“Faatasi i Taimi Uma,” Uo, Tes. 2023, 40–41.
Faatasi i Taimi Uma
Sa fiafia Amir ina ua faamauina i le malumalu i lona aiga.
O lenei tala sa tupu i Italia.
Sa uu e Amir le lima o Tina a o la savavali atu i le malaevaalele i Roma, Italia. Faatoa latou o ese mai lo latou fale i Eleni. Sa latou o i le malumalu ina ia faamauina o se aiga! O lona tuafafine matua na sau mai se mea mamao ina ia mafai ona faamauina o ia ia i latou.
“O fea Tinamatua?” Sa fesili atu ai Amir, ma tilotilo solo. Sa ia osooso teisi i ona tamaivae. Sa matuai fiafia o ia!
“O le a tatou mauaina o ia,” o le tala lea a Tina.
O “Tinamatua” e le o le tinamatua moni o Amir, ae sa fiafia o ia e mafaufau ia te ia faapena. Sa pei o ia o lana agelu faifeautalai! Sa fesoasoani o ia i lona aiga e aoao e uiga i le talalelei. Ma o lenei ua ia fesoasoani ia i latou e o i le malumalu mo le taimi muamua!
“A lale!” Na alaga atu ai Amir. “Talofa, Tinamatua!”
Sa talotalo atu le lima o Amir. Sa talotalo mai Sister Bush ma se ataata tele. Sa ia savali atu ma fusi atu Amir. “Ua e sauni?”
“Ioe!” Na fai atu ai Amir.
Sa valaau atu Sister Bush i se taavale la’u pasese e aveina atu i latou i le malumalu. Sa oso i totonu Amir i autafa o lona tuafafine. E lei umi ae liliu le taavale la’u pasese i le tulimanu, ma sa mafai ona iloa atu e Amir le malumalu. Sa matuai tele ma matagofie.
“E sili atu ona manaia nai lo ata!” Na fai atu ai Amir.
Sa savavali faataamilo Amir ma lona aiga i lotoa o le malumalu ma pue ni ata. Sa latou moemiti i lenei aso mo se taimi umi lava.
Ina ua oo i le taimi e alu ai i totonu, sa lagona e Amir e pei o loo ia savali atu i le lagi. O totonu sa mama ma susulu. Sa lelei tele tagata faigaluega o le malumalu. Sa lagona e Amir e pei o loo leoleoina o ia e le Tama Faalelagi. Sa lagona lona saogalemu.
Sa faatalitali Amir a o o atu ona matua ma lona tuafafine i se isi vaega o le malumalu. Sa faatalitali ni tagata faigaluega agalelei se toalua o le malumalu faatasi ma ia ma tuu atu ia te ia ni ofu papae e ofuina. Sa latou faaali atu ia te ia se vitio e uiga ia Iesu Keriso. Sa lagona lona filemu.
Ina ua oo i le taimi, sa taitai o ia e le aufaigaluega o le malumalu i le fogafale i luga. Sa vaavaai Amir mo Iesu i atavali. Sa fiafia ai o ia e iloa sa ia i ai i totonu o le maota o le Atua.
O le potu sa latou ulufale atu i ai sa matagofie. Sa tautau mai se moli lapoa ma feilafi mai le taualuga. E lua ni faaata lapopoa sa faafesaga’i i luga o puipui. Sa faatalitali mai ai lona aiga iina.
Sa tootutuli Tina ma Tama i se fatafaitaulaga sa ufitia i ie vaivai ma uu lima. Sa talosagaina e se tagata faigaluega o le malumalu ia Amir ma lona tuafafine e tootutuli faatasi ma i latou i le fatafaitaulaga. Sa foliga mai sa la auai faatasi ina ua mavae le valavala ai mo se taimi umi lava.
Sa maligi loimata o le fiafia a Amir. Sa foliga fiafia foi lona aiga. Sa ia iloa o le lagona mafanafana sa ia lagonaina o le Agaga Paia. Sa fiafia o ia ona sa mafai ona latou i ai faatasi uma iina.
Ina ua oo i le taimi e toe foi atu ai i Eleni, sa fusi faatofa atu Amir i lona tuafafine matua. Sa faanoanoa o ia ona o le a latou o ese. Ae sa ia iloaina ona o le malumalu, e i ai se aso o le a latou faatasi ai i taimi uma.
O Ata na tusia e Toby Newsome