“Na Vakatovotovo,” iTokani, Nove. 2023, 30–31.
Na Vakatovotovo
A kila o Jereti ni a tu e yasana ko Jisu Karisito.
Na italanoa oqo a yaco e Faranise.
A cicivaki polo yani o Jereti takosova na rara. Era cici wavoliti koya na dauqito, ka sosokiki na nodra ivava ena fuloa.
“Au tadola tu!” A kaci mai o Keperieli.
A pasitaka yani na polo o Jereti vei Keperieli ka cici tikoga. Qai pasi lesu vua o Keperieli. A viritaka yani na polo o Jereti ki na icurucuru ni polo.
SWOOSH!
A curu i loma!
“Totoka, Jereti,” a kaya o nona dauniveivakatavulici ni oti na qito. “Mo kila, ni na caka na vakatovotovo me baleta na timi ni wasewase ena macawa rua mai qo.”
A matadredredre yani o Jereti. E vica walega na dauqito era sureti me ra vakatovolei me baleta na timi oya.
“Na vakatovotovo ena caka ena Sigatabu,” a kaya o dauniveivakatavulici. “O nanuma beka ni o na rawa ni tiko kina?”
Na mamarau nei Jereti a yali vakatotolo sara me vaka ga na kena yaco mai.
“Ena Sigatabu?” A taroga o Jereti.
“Io. E dua beka na leqa?”
A vakasamataka o Jereti. Oqo sa nona madigi me qito ena dua na timi vinaka sara! Ia na Sigatabu e dau lako kina ki lotu o koya ka vakanamata vua na iVakabula.
“Sigatabu e dau siga bibi vei au,” a kaya o Jereti. “Ia au na vosa mada vei rau na noqu itubutubu.”
Ena bogi oya, a dabe o Jereti ena nona idavodavo kei rau na nona itubutubu. A veiviriyaka toka nona basiketepolo e cake ni vakasamataka tiko. “Au vinakata sara ga meu vakatovolei me baleta na timi,” a kaya vei Na kei Ta. “Ia au sega ga ni vinakata meu cakava ena dua na Sigatabu. Au kila ni Kalou e bibi cake mai na basiketepolo.”
“Na cava e rawa ni keirau cakava me veivuke?” A taroga o Na.
A veimoiyaka o Jereti na polo e ligana. “E rawa beka ni tou masu vata?”
A biuta tani na nona basiketepolo ka tekiduru vata kei Na kei Ta. “Tamai Keimami Vakalomalagi lomani,” a kaya o koya, “Au vinakata, vakaidina sara ga meu vakatovolei me baleta na timi ni basiketepolo oqo. Ia na vakatovotovo era na caka tiko ena dua na Sigatabu! Au kila ni Sigatabu sa ikoya na siga au dau solia vei Kemuni. Na cava beka meu cakava?”
Ni oti na masu, a vakila o Jereti e dua na yalo veivakacegui.
“Na cava o bau vakila?” A taroga mai o Na.
“Au na sega ni lako kevaka ena caka ena Sigatabu na vakatovotovo,” a kaya o koya. “Ia au vakila tiko ni na daumaka na veika kece.”
Ni oti e rua na siga, a taura o tinai Jereti e dua na imeli. A tukuni mai kina ni sa na veisau oqo na vakatovotovo ki na Vakarauwai!
Sa na rawa vei Jereti me lai vakatovolei ka vakatabuya tikoga na Siga ni Vakacecegu! A kila o okoya ni sa rogoca na Tamada Vakalomalagi na nona masu.
Ena macawa rua ka tarava, a vakatovotovo basiketepolo o Jereti ena kena levu ga e rawata. Ni qai yaco mai na kena siga, a vakayacora o Jereti na nona vinaka duadua. A cici totolo sara ena veimaliwa ni qito, vakacuru polo vinaka sara, ka kailavaki ira na nona lewe ni timi.
“Sai ira na dauqito oqo era sa na tomana tiko na vakatovotovo me baleta na timi,” a kaya na dauniveivakatavulici ni oti na imatai ni wavoki. “Yalovinaka vakarogoca mai na yacamu.”
A tavatukituki vakadomoilevu na utoi Jereti. A kacivaka o dauveivakatavulici e dua na yaca. Qai dua tale. Kei na dua tale. A vakila o Jereti ni sa tekivu me seyavu yani na nona vakanuinui me baleta na timi.
Sega ni dede sa mai vakacavara o dauniveivakatavulici na lisi. A sega ni kacivaka o koya na yaca i Jereti. Esa na sega ni toso kina o Jereti ki na wavoki tarava ni vakatovotovo.
A dabe sobu ena idabedabe o Jereti ena taudaku ni valeniqito ka wadrava tu na nona ivava. A cakacaka vakaukauwa sara o koya. Ia a vaka ga ni sega ni dua na betena.
Ni sa mai kauti koya o Na, a kuretaka ga na uluna o Jereti. “Au sa sega digitaki ki na timi.”
A mokoti koya vakaukauwa o Na. “Isa vosota ni sa sega ni yaco na ka tou a vinakata,” a kaya o koya.
A mai cegulevu yani o Jereti. A qai yaco mai vua e dua na vakanananu veivakacegui.
“Ena sega ni dau yaco tu ga na veika me vaka au vinakata,” a kaya o koya. “Ia o Jisu Karisito e kila vinaka sara tu ga na veika au vakila. O Koya e tu ga e yasaqu.”
A matadredre sara o Na. “Dina o iko! E kila tu o Koya na veika o vakila.”
A matadredredre lesu o Jereti. A se rarawa voli ga o koya, ia a vakila ni daumaka cake ni kila o koya ni kila vinaka tu na iVakabula na veika e vakila. A kila o Jereti ni o Jisu ena dau lomani koya ka tokoni koya tu ga.
Droini mai vei Britain Morris