“Daru na Cakava Vata na Ka Oqo,” iTokani, Nove. 2023, 40–41.
Daru na Cakava Vata na Ka Oqo
A rere voli o Annie me tekivu ena Goneyalewa.
Na italanoa oqo a yaco e Amerika.
A vakamasia toka o Annie na bele ni nona ivinivo. A tovolea o koya me vakarorogo kivei ira na vosa tiko. Ia a vakila na rere, kei na rivarivabi ni lomana.
Nikua sa ikoya na siga me sa tekivu gole kina o Annie ki na Goneyalewa. Me sa na lako ki na kalasi ni oti saraga na soqoni ni sakaramede. Era tukuna kece vei Annie ni dodonu me nanamaki kina, ia e sega, a rere ga o koya.
A rai yani o koya vei Tami, na tuakana. Sa yabaki tolu na nona tiko ena Goneyalewa o Tami, ka dau taleitaka o koya. E dau tukuna tu ga vei Annie o koya na kena taleitaki. “Ena levu sara na nomu itokani,” a kaya o Tami. “E duidui mai na Lalai. E voleka ga ni vaka o sa qase-cake.”
Ia o Annie a sega ni vakataki tuakana. E dau taleitaka o Tami me sotavi ira na tamata vou, ka rawarawa sara vua me vakaitokani. A galugalu toka o Annie ka dau galeleta ga na wilivola se na droini mai na vosa vei ira na tani.
A tauvi buroro‑ni‑mata tale tu ga o Annie, ka dau madualaka na kena irairai. A dau vakayagataka o koya na kirimu digitaki, ka dau veivuke sara. Ia na bobota damudamu ena kuli ni yagona a sega ni lako tani rawa.
Ni oti na soqoni ni sakaramede, a tayabe malua tu yani o Annie ena olo. “Au na sega ni rawa ni lako ki na soqosoqo ni Goneyalewa nikua,” a kaya o koya vei Na kei Tami.
A lomaleqa o Na. “Au nanuma ga ni o a nanamaki tiko mo lako ki na Goneyalewa. “E sa vakacava?”
“Au sega ni kila e dua vei ira na goneyalewa qase cake oya.” A tara sara na matana o Annie. “Ka ra na dredre beka ni ra raici au.”
A mokoti Annie o Na. “Nanuma tiko ni na tiko talega kina o Tami.”
“Au sega ni vakataki Tami,” a kaya o Annie. A rai sara yani vei tuakana o koya. “O dau maqosa na vosa vei ira na tamata.”
“Au kila ni dau dredre na lako ki na dua na kalasi vou,” a kaya o Tami. “Ia e daru na cakava vata na ka oqo. Au a rere talega na gauna au a tekivu kina ena Goneyalewa.”
A wadravi Tami yani o Annie ena kidroa. E dau vaka me yalodei tu ga o Tami! A tovolea sara madaga okoya me baleta na tauri sereivakatagi ni nona koronivuli ka yaco me veiliutaki kina. A sega ni matau tu o Annie ena veika vakaoqori. A dau saga ga me kakua ni kilai tu.
“Ia o a sega vakadua ni bau rere,” a kaya o Annie.
A matadredredre sara o Tami. “Io au a dau rere! Au a rere niu tovolea meu tauri sereivakatagi. O kila na ka au a qai cakava?”
A kurea na uluna o Annie.
“Au a masu ka cakava na noqu vinaka taucoko. Kau vukei ira talega na gone tale eso. A vaka me vuqa vei ira era a rere tu vakataki au ga. Niu vukei ira na tani me ra yalodei a vukei au meu yalodei.”
A vakasamataka na ka oya o Meri. Ena rawa beka ni cakava o koya na ka a cakava o Tami ka vukei ira na goneyalewa tale eso ena nona kalasi mera kakua ni rere?
“O nanuma beka ni o sa na rawa ni lako ki na Goneyalewa nikua?” A taroga mai o Na.
A cegu vakatitobu o Annie. A qai deguvacu o koya. E rawa ni cakava o koya.
Erau a mai gole yani o Annie kei Tami ki na rumu ni kalasi ni Goneyalewa. A vakaraici ira na goneyalewa tale eso o Annie. Eso vei ira era a rairai lomaleqa tu me vakataki koya. A wiricaka voli o Julie e dua na itobe ni uluna ena iqaqalo ni ligana ni katilaka toka o Erica na iqaqalo ni ligana.
A vakasamataka o Annie na sala e rawa ni vukei rau kina. A lako yani o koya me dabe e yasai Julie. “O iko lomaleqa tale tikoga?” A vakasolokakana yani o Annie. “Ena daumaka na ka kece.”
A matadredredre mai o Julie, ka matadredredre lesu o Annie. A sega soti ni rere sara o Annie ena gauna oqo. Ena rawa beka ni taleitaki dina sara na Goneyalewa.
Droini mai vei Toby Newsome