“Faitauga o Aso Agai Atu i le Kerisimasi,” Uo, Tes. 2023, 10–11.
Faitauga o Aso Agai Atu i le Kerisimasi
O le tu masani e fiafia i ai Mathis o le tutuina lea o moliga’o mo le Kerisimasi.
O lenei tala sa tupu i Siamani.
“Mathis! Emilian!” O le valaau lea a Mama. “Ua oo i le taimi e tutu ai moliga’o i luga o le pale.”
Sa tuu i lalo e Mathis lana tusi ma tamoe atu i le potu malolo. Sa mulimuli atu lona uso laitiiti, o Emilian ia te ia.
Sa tele mea na fiafia i ai Mathis e uiga i le Kerisimasi. Sa fiafia o ia e fai ni kuki lebkuchen. Sa fiafia o ia e teuteu le laau. Ae o lana vaega e sili ona fiafia i ai o le tutuina o moliga’o e sauni ai mo le Kerisimasi.
Sa latou ta’ua lenei mea o le pale o le Vaitau Faatalitali. Sa i ai i le pale ni moligao mumu se fa sa tu’u i luga o lala lanumeamata. I Siamani, e faamumu e tagata moliga’o i Aso Sa taitasi i le masina ao lumanai le Vaeluaga o le Kerisimasi. O le vaiaso muamua, sa latou faamumuina ai se moliga’o se tasi. O le vaiaso na sosoo ai, sa latou faamumuina ai le lua. O le lona tolu, sa latou faamumuina le tolu. Ma o le Aso Sa a o lumanai le Po o le Vaeluaga o le Kerisimasi, sa latou faamumuina uma ai le fa.
Sa tilotilo atu Mathis ia Papa o fesoasoani ia Emilian e faamumu moliga’o e lua. Sa foliga fiafia mai le afi susulu.
“Mama, o le a le uiga o le vaitau faatalitali?” O le fesili lea a Mathis.
“O le vaitau faatalitali o le taimi a o lumanai le Kerisimasi,” o le tala lea a Mama. “E fesoasoani moliga’o tatou te faitau ai i aso (ao lumana’i le Kerisimasi). Ma e faapena foi a tatou kalena o le Vaitau Faatalitali!”
Sa aapa atu Mama mo le fale laupapa matagofie i luga o le fatatusi. Sa ia tuuina i luga o le laulau. Sa fiafia Mathis i le na ona vaai i ai.
E lua a la kalena o le Vaitau Faatalitali i lenei tausaga. Sa le o ni ituaiga kalena masani. O ni ituaiga faapitoa, mo na o le Kerisimasi! Muamua o le tamai fale laupapa e 24 faitotoa—e tasi mo aso taitasi a o lumanai le Kerisimasi.
“O lou taimi lenei e tatala ai se faitotoa!” O le tala lea a Mama.
Sa ataata Mathis ma tatala le faitotoa mo le asō. Sa i ai ni lole laiti se lua i totonu! Sa ia tuuina atu se tasi ia Emilian.
“E te iloa,” na fai atu ai Papa, o le “vaitau faatalitali o lonauiga foi o le sau o se tasi po o se mea taua. E te manatua le tagata o le a oo mai tatou te faamanatuina i le Kerisimasi?”
“Iesu!” Sa fai faatasi mai ai Mathis ma Emilian.
Sa luelue atu le ulu o Mama. “Sa faatalitali tagata mo le faitau afe o tausaga mo le afio mai o Iesu Keriso. Tatou te faamanatuina Lona soifua mai i le Kerisimasi. Ma e i ai se aso, o le a toe afio mai ai o Ia i le lalolagi.”
Sa vaai faalemafaufau Mathis pe faape’i pe a toe afio mai Iesu. O lena mea na lagona ai e ia le mafanafana i totonu.
“Tatala le isi kalena, Mathis!” Sa fai atu ai Emilian.
“Ua lelei!” Sa aapa atu Mathis mo le kalena lona lua. Sa faia e Oma (Tinamatua) mo na o i latou lava. O se tautau lavalava ma ni lipine uumi e 24 na tautau mai ai. O lipine taitasi sa i ai se fasipepa ua gaugau faatasi ma se mau e uiga ia Iesu Keriso e nonoa i ai. O aso uma a o lumanai le Kerisimasi e tatau ona latou faitauina se mau fou e uiga ia Iesu.
Sa toso ese e Mathis le isi pepa mai le lipine. “Aua faauta, ou te aumai ia te outou le tala lelei e olioli tele i le nuu uma,” sa ia faitau ai. “Aua o le aso nei ua fanau ai i le aai o Tavita, lo outou Faaola, o le Alii ia o Keriso.”*
Sa lagona e Mathis le toafilemu a o matamata atu o ia ma lona aiga i le susulu o moliga’o. I le lua vaiaso, o le a latou tutuina moliga’o uma e fa, ma o le a uma le faatalitali mo le Kerisimasi! Ae na iloa e Mathis o le Kerisimasi e le na o le pau lea o le mea sa latou faatalitali i ai. Sa latou faatalitali mo le afio mai o Iesu Keriso.
Ata na tusia e Violet Lemay