“O Le Totini Paepae,” Uo, Tes. 2023, 36–37.
O Le Totini Paepae
Sa lei manatu Chakell o le a suia lona tuagane.
O lenei tala sa tupu i le ISA.
Sa ata Chakell i ata malie o lona uso. Ua oo i le Po o le Vaeluaga o le Kerisimasi, ma sa latou taaalo ma lona aiga i se taaloga tusitusi faataamilo i le nofoaga o loo iai le afi.
O le Po o le Vaeluaga o le Kerisimasi o le aso sili lea ona fiafia i ai Chakell o le tausaga atoa. Sa ia lagona le mafanafana ma le fiafia i le mavae ai o meaai mama ma talieega. Sa lei manao o ia e faamuta!
“Ua lelei,” na fai mai ai Tina. “Ua oo i le taimi mo le totini paepae!”
Sa ataata Chakell. O le Po o le Vaeluaga o le Kerisimasi o le aso lea e sili ona ia fiafia i ai, ma o se tasi lenei o tu masani e sili ona fiafia i ai.
I le mea sa nofo ai o ia, sa tautau ai e tagata ni totini lapopoa, manaia i autafa o le nofoaga o loo iai le afi i le Kerisimasi. I le taeao o le Kerisimasi, o le a faatumulia i latou i meaai mama! Ae o lenei totini sa sili atu ona faapitoa. O le a faatumuina e Chakell ma lona aiga i meaalofa mo Iesu.
Sa aumai i fafo e Tina se totini paepae matagofie sa ia ni fele auro. Ona ia tuuina atu lea i tagata taitoatasi sina fasipepa ma se penitala. “Tusi i lalo se mea se tasi e te manao e folafola atu ia Iesu i le tausaga a sau,” o lana tala lea.
Ona tatou tuuina lea i le totini, ma o le a tatou faitauina i le tausaga a sau i le Po o le Kerisimasi,” na faaopoopo mai ai Tama. “Ae muamua, sei o tatou faitauina a tatou folafolaga mai le tausaga ua te’a.”
Sa ia aapa atu i le totini ma toso mai i fafo fasi pepa laiti mai le tausaga ua te’a. Sa ia tufatufaina atu, ma faitau lemu e Chakell lana ia fasi pepa: “O le a ou fesoasoani atili i le fale.” Sa manatu o ia sa ia faia se galuega lelei tele i lena mea i lenei tausaga. Ae o le a se mea o le a ia tusia i lenei taimi?
“Ou te iloa le mea o le a ou tusia! ”o le tala fiafia lea a lona uso.
Sa mafaufau Chakell i mea e mafai ona ia tuuina atu ia Iesu. O le a se mea e mafai ona ia faia ia sili atu i le tausaga a sau ina ia avea atili ai e faapei o Ia? O le a se mea o le a Ia finagalo ia te ia e fai?
O le taimi lena na ia vaai ai i lona tuagane matua, o Braeden, o tusia se mea i luga o lana fasipepa.
Sa faanonou ia Chakell. Sa le mafai ona ia iloa atu le mea na ia tusia, ae sa ia mautinoa e le o se mea o le a ia faia moni lava.
Sa tele ina taufaalili Braeden ia Chakell, ma sa le lelei tele le tasi i le isi i lenei tausaga. Sa alofa o ia i lona tuagane matua, ae na te lei manatu o le a ia taumafai e avea atili e faapei o Iesu.
Aisea e agaleaga ai o ia ia te a’u? sa ia mafaufau.
Sa ia matamata a o ia gaugauina lana pepa ma tuu i le totini paepae.
Sa vaaia e Braeden lona sioa ma ataata. “Aua le autilo,” o lana tala lea.
Sa toe tepa i lalo Chakell i lana pepa ma tusi ai, “O le a ou taumafai ia agalelei i tagata uma i lenei tausaga.” Ona ia tuuina foi lea o lana pepa i le totini.
Sa lei leva ae oo i le taimi moe. Ae sa le mafai e Chakell ona taofia le mafaufau i mea na tusia e Braeden. E leai se tasi na tatau ona faitau i le folafolaga a se isi tagata ia Iesu, ae sa ia fia iloa moni lava!
A o sauni isi e momoe, sa tolotolo atu Chakell i le totini paepae. Sa ia mauaina le fasipepa a Braeden ma tatalaina.
“Ou te folafola atu ia agalelei atili ia Chakell i lenei tausaga,” na fai mai ai.
Sa le talitonu o ia. Pe o le mea moni lenei na tusia e Braeden? Sa ia lagonaina loimata i ona mata ma toe tuu ma le faaeteete le pepa i totonu o le totini.
E masani ona fai mai Tina o le i ai o le faatuatua ia Iesu Keriso e mafai ona fesoasoani i soo se tasi e suia ma avea atili e faapei o Ia. Atonu sa sa’o o ia. Atonu e mafai moni lava e Iesu ona fesoasoani ia Braeden ma ia ia agalelei le tasi i le isi.
O le taeao na sosoo ai a o nofo i lalo Chakell mo le taumafataga o le taeao, sa ia lagonaina pea le mafanafana i totonu. O le taimi lava na sau ai Braeden i lalo i le faasitepu sa ia opoina o ia i se opo lapoa.
Na matala tetele mata o Braeden. “Auoi, o le a lenei mea?”
“Sa na ona ou manao lava e fusi oe”, o lana tala lea. “Manuia le Kerisimasi!”
Sa ataata Braeden ma toe fusi atu ia te ia. “Manuia le Kerisimasi!”
Ata na tusia e Kevin Fales