“Tatalo i le Malae Taalo,” Uo, Tes. 2023, 30–31.
Tataloi le Malae Taalo
O le taumafai e aoao le Igilisi na tiga ai le ulu o Davi!
O lenei tala sa tupu i Egelani.
Sa fiafia Davi mo le taimi e taalo ai. Sa ia taumafai malosi e faalogo i lona faiaoga, o Miss Taylor. Ae sa faigata ia te ia ona malamalama i le mea sa ia fai mai ai i le faaPeretania. Na tiga ai le ulu o Davi.
Faatoa siitia atu le aiga o Davi mai Pasila i Egelani. Sa i ai sona fale fou ma se aoga fou. Ae o le suiga sili ona tele o mea uma, o le taimi nei ua i ai se gagana fou a Davi e aoao! Sa ia misia lava lona fale tuai. Sa ia misia ana uo o e na tautatala faaPotukale e pei ona sa ia faia.
Sa patipati e Miss Taylor ona lima. “Ua oo i le taimi taalo,” o lana tala lea.
Sa oso ese Davi mai lona nofoa. Na ia iloaina lena upu! E mafai ona ia aia se meaai suamalie ma taalo i luga o suigi. Ma e mafai ona ia faia se malologa mai le aoaoina o le Igilisi.
Ina ua alu Davi i fafo, sa taufetuli atu isi tamaiti i ona luma e taaalo. Ua leva ona avea i latou ma ni uo. Ma sa latou tautatala uma i le gagana lava e tasi. Ina ua taumafai Davi e faalogo ia i latou, sa toe tiga lona faiai. Sa ia lagonaina le tuuatoatasi.
Maimau pe ana i ai sa’u uo, sa mafaufau ai Davi. O le a le mea e tatau ona ou faia?
Sa manatua e Davi le mea na ta’u atu e lona tina ma lona tama ia te ia. “E mafai ona e tatalo i soo se taimi, i soo se mea, ma o le a faafofoga mai le Tama Faalelagi ia te oe,” na laua fai atu ai.
O le taimi sili lea ona lelei e tatalo ai!
Sa tilotilo solo Davi i le malae taalo. Sa ia vaaia se fale taalo laau. Sa alu Davi i totonu. Sa filemu ia totonu. Sa ia tootuli i ona tulivae, piilima ona lima, ma moeiini ona mata.
“Tama Faalelagi pele, ou te fia taalo ma isi tamaiti. Ou te fia aoao le Igilisi. Faamolemole, fesoasoani mai ia te a’u.”
Ina ua uma lana tatalo, sa lagona e Davi se lagona mafanafana ma le toafilemu i lona loto. Sa ia iloa e tusa lava pe lei tele ni ana uo, ae o le Tama Faalelagi lava o lana uo i taimi uma.
Ina ua uma le taimi taalo, sa toe foi Davi i le potuaoga. Sa faigata pea ona malamalama i le Igilisi. Ae sa tonu ia te ia e taumafai pea!
Mo le tele o vaiaso na faataitai ai Davi. Sa ia faitauina le tele o tala i le faaPeretania. Sa faalogologo o ia ia Miss Taylor. Sa ia faataitai foi ona talanoa i isi tamaiti.
O taimi uma lava e lagona ai e Davi le faanoanoa, sa ia faia ai se tatalo. O taimi taitasi e tiga ai lona ulu mai le taumafai e aoao le Igilisi, sa ia faia ai se tatalo. Ma o taimi uma sa ia tatalo ai, sa fesoasoani le Tama Faalelagi ia te ia ia lagona le filemu. Sa ia lagona e mafai pea ona ia taumafai.
Na mavae atu le tele o vaiaso. Sa faigofie atu ona malamalama ia Miss Taylor. Sa amata ona faia e Davi ni uo ma talanoa ma i latou. Sa ia manumalo foi i se taui i le aoga mo le galue malosi ma le faitau lelei!
I se tasi aso na sau ai se tamaitiiti aoga fou i le vasega a Davi i le aoga. O lona igoa o Leo. Sa sau o ia mai se isi atunuu ma sa lei iloa lelei le Igilisi.
I le taimi taalo, na vaai ai Davi ia Leo o nofo i luga o le suigi na o ia. Sa ia foliga faanoanoa. Sa manatua e Davi lona lagona tuuatoatasi ina ua fou o ia. Sa manao o ia ia avea ma uo a Leo.
Sa tamoe atu Davi ia Leo. “Malo. O a’u o Davi.” Sa ia uuina i luga se polo soka. “E te manao e taalo?”
Sa luelue le ulu o Leo ma oso ese mai le suigi.
Sa lagona e Davi le mafanafana i totonu. Sa fiafia o ia e mafai ona avea o ia ma se uo ia Leo, e pei lava o le Tama Faalelagi o se uo ia te ia.
Ata na tusia e Maja Andersen