakai ʻe niʻihi ha paʻanga lahi ange. Naʻe faʻo ʻe Seini ʻa e paʻangá kotoa ʻi ha foʻi hina sioʻata makehe.
Hili e fakataú, naʻe toe maʻu ʻe Seini ha fakakaukau ʻe taha. Naʻá ne fakakau atu ha niʻihi ʻo e fanga kiʻi fakaneifua naʻá ne saiʻia taha aí ki ha feʻauhi fakaʻaliʻali fakavahefonua peá ne maʻu ai ha pale! Naʻá ne faʻo ʻa e paʻangá ʻi he foʻi hiná fakataha mo e paʻanga kehe ki heʻene kiʻi laipelí.
Ko ʻeni kuo maʻu ʻe Seini ha paʻanga ki he kiʻi laipelí, ka naʻá ne fiemaʻu ha ʻū tohi ke fakafonu ʻaki ia. Naʻá ne ʻalu mei he ʻapi ki he ʻapi ʻo kole ki hono kaungāʻapí ke foaki ha ʻū tohi naʻe ʻikai ke nau toe fiemaʻu. Naʻe omi ha ngaahi kaungāmeʻa ʻe niʻihi ke ʻoange foki kia Seini ʻenau ʻū tohí.
Naʻe faifai pea hokosia e taimi ke langa ai ʻene kiʻi laipelí. Naʻe fakaʻaongaʻi ʻe Seini ʻa e paʻanga naʻá ne maʻú ke fakatau ʻaki ha ngaahi naunau. Naʻá ne tā ha sīpinga ʻo e puhá mo hono fuá. Naʻe tokoniʻi ia ʻe Teti ke ne hifi ʻa e papá, pea naʻe tokoni ʻa Seini ke ne fokotuʻutuʻu fakataha ʻa e ʻū kongokongá.
Naʻe fakafonu ʻe Mami ʻa e mafahifahí mo e ngaahi hokoʻangá ke taʻofi ʻa e vaí ʻi he taimi ne ʻuha aí. Naʻe tokoni ʻa Seini ke tautau ha fakaʻilonga ʻo talaange ki he kakaí ke nau ʻave ha tohi pe vahevahe ha tohi.
Naʻe faifai pea ʻave ʻe Seini mo hono fāmilí ʻa e puhá ki he loto ʻataʻatā ʻi muʻá ʻo ofi ki heʻenau fuʻu ʻakau lahi mo malumalú. Naʻe fokotuʻu leva ʻe Teti ha fuʻu pou ʻi he kelekelé, pea nau tuku fakataha ʻa e puhá ʻi he funga poú. Naʻa nau faʻu ha kiʻi laipeli!
Naʻe tuku takai ʻe Teti ha foʻi maka mamafa ʻe tolu ʻi he fuʻu poú. Naʻá ne pehē ange, “ʻOku totonu ke taʻofi ʻeni mei hano puhi ʻe he havilí.”
“ʻOku ou saiʻia ʻaupito ai!” Ko e lea ange ia ʻa Seiní. “Te tau lava he taimí ni ʻo faʻo ʻa e ʻū tohí ki loto.” Naʻa nau fakafonu e kiʻi laipelí ʻaki e ʻū tohi naʻe foakí.
Hili iá, naʻe ʻalu ʻa Seini ke vakaiʻi e kiʻi laipelí he ʻaho kotoa pē. Naʻá ne saiʻia ke sio ki he ngaahi tohi naʻe tānaki pe toʻo ʻe he kakaí. Naʻá ne sio ʻi ha ʻaho ʻe taha ki ha kiʻi taʻahine ʻokú ne fili ha taha ʻo e ngaahi tohi ʻoku saiʻia taha ai ʻa Seiní! Naʻá ne fiefia ʻi heʻene lava ʻo tokoni ki hono kaungāʻapí ʻaki ʻene vahevahe ʻa e ʻū tohí ʻi he kiʻi laipelí.
Tā fakatātaaʻi ʻe Barbara Bongini