“Uo Moni?” Uo, Fep. 2024, 36–37.
Uo Moni?
Sa le’i manao Henry e toe tuua na o ia.
O lenei tala sa tupu i le ISA.
“Ei, sau e matamata i le mea lea,” na fai atu ai Darren ia Henry. “E ese le malie!”
Sa mole le manava o Henry. A toe fai foi se isi vitio.
Sa nofo o ia i autafa o Darren ma Drake i luga o le nofoa. Sa la’ua talie i le vitio, ae sa manao Henry e faamimigi i totonu o aluga ina ia le mafai ona ia faalogo atu i upu leaga.
O le taimi lava na uma ai le vitio, sa oso i luga Henry. “Tatou o e tietie uila i fafo.”
“Se isi taimi,” o le tala lea a Drake. Sa faaauau pea ona saveu e Darren ia lana telefoni.
Sa mapuea Henry ma toe nofo i lalo a o oomi e Darren le ki amata.
Ina ua alu Henry i lana uila i le fale i se taimi mulimuli ane, sa mafaufau o ia e uiga i isi taimi uma sa ia lagona ai le le lagolelei faatasi ma Darren ma Drake. E pei o le taimi na la faamatalaina ai ni tala malie faatiga i le aoga. Pe gaoi apu mai le laau a Mr. Garcia.
Atonu e tatau ona ou talanoa ia Tina, na mafaufau ai Henry. Ae a pe afai e fai mai o ia e le mafai ona ou toe tafao ia Darren ma Drake? O le a tuua ai na o ia. E toe tupu foi.
Sa seti e Tina le laulau a o savali atu Henry i totonu. “Ei, na a mai lou aso?” sa ia fesili mai ai.
Sa faamimigi tauau o Henry. Sa latou saofafai mo le meaai o le afiafi, ma sa faia e Tina se tatalo. Sa saeueu e Henry lana supo e aunoa ma le ’aia.
“Na i ai se mea na tupu i le fale o Darren ananei?” O le fesili lea a Tinā.
Sa lagona e Henry le pei e faafaufau. Sa le’i manao o ia e ta’u atu i lona tina ia mea uma e uiga ia Darren ma Drake. Ae atonu o le a ia ta’u atu ia te ia si mea laitiiti. “Pau lava le mea matou te faia o le matamata i vitio. Ou te fia tietie uila, ae e fai mai lava Darren ma Drake e leai.”
“E i ai se mea e faaletonu i vitio?” sa ia fesili ai.
Sa tatavale le fatu o Henry. Pe tatau ona ia ta’u atu ia te ia? Sa le mafai ona ia faia se tala e uiga i upu leaga. E le toe fia tuua na o ia. “Ou te le o fia talanoa i le taimi nei.
Sa manava loloa Tina. “Ou te iloa o le siitia mai iinei sa faigata. Sa matuai e fiafia lava ina ua avea oe ma uo a Darren ma Drake. Ae ou te faamoemoe la te le o faamalosia oe e fai pe matamata i se mea leaga. O uo moni e fesoasoani ia te oe e fai le mea sa’o.”
Sa tilotilo i lalo Henry. “O Darren ma Drake o a’u uo moni.”
“Ia, afai o la’ua o au uo moni, o le a la faaaloalogia au faaiuga. E tusa lava pe e te fai atu leai.”
I le fale o Darren i le aso na sosoo ai, sa mau i le mafaufau o Henry ia upu “uo moni”.
“Vaai foi i le vitio fou lea,” o le tala lea a Darren.
“Leai,” na fai atu ai Henry.
Sa sioa atu Darren ma Drake ia te ia.
“Ou te le toe matamata,” na ia faiatu ai, i se leotele teisi i le taimi lea. “Ou te le fiafia i lagona ou te maua ai.”
“Aua e te fia pepe,” o le tala lea a Drake.
Sa toē Darren ma Drake. Sa amata ona la taufaalili ia Henry e uiga i le mumu o ona foliga i taimi uma pe a laua faaali atu ia te ia vitio po o le taimi foi e tausua ai i le aoga.
Pe o le mea ea lenei e faia e uo moni? Sa manatunatu ai Henry
Sa tu a’e o ia mai le nofoa. “O le a ou alu e tietie i la’u uila E mafai ona lua omai pe a lua mananao ai.”
“Leai,” o le tala lea a Darren. “O le a ma nonofo ii.”
Sa savali Henry i fafo na o ia. O le taimi lava na tapuni ai le faitotoa i ona tua, sa ia iloa ai ua leai se lagona faafaufau i lona manava. Sa ia lagonaina le māmā ma le toafimalie.
Ona ia iloaina lea o se isi mea. Sa le’i tuua na o ia. Sa faatasi le Agaga Paia ma ia. Sa faanoanoa pea Henry ia Darren ma Drake. Sa ta’u atu e le Agaga Paia ia te ia ua ia faia le filifiliga sa’o. Sa ataata o ia, ma alu i lana uila ma tietie atu i le fale.
Ata na tusia e Matt Smith