“Sivia Sara e Dua na Siga ni Vakatovotovo Vinaka,” iTokani, Nove. 2023, 14–15.
Sivia Sara e Dua na Siga ni Vakatovotovo Vinaka
A sega ni yalo vinaka voli na marama o ya. E rawa beka ni veivuke o Isimeli?
Na italanoa oqo a yaco e Bolivia.
A matadredredre o Isimeli ni kalawa yani ki tuba ki na rarama ni matanisiga. Erau a gole tiko o koya kei Papá ki na rara ni qito. Ni rau taubale tiko, a taura o Isimali na ligai Papá ni kauta voli na nona polo ni veicaqe. E dau taleitaka o Ismael me tiko vata kei Papá—vakauasivi ni rau qito soka!
Ni rau yaco ki na rara, a veiraiyaki sara o Isimeli. A cavu co tiko e dua na marama volekata na rara ni qito. Eratou a taubale tiko e dua na matavuvale ena bati ni gaunisala. Ia e sega ni dua a qito tiko ena rara ni veicaqe. Sa na levu sara na vanua me rau vakatovotovo kina o Isimali kei Papá!
“Sa vakarau mo qito?” A taroga mai o Papá.
“Io!” A cici totolo sara yani o Isimali ki na rara. A cakava o koya na vakatovotovo veicebayaki, caqe itotogi, kei na caqe mai na tutu ni rara.
A caqeta vakaukauwa na polo o Papá. A mani vuka baleta yani na ului Isimeli!
“Au na lai kauta mai,” a kaya o Ismael. A cici yani ki na tutu ni rara ka tomika mai na polo. A raica o koya ni se cavucavu tikoga na marama oya. E laurai vua na oca.
“Au sa na qito goalie mada qo,” a kacivaka mai o Papá. “Raica mada kevaka o rawa ni sikoa!”
A cici lesu o Isimeli ka caqeta yani na polo ki na matamata. A dolele yani o Papá me tarova ia a calata ga vakalailai.
“Cuuuru!” A kailavaka o Isimali ni sa lauta na polo na lawalawa.
Sega ni dede sa sivi e dua taucoko na auwa. “Sa gauna me daru lesu ki vale,” a kaya o Papá.
A rai lesu o Isimeli vua na marama a cavu co tiko. Na cakacaka ena rarama ni siga e sega ni ka ni lasa sara me vaka na qito soka, a nanuma o koya. A mani vinakata me vakamarautaki koya. A qai votu mai vua e dua na vakasama.
“Papá, o sega beka ni nanuma ni cakava tiko e dua na cakacaka vinaka na marama oya?” a taroga yani o koya.
“Na Cava?” A rai yani o Papá vua na marama oya. “Oi, io.”
“Au nanuma ni dodonu me daru laki tukuna vua!” a kaya o Isimeli.
“Ia, e gadrevi me daru vakatotolo ki vale. Sa na waraki kedaru tiko mai o Mamá,” a kaya o Papá.
A vakaraica toka o Isimeli na marama oya ni tavoya na yadrena. Na yalo me vosa vua sa kaukauwa cake sara. “Au vakila dina ni dodonu me daru cakava vakakina,” a kaya o koya. A taura o koya na ligai Papá ka rau lako yani vua.
“Bula vinaka, saka,” a kaya o Ismael ni yaloyalo yani vua.
A sega ni bau rai cake mai na marama oya. “Na cava o vinakata?”
A raica rawa o Isimeli ni sega soti ni marau vakalevu o koya. Ia oqori a sega ni tarovi koya. “Au vinakata meu tukuna vei kemuni ni o sa cakava tiko e dua na cakacaka cecere!”
Ena gauna oqo sa qai raici koya cake mai na marama oya.
A matadredredre yani o Isimeli. “Vinaka vakalevu na nomu qarava vinaka tiko na rara!”
A matadredredre lesu mai na marama oya. “Vinaka vakalevu,” a kaya mai o koya. Sa qai serau cake sara na nona matadredredre. “Vinaka sara vakalevu.”
A marau o Isimeli ni rau sa taubale yani ki vale vata kei Papá.
“Au vakabauta ni ka o a kaya a bibi sara vua,” a kaya o Papá. “Au marau ni ko a vakarorogo ki na veika o a vakila.”
“O au talega.” A vakasama vakalailai o Isimeli. Qai taroga mai o koya, “O nanuma beka ni Yalo Tabu oya?”
A deguvacu o Papá. “Ena so na gauna e dau solia vei keda na Yalo Tabu e dua na vakasama meda vukea kina e dua. Qori saraga na ka o a cakava.”
A matadredredre sara o Isimeli. Na vosa vua na marama oya a dua walega na ka lailai, ia a vakavinakataka cake na nona siga oya. Na vakarorogo ki na Yalo Tabu a vakavinakataka cake talega na nona siga!
Droini mai vei Jennifer Bricking