“Vukei Tacina Tagane Lailai,” iTokani, Nove. 2023, 16–17.
Vukei Tacina Tagane Lailai
E sega ni dua a kauwaitaki Lashia ena gauna oqo.
Na italanoa oqo a yaco e Sauca Aferika.
E a dua na tacina tagane lailai vou o Lashia. Na yacana o Liam. E a katabuto na drauniuluna ka somidi na ligana kei na yavana. A rui matavinaka o koya!
Ia ena so na gauna e dau dredre me dua na gone sucu vou ena matavuvale. Erau dau osooso tu ga e veigauna vaoqo o Na kei Ta. A dau tagi vakalevu o Liam.
“I Na, e rawa beka ni o wilika vei au e dua na italanoa?” A taroga yani o Lashia.
“Meu na vakasilimi Liam mada ena tavu,” e kaya mai o Na. “E rawa beka ni o wilika e dua na italanoa kei Ariana.”
A dabe sobu o Lashia ena vuloa vata kei tacina lailai. Erau a vakacereka sara na draunipepa ni dua na ivola. Ia a sega ni tautauvata ni sega o Na.
“I Ta, e rawa beka ni o qito vata kei au?” A taroga yani o Lashia.
“Au gadreva meu vukei Na kei na gonelailai ni bera niu laki cakacaka,” a kaya o Ta.
A matacudrucudru o Lashia. A sa sega ni dua na gauna nei Na kei Ta me baleti koya ena gauna oqo! Erau sa dau vukei Liam tikoga.
Sega ni dede a gole o Ta ki cakacaka. A vakadavori Liam o Na me moce. A dabe vata sara o koya kei Lashia kei Ariana ena idabedabe. A laurai vua na oca.
“Keirau sa bau osooso sara ga vei Liam,” a kaya o Na. “O sa bau vakila ni o galili vakalailai?”
A deguvacu sara o Lashia. A vakila o koya ni via tagi.
A mokoti Lashia kei Ariana sara o Na. “E gadreva vakalevu o Liam na veivuke ena gauna oqo baleta ni se lailai sara o koya. E se sega ni cakava rawa vakaikoya e dua na ka, me vakataki iko”
“Au sa kila,” a kaya o Lashia.
“Ia kevaka o vinakata, e rawa ni o vukei au me qaravi Liam.” A matadredredre mai o Na.
“E dina?” A taroga yani o Lashia. E taleitaka o okoya na vakasama oya.
“Oi au talega?” a taroga mai o Ariana.
“O iko talega,” a kaya o Na.
Sega ni dede sa tekivu tagi mai o Liam. Ni veisautaka o Na na nona daipa, a kauta sara mai vua o Lashia na itaqari.
“Vinaka vakalevu,” a kaya o Na.
Ena siga ka tarava, ni vakasilimi o Liam, rau a lai kauta mai o Lashia kei Ariana e dua na isulunigone savasava me daramaka. Era a toka kina na ivakatakarakara ni manumanu totoka lalai! Erau a kauta mai vei Na me rawa ni vakaisulutaki Liam.
“Vinaka vakalevu,” a kaya o Na.
Erau vakasamataka o Lashia kei Ariana na sala tale eso me rau veivuke kina. Erau dau cakava na nodrau idavodavo ena veimataka ni rau sega ni kerei. Ena so na gauna erau dau cakava talega na idavodavo nei Na kei Ta! Ka ni sa gauna ni vakayakavi, rau a vukei Ta e valenikuro.
“Vinaka vakalevu,” erau a kaya mai o Na kei Ta.
Ni tagi o Liam, a tovolea o Lashia me vakalomavinakataki koya cake. A roqoti koya ka vosa vua ena domo malumu. Ia e se sega ni rawa ni kaya mai o Liam na vinaka vakalevu. Ia ena dua na siga a matadredredre sara mai o koya vei Lashia!
A matadredredre lesu o Lashia. A marau o koya ni rawa ni vukea na tacina tagane lailai kei nona na kei ta talega!
Droini mai vei Shawna J. C. Tenney