“Agalelei mo le Kerisimasi,” Uo, Tes. 2023, 4–5.
Agalelei mo le Kerisimasi
“E mafai ona ave iai la’u meaai,” o lana tala lea.
O lenei tala sa tupu i Iapani.
Sa fesoasoani Akari i lona uso laitiiti, o Miori, e faatulaga le la seti o le fanau mai o le Faaola. Sa fiafia o ia e sauni mo le Kerisimasi.
O le faatusa o le pepe o Iesu na aapa atu mai le faatanoa vao ma se ataata i Ona fofoga. Sa ataata foi Akari. Sa ia mafaufau ai i le tele o le alofa o Iesu ia te ia. E toatele tagata i Iapani sa lei faamanatuina le soifua mai o Iesu Keriso e pei ona sa faia e le aiga o Akari. Ae sa latou tuuina atu pea ni meaalofa ma faaalu se taimi faatasi ma aiga i le Kerisimasi.
Sa tatagi le telefoni a Tama. Sa ia pikiina i luga ma talanoa mo se minute. “Faafetai mo le faamanatu,” na ia fai atu ai. “O le a ou vaai ia te oe i le taeao o le Kerisimasi.” Sa ia tuu i lalo le telefoni.
“E te alu i le galuega auauna atu?” O le fesili lea a Akari.
“Sa’o lelei,” na fai mai ai Tama. “Ou te alu i Tokyo e fesoasoani e avatu meaai i tagata e leai ni fale. O nisi tagata i la tatou uarota e fesoasoani i tausaga uma lava.”
“E mafai ona ou sau i le taimi la nei?” O le fesili lea a Akari.
“Ioe!” Na fai atu ai Tama. “E mafai foi ona sau Miori.”
I le taeao o le Kerisimasi, sa alapo ai le aiga o Akari e tatala meaalofa. Sa fiafia Akari i lana meaalofa! Sa fiafia o ia e taalo ai i se taimi mulimuli ane.
Sa teu e Tina meaai mo tagata uma ma fusi faatofa atu ia i latou. Ona feosofi lea o Akari, Tama, ma Miori i luga o le nofoaafi.
Ina ua taunuu atu le nofoaafi i Tokyo, sa taitai e Tama ia Akari ma Miori i se paka ua iai le tele o faleie ma tagata.
“O tagata nei ua tatou i ai iinei e auauna atu i ai,” o le tala lea a Tama. “E leai ni a latou mea se tele, ma o le i ai o ni meaai mo le Kerisimasi o le a avea ma se faamanuiaga ia i latou.”
Sa faatulaga e se vaega o tagata ia falaoa taai, ipu saimini, ma meaai suamalie i luga o laulau. Na vaai Akari i nisi o tamaiti e pei o lona matua o fesoasoani foi.
“O tagata uma nei e maila tatou ekalesia?” Na fesili ai Akari ia Tama.
“E le o i latou uma,” o le tala lea a Tama. “Pe le manaia ea le toatele o tagata e mananao e fesoasoani?”
Sa tuu e Akari, Miori, ma Tama ni meaai i totonu o pusa. Ona latou fesoasoani lea e tuu atu pusa i tagata i le laina. “Manuia le Kerisimasi,” na fai atu ai Akari i tagata taitoatasi.
E lei umi ae leai uma ni pusa. Ae sa i ai lava tagata i le laina o loo faatalitali mo ni meaai!
Sa faauu tamā. “Ou te matea e le lava.” Sa ia liliu atu i tagata o loo faatalitali. “Ou te matua faamalie atu. Ua leai ni a matou meaai.”
Sa lei manao Akari i na tagata e o e aunoa ma ni meaai. Pe sa i ai se mea e mafai ona ia faia?
“E mafai ona ave iai la’u meaai,” o lana tala lea.
“Lelei le manatu!” Na fai atu ai Tama. “Sei o tatou faasoa uma a tatou meaai.” Sa lue atu ulu o isi tagata fesoasoani. Sa latou aumaia i fafo taumafataga na latou aumaia mo i latou lava. Sa maua e tagata uma o loo i le laina ni meaai!
Sa fai si fiaai o Akari, ae sa le afaina lena mea. Sa manaomia e tagata sa i le paka meaai e sili atu nai lo ia.
“Ou te mitamita ia te oe,” na fai atu ai Tama i le nofoaafi ao tietie i le fale. “O se mea lelei lena ia te oe le faasoa atu o au meaai.”
“O le mea lena e faia e Iesu,” o le tala lea a Akari.
Sa lagona e Akari le mafanafana ma le fiafia i totonu mo le aso atoa. Ma e le faapea ona o le Kerisimasi! Sa fiafia o ia sa mafai ona ia faasoa atu le alofa o le Faaola.
Ata na tusia e Amanda Yoshida