O Gaoioiga o le Sau, Mulimuli Mai ia te A’u

Mo afiafi faaleaiga po o le suesueina o tusitusiga paia—pe tau lava o se mea faafiafia!

29 Ianuari–4 Fepuari

Faaiteite o le Liahona

O ata na tusia e Katy Dockrill

Mo le 1 Nifae 16–22

Na taialaina e le Liahona le aiga o Nifae i le nuu folafolaina (tagai i le 1 Nifae 18:21–23). Tuu atu i se tagata e toatasi e nana se mea faitino. E feauauai tagata uma e fai atu fesili o le ioe-po o le-leai e sue faatasi ai le mea faitino.

Mo tamaiti laiti: Tuu atu i lau tama e nana se mea faitino. Fai atu ia i latou e tuu atu ia te oe ni faaiteite e uiga i le mea o loo i ai i le fai atu “vevela” pe a e latalata atu ae “malulu” pe a e mamao ese.

5–11 Fepuari

Faafeagai i Mea Uma Lava

Mo le 2 Nifae 1–2

Na aoao mai Liae o le i ai o taimi lelei ma taimi leaga o se vaega o le fuafuaga a le Atua mo i tatou i le lalolagi (tagai i le 2 Nifae 2:11). Tusi i lalo upu e faafeagai (e pei o le “umī” ma le “puupuu”) i luga o fasipepa ma tuu i totonu o se pesini. Feauauai i le faitauina o pepa. Vaai po o ai e mafai ona sili ona vave mateia le faafeagai o upu taitasi!

Mo tamaiti laiti: O le i ai o faafeagai i le olaga e lelei. Ki se moli ma tape. Faamatala pe faapefea ona fesoasoani le malamalama ia i tatou e vaai ai ae fesoasoani le pogisa tatou te momoe ai. Tatou te manaomia mea uma ina ia fiafia ai.

12-18 Fepuari

Galulue Faatasi o Tusitusiga Paia

Mo le 2 Nifae 3–5

E galulue faatasi le Tusi a Mamona ma le Tusi Paia e aoao i tatou e uiga ia Iesu Keriso (tagai i le 2 Nifae 3:12). Taaalo i se taaloga e faatatau i le galulue faatasi! Tuu atu i se tagata e numinumi ni fasipepa i ni polo ma tauai i totonu o se pesini. Tuu atu i se isi tagata e taumafai e taofi pepa mai le alu i totonu. Faataitai loa i ni tagata se toalua e tauaia pepa. O le a le taimi na faigofie ai ona oo ni pepa i totonu o le pesini?

Mo tamaiti laiti: O le Tusi Paia ma le Tusi a Mamona o loo aoao mai uma e uiga ia Iesu Keriso. Tusi faatasi se ata o Iesu.

19–25 Fepuari

O Faamanuiaga o le Polo-Fitifiti

Mo le 2 Nifae 6–10

Na fai mai Iakopo e mafai ona tatou fiafia ona o faamanuiaga ua tuuina mai e le Tama Faalelagi ia i tatou (tagai i le 2 Nifae 9:3). Pōpō se polo i luma ma tua. Pe a oo i lou taimi e pōpō ai le polo, fai atu se faamanuiaga ua tuuina mai e le Tama Faalelagi ia te oe. Faaauau pea i le umi e te mafaia ai!

Mo tamaiti laiti: Piki i luga lau fanau ma sii i luga i le ea. Talanoa e uiga i le auala e mafai ai e Iesu Keriso ona faafiafia ma faamāmā o tatou loto.