“Falaoa Falai faaFarani mo Tagata Uma,” Uo, Tes. 2023, 20–21.
Falaoa Falai faaFarani mo Tagata Uma
Sa na o sina auaunaga laitiiti o le Kerisimasi na fesoasoani ia i latou e faia ai se uo fou.
O lenei tala sa tupu i Pasila.
Sa uu e Repeka le lima o lona uso. Sa la feosofi ese mai le nofoa ma puna i luga o le kapeta. Sa ataata teineiti e toalua.
“Maualuga atu!” O le tala lea a Melisa.
“Tamaitai, aua le fepuna i totonu o le fale. Tatou te le mananao e faalavelave ia Miss Daisy i le amataga o le aso,” na valaau mai ai Tina mai le umukuka.
Sa faauu Repeka ma Melisa ma saofafai i lalo. Sa faatoa latou siitia atu lava i se fale fou. O Miss Daisy o le tuaoi sa nofo i lalo ifo o i latou.
“Ua e vaai ea ia Miss Daisy?” Sa fesili atu ai Melisa ia Repeka.
“Leai. Ae ou te fefe ia te ia. Sa ou faalogo e ita o ia i tamaiti,” o le tala lea a Repeka.
Sa matala lautele mata o Melisa. “Ae faapefea la tatou tu masani o le falaoa falai faaFarani?”
Toe o ni nai aso ona oo lea i le Po o le Vaeluaga o le Kerisimasi. O tu masani faaleaiga e sili ona fiafia i ai Repeka ma Melisa o le faia o falaoa falai faaFarani o se meaai mama mo o latou tuaoi uma. O le tausaga lenei o le a faapitoa ona o le taimi muamua lea o le a latou faia ai i lo latou fale fou.
“Atonu e tatau ona ta faamisi le faitotoa o Miss Daisy,” o le tala lea a Repeka.
I le Po o le Vaeluaga o le Kerisimasi, sa ala ae teineiti ma le fiafia e fai le falaoa falai faaFarani.
Sa fesoasoani Repeka ia Tama e saeu fuamoa, susu, suka, ma le tinamoni. Sa lolō e Melisa le falaoa i totonu o le paluga fuamoa. Ona latou kukaina lea o le falaoa. E lei leva, ae manogi lo latou fale atoa e pei o se tinamoni.
Mulimuli ane, sa latou tuuina le falaoa falai faaFarani i totonu o ato ma tusi igoa o o latou tuaoi i luga o ato taitasi.
Sa tapuni e Repeka le ato mulimuli. “Saunia!” o lana tala lea.
Sa faitauina e Tama ia ato ma siaki uma igoa. “Ou te le o vaai i se tasi mo Miss Daisy,” o lana tala lea.
Sa fetilofa’i Repeka ma Melisa i le tasi ma le isi.
“Ma te lei mananao e avatu se mea ia te ia,” o le tala lea a Repeka. “E ita o ia i tamaiti.”
Sa faauu tamā. “O la tatou tu masani o le faasoa atu lea i tuaoi uma. E te le manatu ea e tatau ona tatou faia se tasi mo Miss Daisy?”
Sa iloa e Repeka ma Melisa e sa’o Tama. Sa la toe faatumuina se ato se tasi ma tusi ai “Miss Daisy” i luga.
Sa latou aveina atu taga i tuaoi taitasi. Mulimuli ane, na latou oo mai i le faitotoa a Miss Daisy.
Ae faapefea pe afai na te le fiafia i le meaai? Ae faapefea pe afai e ee atu o ia ia i latou?
Sa manava loloa i totonu teneiti. Ona tu’itu’i ai lea i le faitotoa.
“O ai lea?” O le fesili lea a Miss Daisy. Sa ia tatalaina le faitotoa ma tilotilo ifo ia i latou. Sa pupuu lona lauulu paepae. Sa lei foliga taufaafefe tele o ia.
Mo sina taimi, sa lei iloa e Repeka ma Melisa le tala e fai atu.
“O i matou o lou tuaoi i le falealuga,” o le tala lea a Repeka.
Sa uu atu e Melisa le ato. “Ua matou aumaia ni falaoa falai faaFarani mo oe. Manuia le Kerisimasi!”
“Oi, faafetai lava! Ou te fiafia i le falaoa falai faaFarani.” Sa ave e Miss Daisy le ato. “O outou la o o’u tuaoi fou? Sa ou fia feiloai ia te outou, ae sa ou manatu atonu tou te le fiafia i tagata matutua e pei o a’u.”
Sa tilotilo atu Repeka ma Melisa i le tasi ma le isi ma ni mata lautele. “Sa matou manatu e te le fiafia i ni tamaiti!” Na fai atu ai Repeka.
Sa ata Miss Daisy. “Ou te alofa tele i tamaiti! Omai i totonu. O le a ou faaali atu ia te oe ata o fanau a la’u fanau.”
Sa latou o uma i totonu o le fale o Miss Daisy. Sa i ai fugalaau i soo se mea ma le tele o ata o aiga.
“Saofai i se nofoa. Sa ou faia nei lava se vai pasio,” o le tala lea a Miss Daisy. Sa ia liligi atu le vaiinu i ipu. “Ou te manatu o le a matuai tofolelei faatasi ma le falaoa falai faaFarani manaia lenei.”
Sa ave e teineiti ma o la matua ipu vaiinu. O le matuai tofolelei lava!
Sa latou aoaoina igoa o fanau a fanau a Miss Daisy. Sa latou faalogologo foi faatasi ma ia i musika o le Kerisimasi.
Sa sese Repeka ma Melisa e uiga ia Miss Daisy. O se tagata lelei tele o ia. Ma malie foi! O le falaoa falai faaFarani o le Kerisimasi o se tu masani maoae. O le tausaga lenei, sa fesoasoani ia i laua e faia ai se uo fou.
Ata na tusia e Shawna J. C. Tenney