Volai mai vei iKo

Na Niu kei na iKatini

Mai vei Avehei M., yabaki 11, Taiti, Polinisia vaka‑Faranise

Bula! Na yacaqu o Avehei. Au vakaitikotiko e Taiti! Ena noqu yanuyanu, au taleitaka meu dau tu e tautuba. Au dau taubale ka qaqalo e uciwai se waitui. Au marautaka talega meu cakava na veika eso vata kei na noqu matavuvale. Au dau taleitaka na vakasaqa, qito veimau, kei na taubale. Au taleitaka na qito polo kei na kaba vunikau vata kei taciqu kei na tavalequ.

Ena gauna ni sereki ni vulaikatakata, au dau cakacaka vata kei taciqu ena dua na veiniu. Keirau vili niu mai ka biuta vata ena dua na ibinibini levu. Keirau soqona talega na drauniniu me savasava tu ga na veiniu.

E dau saumi keirau o tukai keirau vakarua ni keirau cakacaka ena veiniu. Au dau sauma na noqu ikatini ena ilavo au rawata. Au a vulica mai na noqu matavuvale kei ira na qasenivuli ni Lalai na sala meu sauma kina na ikatini.

Au sauma na ikatini baleta au kila niu na vakalougatataki kei na noqu matavuvale niu talairawarawa. Au sa vakalougatataki ena noqu matavuvale, dua na vale, kei na dua na vuravura totoka e wavoliti au tu.

Au kila ni bula tiko na Kalou ka dau lomani au o Koya. Au vakavinavinakataka na Tamada Vakalomalagi ena vuku ni matavuvale a solia vei au o Koya.

Na Cava na iKatini?

Era dau wasea na lewe ni Lotu e dua na ikatini ni ka era rawata ki na Lotu ni Kalou. Na noda ikatini e vukea na tarai cake ni veivaletabu kei na valenilotu ka vukei ira na tamata era vakaleqai tu. Na ikatini e dua na sala eda wasea kina na noda veivakalougatataki vei ira na tani. A solia vei keda na Kalou na ivakaro oqo ena gauna makawa sara, ena gauna ni Veiyalayalati Makawa (raica Nai Vakatekivu 14:18–20). Na saumi ikatini e dua na sala meda vakaraitaka kina na noda lomana na Tamada Vakalomalagi.