“U a Manu Ninii ma Faamanuiaga,” Uo, Fep. 2024, 10–11.
U a Manu Ninii ma Faamanuiaga
Sa manaomia e Carlos se fesoasoani.
O lenei tala sa tupu i le ISA.
Sa faaūū Carlos ia te ia lava i le faata o le faletaele. O ona foliga ma ogalima sa lanu piniki sesega. Sa sili atu le leaga o lona mu i le la nai lo le mea sa ia mafaufau i ai. Ma sa ia te ia le tele o mageso mai u a manu ninii i ona lima ma vae. Sa manaia le savaliga sopo ma lana vasega Peraimeri, ae o lea ua tiga atoa lona pa’u!
Sa tilotilo atu Carlos i lana atofaafafa i luga o le fola. O le fagu mo le uuina o le tino mo le la ma le fagu mo manu ninii sa teuina e Tina i le ato o loo i ai pea i totonu. Sa tatau ona ia faaaogaina e pei ona ia fai atu ai ia te ia. Ae sa ia manatu na te le manaomiaina.
Sa tatala e Carlos le kapoti ma maua ai le fagu laitiiti sa masani ona faaaoga e lona tina mo pa’u o le tino pe a mu i le la. Sa ia miliina le kulimi i ona foliga. Sa manaia le lagona malu i lona pa’u vevela.
Na sosoo ai ma le tuuina e Carlos o le kulimi i ona lima. Ae sa le mafai ona ia maua le kulimi mo u a manu ninii. E le’i umi ae fiu o ia. Sa ia manaomia le fesoasoani. E tatau ona ia talanoa ia Tina.
Na maua e ia Tina i le umukuka. Ina ua vaai atu [tina] i ona foliga mu mai le la, sa foliga popole o ia. Sa manatu Carlos o le a ita tina ia te ia ona o le le uuina o lona tino i le kulimi mo le la. Ae sa le’i faapena tina.
“O seki oe?” sa ia fesili ai “Ai se tiga tele o lena mea.”
“Ioe.” Sa punou i lalo lona ulu. “E mafai ona e fesoasoani mai ia te a’u? Faamolemole?”
“Ioe.” Na taitai atu e Tina ia Carlos i le faletaele. Sa tilotilo atu o ia i le kapoti ma toso mai i fafo se fagu laitiiti.
“E tatau ona fesoasoani le mea lenei i u e taofi ai le mageso,” o lana tala lea. Sa ia miliina sina tamai kulimi i luga o u taitasi.
“Ia lena,” sa ia fai atu ai, ma tapuni le kulimi. “Ou te faamoemoe o le a fesoasoani lena ia te oe e maua ai se lagona lelei.”
“Faafetai, Tina.” Sa tilotilo ifo Carlos i lalo i le fola. “Ou te faamalie atu o’u te le’i faaaogaina mea na e teuina mo a’u. Sa tatau ona ou faalogo ia te oe. Sa ou faapea na sili atu lo’u iloa, ae leai.”
Sa kisi atu [tina] i le pito i luga o lona ulu. “E le afaina. O nisi taimi ou te manatu ai ua sili atu foi lo’u iloa. Ona faaali mai lea e le Tama Faalelagi ia te a’u e le’i sili atu lava lo’u iloa.” Sa fai ifo lona leo i se musumusu. “E oo lava i tagata matutua e mafai ona faia ni mea sese.”
Na ata Carlos Ona ia faanonou lea. “Ana faapea ou te usitai ia te oe, ou te le tiga tele i le taimi nei.”
“Ou te manatu o le lagona lena o le toatele o fanau a le Tama Faalelagi pe a latou le usitai ia te Ia,” o le tala lea a Tina. “Latou te moomoo maimau pe ana latou faalogo ia te Ia. Ma e tiga o Ia mo Ana fanau pe a latou tiga, e pei lava ona ou tiga mo oe i le taimi nei.”
“Ae e mafai ona Ia fesoasoani ia i latou ia maua se lagona lelei,” o le tala lea a Carlos. “E pei lava ona e fesoasoani ia te a’u. E sao?”
“E sa’o! A tatou salamo, e mafai ona fesoasoani mai le Tama Faalelagi ma Iesu Keriso ia i tatou. Ona mafai lea ona tatou faia ni filifiliga lelei atu i le lumanai.”
Sa ataata foi Carlos. O loo tiga pea le mu o lona tino mai le la ma u a manu ninii, ae sa ia iloa o le a faamaloloina o ia. Ma o le isi taimi, e mafai ona ia faia se filifiliga sili atu!
Ata na saunia e Mary Sullivan